Jehz. 30 - BUKO SIPUNENAN

Ukuman Tuhan ka Misir

¹ Iageti oi tiboiet Tuhan katubukku:

² “Ale togat sirimanua, pupatuptup samba kua: Kise te tiboiet Tuhan Taikamanua: Pusougeri: Enaa, gogoi nenda!

³ Gogoi nenda amalegrengan, gogoi Tuhan amalegrengan, gogoi samba tanai rusa simagepgep; nenda te teteretda tai bangsa.

⁴ Moi le lanjau ka Misir samba Etiopia mugeret tubu le kateteret raputagguilu sirimanua simamatei simateiakenen ka Misir. Pukayoatnia tuambit samba saisainia turagatake.

⁵ Tai Etiopia, Put, Lud, sangaliot polak Arab, Libia samba sangamberi sirimanua sibara ka laggai sipatadde ka sia, matei le geti ka lanjau pasambatda.

⁶ Kise te tiboiet Tuhan: Matei le geti sangamberi sirimanua sisopo Misir, samba pubuangan patuat Misir sibaraakenen puroronnia mababakbak le. Barania ka Migdol pat aili ka Siene matei le sia ka lanjau, kise te tiboiet Tuhan Taikamanua.

⁷ Tusubuake le nia katalagat sangamberi kupkumen laggai simatangeu samba leu sangamberi laggai samba leu sangamberi laggai simakakatai.

⁸ Oto agairangan getinia Aku te Tuhan, kateteret Kubaraake obengan ka Misir, bailiu sangamberi sirimanua sisoponia tusubuake.

⁹ Ka gogoi nenda sangamberi pakoinietKu mei le sia simaola bule rage'geake Etiopia sipuangka baga samba muloto le sia ka gogoi pasiukuman Misir; bulatnia te, momoi te gogoi nenda!

¹⁰ Kise te tiboiet Tuhan Taikamanua: Kutataake le pukayoat Misir kapaneiteiat Nebukadnezar, rimata Babel.

¹¹ Nia pasamba bangsania, bulat sikatai katalagat bangsa, tuambit le nia bule tusubuake ka polak nenda samba raoppat le lanjau raei ka Misir, lepa sunakerangan polak nenda sirimanua simateiakenen.

¹² Kugarakngake le sangamberi sopak oinan Nil, samba masikau polak nenda ka kabei sirimanua sikatai, lepa masisubuake polak nenda samba sangamberi sibabara kabagania ka paneteiat sirimanua siooiake. Aku, Tuhan, masikua.

¹³ Kise te tiboiet Tuhan Taikamanua: Kusubuake le sangamberi bulungan samba masisappruake buluat sibara ka Memfis; taan babara sipuute ka polak Misir samba Kubaraake le sedda pulotokat.

¹⁴ Kusubuake le Patros samba masibaraake obengan ka Soan samba masikau ukuman ka Tebe.

¹⁵ Kubelaake le geti goluKu ka Sin, irip Misir samba masitataake pukayoat Tebe.

¹⁶ Kubaraake le obengan ka Misir, muloto le geti Sin samba Tebe raoppu le geti samba leu kekrenia turaragat le.

¹⁷ Tailainge tai On samba Pi-Beset matei le geti ka lanjau samba sangamberi tainanalep tuambmit le sia tangsiakenen.

¹⁸ Gogoi ibailiu le magepgep ka Tahpanhes kateteret Kubakbakake geget Misir sedda samba leu puukkanan tubunia, sibaraakenen puroronnia, tulepaake. Laggai nenda itabbo le geti tanai rusa samba tatogania tainanalep tuambit itutangsiake.

¹⁹ Kuorakake le ukuman ka Misir samba agairangan getinia Aku te Tuhan.”

Kalepakat geget Misir

²⁰ Ka rura sikapulusara, ka laggo siboiki, ka gogoi sikapitu laggo nenda, oi tiboiet Tuhan katubukku:

²¹ “Ale togat sirimanua, Akubakbakakean kabei puroron Parao, rimata Misir, samba itco, kabeinia ta atuappra bule imale minca, taanai sikau pasiappra bule imaron minca masisaiokake lanjau.

²² Kalulut nenda kise te tiboiet Tuhan Taikamanua: Itco, Aku ibailiu saggak Parao, rimata Misir, samba Kubakabakake le kabeinia, simaron samba simababakbak, samba Kubeleake le lanjau ka kabeinia.

²³ Kusaragaiake le geti tai Misir katalagat bangsa samba masisaragaiake sia ka sangamberi laggai.

²⁴ Kuronake le geti kabei rimata Babel samba masikau lanjauKu ka kabeinia, tapoi Kubakbakake le kabei Parao samba mukatci le kamatat rimata Babel kele sirimanua sipumauju sabeu.

²⁵ Bulatnia, Kuronake le kabei rimata Babel, tapoi kabei rimata Parao bele le ituulei. Agairangan getinia Aku te Tuhan, kateteret Kukau lanjauKu kakabei rimata Babel samba saiokakenangannia isaggangi polak Misir.

²⁶ Kusaragaiake le tai Misir katalagat bangsa samba masisaragaiake sia ka sangamberi laggai. Agairangan getinia Aku te Tuhan.”