Jehz. 3 - BUKO SIPUNENAN

¹ Kuanangan katubukku: “Ale togat sirimanua, kom aponia siitconu sene; kom buko situpupurut nene samba kenan nupanibo ka muntogat Israel.”

² Iageti nganga'akekungan ngungungku samba akenangan buko situpupurut nenda kukomnia.

³ Iageti kuanangan katubukku: “Ale togat sirimanua, kom buko situpupurut siakeKu nene katubum samba guruake buko nene ka balugunu.” Lepa komkungannia samba nanamnia kele suat mani.

⁴ Kuanangan katubukku: “Ale togat sirimanua, kenan samba ailiake muntogat Israel samba segeake sangamberi tiboietKu katubutda.

⁵ Kalulut ta atukoiniake ekeu ka sara bangsa sipunganga bagei samba simaoru' jalai, tapoi ka muntogat Israel le;

⁶ ta ka sangamberi bangsa sipunganga bagei samba simaoru jalai, sitaigaiaetnu nganganda. Ke Kukoiniake ekeu ka bangsa kele kisedda, raarepi te ekeu.

⁷ Tapoi muntogat Israel ta raoba raarepi ekeu, kalulut ta raoba masiarepi Aku, kalulut sangamberi muntogat Israel makela patuat samba ta mareddet.

⁸ Itco, Kuronake le patuatnu nusaggangi sia simakela patuat samba masiake gege kekeu nusaggangi taimareddetda.

⁹ Kele bukku intan, bulat simakela bele peile bukku Kuronnake le patuatnu; bui numaloto katubutda samba bui ipugeret tubum nuitco pumataatda, kalulut sia nene iate muntogat simakela patuat.”

¹⁰ Kuanangan minca katubukku: “Ale togat sirimanua, lelekake sangamberi tiboietKu Kuanenku katubum samba kau nuarepinia.

¹¹ Kauan, kenan samba ailiake sangamberi sirimanua siribbaiakenen, sabangsam, panibo samba kua katubutda: Kise te tiboiet Tuhan Taikamanua; ele raarepi ele ta raarepi.”

¹² Iageti akkatakenangan aku Ketcat nenda, samba arepkungan sara nganga sipugogong sabeu ka teiteiku, oto pulatsanan Taikamanua aitusasakai kapata barania ka kudduatnia,

¹³ iate nau sangamberi kappora sipungongoingoi sipabebekbek, samba leu nau juluk roda nenda, sara nganga sipugogong sabeu.

¹⁴ Akkatnakenangan aku Ketcat nenda samba ambitnangan aku, samba tuitui aku kabagat oloi patuat samba taimaarau patuat, kalulut ronnia aiubbuake aku geget Tuhan.

¹⁵ Kisedda te akuei ka sangamberi sirimanua siribbaiakenen sikuddu kabebet oinan Kebar ka Tel-Abib samba kuddu aku katalagatda kabagat kisei kabaga pitu ngagogoi burunia.

Jehezkiel tusogai ibailiu sipasijago Israel

¹⁶ Kalepat pitu ngagogoi panibonangan Tuhan katubukku:

¹⁷ “Ale togat sirimanua, Akuteuakean sibailiu sipasijago muntogat Israel. Ke nuarep sara tiboiet sibara kaKu, paredep sia kabagat oningKu.

¹⁸ Ke manibo Aku ka sirimanua sikatai: Bulat tuukumake le ekeu simateiakenen! Tapoi ta anuparepdepnia samba ta anukua aponia pa nuparepdep sirimanua sikatai ka pukakatainia, bule imariuriu ipurimanua. Sirimanua sikatai nenda matei le nia kabagat puseleatnia, tapoi Kutitiddou le silit engania katubum.

¹⁹ Tapoi ke nuparepdep sirimanua sikatai nenda samba ta igagalakake pukakatainia samba galai tubunia sikatai, matei le nia kabagat puseleatnia, tapoi anuarauakean engam.

²⁰ Ke sara sirimanua simatopit ikaddiuake putotopitnia samba galainangan patajuat, samba galakkungan bukku pasisoksok kamatania, matei le nia. Kalulut ta anuparepdepnia, matei le nia kabagat jonia samba sangamberi sigalainiakenennia simaeru taan turerepdep, tapoi kutitiddou te silit engania katubum.

²¹ Tapoi ke nuparepdep sirimanua simatopit nenda bule bui igalai jo samba bulatnia ta aigalai jo, murimanua le nia simariuriu, kalulut ioba masiarepi nganturat, samba anuarauakean engam.”

Jehezkiel ibailiu taiagai manibo

²² Iageti salukinangan aku sedda geget Tuhan samba panibonangan katubukku: “Suruake ekeu samba kenan ka simasu'su, sedda te Kupaninibo katubum.”

²³ Tusurukkungan samba ei aku ka simasu'su; bulatnia makoinongnangan sedda pulatsanan Tuhan kele pulatsanan siitcoku kabebet oinan Kebar, samba purekkukkungan.

²⁴ Tapoi tugurunangan Ketcat katubukku samba rioakenangan aku, lepa panibonangan katubukku, kuananganNia: “Toiliake ekeu, kudduake ekeu kabagat lalepnu.

²⁵ Samba ekeu, togat sirimanua, bulatnia te, tuappraake samba tuluplupake te ekeu, bailiu taioinangan nubela samba nutuguru katalagatda.

²⁶ Samba Kugagalai te jalainu ituettet kabagat lakkut ngangam, bailiunangan ekeu sitaigai manibo samba taan nupakukuaiji sia, kalulut sia iate muntogat sumakela patuat.

²⁷ Tapoi ke manibo Aku katubum, Kububukaake te ngungum samba kuanungan geti katubutda: Kise te tiboiet Tuhan Taikamanua. Sirimanua sioba masiarep, eddangan ipasiarep; samba sirimanua sitaipuletseinia, eddangan ta ipuletseinia, kalulut sia iate muntogat simakela patuat.”