Jehz. 29 - BUKO SIPUNENAN

Patuptuman masisaggangi Misir samba si Parao

¹ Ka rura sikapulu, kabagat laggo sikapulu, ka gogoi sikapulurua laggo nenda, oi tiboiet Tuhan katubukku:

² “Ale togat sirimanua, ipoake matam katubut Parao, rimata Misir, samba pupatuptup masisagganginia samba sangaliot Misir.

³ Panibo samba kua: Kise te tiboiet Tuhan Taikamanua: Itco, Aku ibailiu saggaknu, ale Parao, rimata Misir, sikoinan sabeu, sipeperep katalagat sopak oinannu, iate Nil, samba sipasikukua: bagat oinan Nil aku sibakkatnia, aku le aigalainia.

⁴ Kukau le kilikili ka bakklam samba masigalai iba kabagat sopak oinannu ipuetet ka susrum. Kuakkatake le ekeu katalagat bagat sopak oinannu pasamba senengamata iba ka sopak oinan nenda muettet ka susrum

⁵ samba Kuribbaiake le ekeu ka kudduat simatangeu, bulatnia, ekeu pasamba sanengamata iba ka sopak oinannu. Bele ekeu ka kudduat simalio samba ta raala ekeu ele turateiake. Kukau le ekeu ibailiu komen tarimeu sibebela samba uma' ka manua

⁶ samba agairangan getinia sipulaggai ka Misir Aku te Tuhan. Kalulut ekeu kele tutura manggeak ka muntogat Israel:

⁷ kateteret rarape ekeu, mabakbaknungan nutuulei samba paujunungan ta'tara sangamberitda; samba kateteret arapuaddai katubum, mabakbaknungan samba galainungan ipare're sia sangamberitda.

⁸ Kalulut nenda kise te tiboiet Tuhan Taikamanua: Bulatnia, Kugalai le ioi lanjau katubum samba masimateiake sirimanua samba tarimeu katubum,

⁹ bailiunangan polak Misir simatangeu samba ibailiu siragatat. Samba Agairangan getnia Aku te Tuhan. Kalulut ekeu masikua: bagat oinan Nil aku sibakkatnia, aku le aigalainia,

¹⁰ oto bulatnia, Aku ibailiu le saggaknu samba saggakra sangamberi sopak oinannu samba Kubailiuake le polak Misir ibailiunia karagatat samba ibailiunia simatangeu barania ka Migdol pat aili ka Siene, samba leu pat aili ka pasongan polak Etiopia.

¹¹ Berisara sirimanua sienunginia, beringan leu sangamuneng tarimeu ta ienungi samba polak nenda ta tukukudduiji epat pulungarura burunia.

¹² Kubailiuake le geti polak Misir simatangeu katalagat sangamberi laggai sisubuakenen samba sangamberi kupkumen laggainia ibailiu le geti matangeu katalagat laggai sibukkatakenen epat pulungarura burunia. Kusaragaiake le geti tai Misir katalagat bangsa samba masisaragaiake sia ka sangamberi laggai.

¹³ Kalulut kise te tiboiet Tuhan Taikamanua: Ka pangampulat rura sikaepat pulu nenda, Kururuake le tai Misir sibara katalagat bangsa katusaragaiatda.

¹⁴ Samba Kupaeru le geti purimanuaiat Misir samba masitoiliake sia ka polak Patros, iate polak kabaraiatda, samba sedda bailiunangan sia purimataat sitaimaron.

¹⁵ Bailiunangan getinia purimataat bulat sitaimaron katalagat sangamberi purimataat samba tamomoi ibuakngake tubunia minca ka bangsa bagei. Kugalai le sia geti bulat sitaimaron, bailiu taan rapaparentaake bangsa bagei.

¹⁶ Tai Misir raan arakatonemi muntogat Israel, siparepdepake puseleat Israel, ke toili tai Israel katubutda ratiddou paroman. Samba agairangan getinia Misir Aku te Tuhan Taikamanua.”

Misir ibailiu upat Nebukadnezar

¹⁷ Iageti ka rura sikarua pulupitu, ka laggo siboiki, ka gogoi sikasara laggo nenda, oi tiboiet Tuhan katubukku:

¹⁸ “Ale togat sirimanua, Nebukadnezar, rimata Babel, masikoiniake saladdunia mugalai simaron masisaggangi Tirus; sangamberi ute amagulukngan samba sangamberi ta'ta ailutcungan, tapoi nia samba leu saladdunia ta abara uktuk sibara ka Tirus kabagat aisagganginia.

¹⁹ Kalulut nenda kise te tiboiet Tuhan Taikamanua: Kukau le polak Misir katubut Nebukadnezar, rimata Babel, samba iambit le pukayoatnia; igalaiake le parauraugat samba masipaalaki aponia pa samba nenda te upatda saladdunia.

²⁰ Kukau le geti katubunia polak Misir sibailiu upa ka galajet sigalaiakenennia, kalulut amugalaian sia kaKu, kise te tiboiet Tuhan Taikamanua.

²¹ Ka gogoi nenda Kutu'tuake le minca ban ka muntogat Israel samba tugalai ekeu ioi nupanibo minca katalagatda. Agairangan getinia Aku te Tuhan.”