Jehz. 28 - BUKO SIPUNENAN

Patuptuman masisaggangi rimata Tirus

¹ Iageti oi tiboiet Tuhan katubukku:

² “Ale togat sirimanua, kua katubut rimata Tirus: Kise te tiboiet Tuhan Taikamanua: Kalulut aibailiu ekeu mabuak patuat, samba masikua: Aku iate Taikamanua! Muuddet le Aku ka uddenan purimaat Taikamanua katalagat koat simalio. Tapoi sibulatnia sirimanua le ekeu, ta Taikamanua, kenanen patuatnu masikau tubunia makere kele Taikamanua.

³ Kirenangan masiku patuatnu bele peile sikut patuat Daniel; taanai keleat atusakkeri kekeu.

⁴ Kabagat sikut patuatnu samba puaagainu kolou sesenungan pukayoat. Mas samba perak nururuake kabagat pangoirikat pukayoatnu.

⁵ Kalulut bulat maagai ekeu ka pasisasakiake igiakenungan pukayoatnu, samba kalulut nenda bailiunangan ekeu simabuak patuat.

⁶ Kalulut nenda kise te tiboiet Tuhan Taikamanua: Kalulut patuatnu masikau tubunia kele Taikamanua

⁷ oto, bulatnnia te, Kuambit le sirimanua sioiake masisaggangi ekeu, iate bangsa bulat sikatai, sipasioppat lanjaura, masisaggangi sikut patuatnu bulat umunakenen; samba pulaingeannu tulolitake.

⁸ Tugorosotake le ekeu ka lobok ratei, matei ekeu kele sirimanua simamatei simateiakenen katalagat koat simalio.

⁹ Nukukua peile pa kamatat simateiake ekeu: Aku iate Taikamanua? Tapoi sibulatnia ka geget sipasipupunu ekeu ekeu iate sirimanua, ta Taikamannua.

¹⁰ Matei le ekeu kele sirimanua sitaipususunat ka kabeira sirimanua siooiake. Kalulut Aku le amasikua, kise te tiboiet Tuhan Taikamanua.”

Urai sougeri pagalaiat rimata Tirus

¹¹ Iageti oi tiboiet Tuhan katubukku:

¹² “Ale togat sirimanua, tiboake sara sougeri pagalaiat rimata Tirus samba kua katubunia: kise te tiboiet Tuhan Taikamanua: Tularat katumuinekatnu, masun sikut patuat samba bulat malainge.

¹³ Ekeu ka mone Eden, iate monen Taikamanua masun senengamata bukku pulaingean simakeppu saki: jaspis simabonan, krisolit samba jaspis simalimun, pulaingean pirus, krisopras samba nefrit, lazurit, bukku simabonan samba malakit. Kudduat pasigalangannia tugalai sibara ka mas samba tutarekngake ka gogoi aitubaraake ekeu.

¹⁴ Kuake kudduatnu kabebet tularat malaika sipujajago, ai ekeu ka leleu sipunenan Taikamanua samba mugejek katalagat bukku siputotoro.

¹⁵ Matopit ekeu kabagat paraboatnu barania peile ka gogoi aitubaraake ekeu pat bara patajuat katubum.

¹⁶ Kabagat pasisakiatnu sabeu masun le ekeu pukakatai samba nugalaiake le jo. Oto Kuribaiake le ekeu sibara ka leleu Taikamanua samba tularat malaika sipujajago masisubuake ekeu sibara katalagat bukku siputotoro.

¹⁷ Mabuak le patuatnu kalulut laingen tubum, sikut patuatnu subuakenungannia kalulut pulalaingem. Ka polak Kuribbaiake ekeu, katubutda tai rimata Kukau ekeu ibailiu ibbungen matatda.

¹⁸ Kabagat iginia puseleatnu samba patajuat kabagat pasisakiatnu nupasabau le pusisipunenan kudduatnu. Oto Kuobekngake le obengan katalagam sipasilabo ekeu nutata. Samba Kuobaake le ekeu sibailiu abu ka polak kamatat sangamberi sirimanua sipasiitco ekeu.

¹⁹ Sangamberi katalagat bangsa siagai ekeu tuge'ge masiitco purimanuaiatnu. Kalepakat purimauaiatnu kalotoakenen samba tata' ekeu teret buruburu.”

Patuptuman masisaggangi Sidon

²⁰ Iageti oi tiboiet Tuhan katubukku:

²¹ “Ale togat sirimanua, ipoake matam katubut Sidon samba pupatuptup masisagganginia

²² samba kua: Kise te tiboiet Tuhan Taikamanua: Itco, Aku ibailiu le saggakmui, ale Sidon, samba Kupatoila le pulatsananKu katalagamui. Samba agairangan getinia Aku te Tuhan, kateteret Kuorakngake ukuman katubunia samba masipakoinong pusisipunenanKu katubunia.

²³ Kubaraake le besi' simasappo katubunia samba logau muguruk le geti ka sangamberi enungannia samba matei le sirimanua mutagguilu katalagatda kalulut lanjau siooi sibara kabebenia sisagganginia. Samba agairangan getinia Aku te Tuhan.

²⁴ Taan babara minca ka muntogat Israel sibara ka pabebeakenennia sipaloloi sia, sibailiu rui sipasikakkak ele rui simaraka. Agairangan getnia Aku te Tuhan Taikamanua.

²⁵ Kise te tiboiet Tuhan Taikamanua: Kateteret Kururuake muntogat Israel sibara katalagat suku bangsa, kudduat katusaragaiatda samba Kupatoila le pusisipunenanKu katubutda kamatatda tai bangsa, oto pukuddurangan geti ka polakra sikauKu katubut paguguletKu si Jakob.

²⁶ Mukuddu le sia kabagat pusanangan, ragalai le lalepda samba monen aggurda. Bulatnia te, mukuddu le sia kabagat pusanangan kateteret Kuorakngake ukuman ka sangamberi pabebeakenennia sipaloloi sia. Agairangan getinia Aku te Tuhan, Taikamanuanda.”