Jehz. 27 - BUKO SIPUNENAN

Urai sougeri pagalaiat Tirus

¹ Iageti oi tiboiet Tuhan katubukku:

² “Ale togat sirimanua, tiboake sara sougeri pagalaiat Tirus,

³ samba kua katubut Tirus, sikuddu ka matatbaliu gugurukat ka koat, samba sipasisasakiake pasamba tai bangsa ka puriringan: kise te tiboiet Tuhan Taikamanua: Ale Tirus, ekeu masikua: aku kapa' bulat simalainge.

⁴ Kudduatnu ka tengan koat simalio; siagai mugalai ragalai makapplu pulaingeannu.

⁵ Ragalai le sangaliot tubum sibara ka loina sanobar Senir, alarangan pinilok Libanon galairangan pangaraitatnu.

⁶ Loina tarbantin sibara ka Basan tupakei sibailiu lugam; galairangan bagam sibara ka ban pagalakrangannia ka pinilok sibara ka bebet koat Kitim.

⁷ Galairangan lajom sibara ka komak juto simaalit baga simagurik sibara ka laggai Misir; iate toggaiatnu. Samba tugalai sapounu sibara ka komak simasurou tubu samba komak simakasurou tubu sibara ka bebet koat Elisa.

⁸ Tai Sidon samba tai Arwad ibailiu sipasilulugai ekeu; sipugagalainu, ale Tirus, aisia katubum, ibailiu le sia kekeu siagai mukoat.

⁹ Sikebbukat laggai Gebal pasamba siagai kabei ai sia katubum sipaeru simakakatai kekeu. Senengamata kapa' ka koat pasamba sipugagalai kabagania musao katubum raoba masisailiake bibilet sakiakenenda.

¹⁰ Tai Persia, Lud samba Put, sibailiu saladdum aisia kabagat mungkuat saladdum. Korabbi samba tutu pasaggak tutoakngake katubum; ratuppai le pulaingeannu.

¹¹ Tai Arwad samba saladdunia mangarai le sia ka uddut kekrem ka sangalionia samba tai Gamad ka uddut pujagoatnu; ratoakngake le sangamberi korabbira ka sangaliot kekrem, ragalai le imakapplu pulaingeannu.

¹² Tarsis mupasaki pasamba ekeu ka senengamata pukayoat simigi; rasailiake le perak, laba', ragguk simabulau samba ragguk simapusu silit bibiletnu.

¹³ Jawan, Tubal samba Mesekh mupasaki pasamba ekeu; rapasailiake le pagugulet, bibilet tembaga silit bibilet sakiakenennu.

¹⁴ Sibara ka Bet-Togarma rasailiake le kuro kereta, kuro pakeiet samba bagal silit bibiletnu.

¹⁵ Tai Rodos mupasaki pasamba engkau, maigi kudduat bebet koat ibailiu kudduat pasisakiatnu; raambit le katubum ban samba loina simapusu sibailiu upeti.

¹⁶ Edom mupasaki pasamba ekeu kalulut iginia puuktungannu; rasailiake le pulaingean bukku logau, komak simakasuraou, bibilet simagurik, komak juto simaalit baga, barabbak samba bukku delima silit bibiletnu.

¹⁷ Jehuda samba polak Israel mupasaki pasamba ekeu; rasailiake le gandum sibara ka Minit, mur, suat mani, tula samba balsam silit bibilet sakiakenennu.

¹⁸ Damsyik mupasaki pasamba ekeu kalulut iginia puuktungannu, kalulut senengamata bibiletnu simigi. Anggur sibara ka Helbon, bulut biribiri sibara ka Sakhar,

¹⁹ samba anggur rasailiake silit bibiletnu; laba' silepa galai sibara ka Uzal, loina teja samba kole ai katalagat bibilet sakiakenennu.

²⁰ Dedan mupasaki pasamba ekeu masisakiake kulit uddenan tupukuro.

²¹ Arab samba siabeu tiboi tubu ka Kedar mupasaki pasamba ekeu masisakiake togat biribiri, biribiri simanteu samba kambing simanteu; kabagat sangamberi nenda te rapasaki katubum.

²² Sipasisasakiake tai Syeba samba tai Raema mupasaki pasamba ekeu; rasailiake le bulat simaeru senengamata pusinginan samba senengamata bukku pulaingean simakeppu saki samba mas silit bibiletnu.

²³ Haran, Kane, Eden, Asyur samba Kilmad mupasaki pasamba ekeu.

²⁴ Mupasaki le sia ka pasisakiatnu masisakiake leppei sabeu bulat simalainge, komak simasurou tubu, bibilet simagurik, permadani simagurik samba tali pamutre simaron.

²⁵ Sangamberi kapa'ra tai Tarsis masiambit bibilet sakiakenen nene kekeu. Masun abangen simasane' ekeu ka talagat koat simalio.

²⁶ Ka koat simalio rambit ekeu sipasilulugai ekeu. Tapoi rusa talabari sikalaut iorak ekeu katalagat koat simalio.

²⁷ Pukayoatnu, bibiletnu, sakiakenennu, sipugagalai ka kapa'nu samba sirimanua kekeu siagai mukoat, siagai galajet samba sipasisasakiake pasamba sangamberi saladdum sibabara ka tubum, bulatnia, pasamba sangamberi sipasitutut kapa'nu, maloulou kabagat koat simalio ka gogoi kaloulougatnu.

²⁸ Masiarep gereira siagai mukoat pugeretnangan polak ka kapi'.

²⁹ Tugorosotrangan baratda ka kapa'ra, sangamberi sipasilulugai. Sipugagalai ka kapa', siagai mukoat sangamberitda mei le sia ka kapi'.

³⁰ Maron le saougeri, soga simapongit rapaarep le katubum; masikau abu ka ute, masipaguilu tubu tubu kabagat abu.

³¹ Gulukrangan tubutda, kalulut ekeu, samba masibolitake komak pureureugat baga; pusourangan, ketcat mangorik, kalulut ekeu; sara sougeri simapongit.

³² Kabagat pusosougeri kalulut ekeu tiboakerangan, rasoibiake sougeri: Kasei kele Tirus, silepa tusubuake katalagat koat simalio?

³³ Kalepat aioi bibiletnu sibara ka koat Nupaektek le bangsa simigi, kabagat iginia pukayoatnu, sakiakenennu pakayonungan tai rimata ka polak.

³⁴ Kineneiget tupakatai ekeu samba tutataake ka uddut koat samba maloulou ka saisai koat; sakiakenennu samba sangamberi situt kapa'nu maloulou pasamba ekeu.

³⁵ Sangamberi sirimanua ka puriringan tuge'ge raitco ekeu; sangamberi rimatatda mugeret tubu kalulut lopot, pumataatnia mukutcut.

³⁶ Mupiau le tai bangsa katubum, kalepakat purimanuaiatnu kalotoakenen, samba tata' ekeu teret buruburu.”