Jehz. 26 - BUKO SIPUNENAN

Patuptuman masisaggangi Tirus

¹ Ka rura sikapulusara, ka laggo siteuakenen, ka gogoi sikasara laggo nenda, oi tiboiet Tuhan katubukku:

² “Ale togat sirimanua, kalulut Tirus masikua pagalaiat Jerusalem: Sura'! Amakataia matatbaliura tai bangsa nenda; toili le nia geti katubukku, bailiunangan aku simasun, tapoi ibailiu le nia siragatat.

³ Kalulut nenda kise te tiboiet Tuhan Taikamanua: Itco, Ibailiu Aku saggaknu, ale Tirus. Kukoiniake le ratusuru maigi bangsa masisaggangi ekeu, kele koat sibaraake lektuknia.

⁴ Rasubuake le geti sangamberi irip Tirus samba masibukkatake pujagoatnia, Kuribbaiake le abut polaknia pat malinanangan katubunia samba Kubailiuake le nia leleu bukku simaguluk.

⁵ Ibailiu le nia geti panuluat jarik katalagat koat, kalulut Aku amasikua, kise te tiboiet Tuhan Taikamanua; ibailiu le nia geti rauraugetda tai bangsa.

⁶ Samba tatogania tainanalep, sikuddu ka simagaktuk ramateiake le geti sia pasamba lanjau. Samba agairangan getinia Aku te Tuhan.

⁷ Kalulut kise tiboiet Tuhan Taikamanua: Bulatnia, Kuambit le sibara ka bare rimata Nebukadnezar, rimata Babel, rimata sangamberi rimata bule rasaggangi Tirus pasamba masipakei kuro, kereta, saladdu sipukukuro, samba sangarurukat saladdu simaigi.

⁸ Tatogam tainanalep sikuddu ka simagaktuk imateiake le sia pasamba lanjau, itabbui le irip pasialougat, masipagalak, pasitukklu samba masikau korabbi rasaggangi ekeu.

⁹ Situtdukat pasitukklu nenda ratukkluake le ka sangamberi iripnu samba ka sangamberi pujagoatnu rabukkatake le geti pasamba sangamberi balioknia.

¹⁰ Kuronia bulat maigi, bailiu tabbonangan ekeu abu; kalulut nau bakkou saladdunia sipukukuro samba tangat roda keretania pugeretnangan leu sangamberi iripnu, ke iguruki sangamberi matatbaliunu kele raguruki sirimanua laggai situnganga'nga kalulut pasitukklu.

¹¹ Pasamba reret sangamberi kuronia ioba ipaperaki sangamberi enungannu, imateiake le geti taikaumam pasamba lanjau, samba sangamberi tularat karoakenennu tubukkatake le ka polak.

¹² Raparauraugi le geti pukayoatnu samba rapaalaki sangamberi bibilet sakiakenennu; rabukkatake le sangamberi iripnu samba rabukkatake sangamberi lalepnu simalainge, bukkunu, loinanu samba polaknu turibbaiake le geti ka oinan.

¹³ Kulepaake le gaugau urainu samba nau kecapim samba taan maarep.

¹⁴ Kubailiuake le ekeu leleu bukku simaguluk samba kalulut kisedda ibailiu le geti ekeu panuluat jarik, bailiu taan tugagalai ekeu minca, kalulut nenda, Tuhan le amasikua, kise te tiboiet Tuhan Taikamanua.

¹⁵ Kise te tiboiet Tuhan Taikamanua katubut Tirus: Ta pa mugegeret tubu bebet koat masiarep nau kabelekatnu, ke mukatci sirimanua siputatagguilu kalulut pamamatei katalagamui?

¹⁶ Sangamberi sikebbbukatda tai bangsa sikuddu ka bebet koat tuepe le puririmatatda samba raareuake le leppei samba ragolok le leppeira simagurik. Isaluki le sia katugegekat samba mukuddu ka polak; bulat muloto samba tuge'ge le sia raitco ekeu.

¹⁷ Ratiboake le geti sara sougeri pagalaiat ekeu samba masikua katubum: Kipa kekeu, ale laggai umunakenen, mapepe ka koat, laggai sipuute ka koat, ekeu pasamba silaggaiji ekeu, sibaraake pulotokat ka sipulaggai ka polak?

¹⁸ Kineneiget, puriringan bebet koat bailiu muloto ka gogoi kabelekatnu, bulatnia, puriringan kabebet koat mugaugau masiarep kalepakatnu.

¹⁹ Kalulut kise tiboiet Tuhan Taikamanua: Kateteret Kubailiuake ekeu laggai simararagat, kele laggai sitaanai sikudduijinia, ke Kukeruake oju koat simalio katubum samba oinan simigi sitabbo ekeu,

²⁰ oto Kugorosotake le ekeu, bule sambamui sedda pasamba sirimanua situgogorot ka lobok ratei katubut bangsa siburu. Kugalai le ekeu nukuddu ka polak bulat ka tei kele simararagat siburu, pasamba sirimannua situgogorosot ka lobok ratei, bule bui' rakudduiji ekeu minca sirimanua, samba bui' nuei minca ka laggaira sirimanua sipuririmanua.

²¹ Kuteuake le kekeu kalepakat puririmanuam bulat kalotoakenen samba taan tuaaili ekeu. Ragaba le ekeu sirimanua, tapoi taan tusesese ekeu teret buruburu, kise te tiboiet Tuhan Taikamanua.”