Jehz. 24 - BUKO SIPUNENAN

Pasikat koali simakaop

¹ Ka rura sikasiba, ka laggo sikapulu, ka gogoi sukapulu laggo nenda, oi tiboiet Tuhan katubukku:

² “Ale togat sirimanua, suratnake gogoi ka gogoi nene, bulatnia, gogoi ka gogoi nene. Ka gogoi nene leuet rimata Babel masitadaake masisaggangi Jerusalem.

³ Tiboake sara pasikat ka muntogat simakela patuat samba kua katubutda: Kise te tiboiet Tuhan Taikamanua: Galakngake koali ka uddut obengan, galakngake, samba uruake leu oinan kabagania;

⁴ kau tipput akkula kabagania, sangamberinia tipput akkula simaeru, bakkapat samba teiteinia; sunake nenda patolattolat sipili.

⁵ Ala biribiri sipili, samba pagalak loina ka teinia, eddangan igokgok seuket nenda samba imame'me sangamberi tolat kabagania.

⁶ Kalulut nenda kise te tiboiet Tuhan Taikamanua: Paan te laggai simasun utak logau, koali simakaop kabagania samba kaopnia ta sasappru katubunia! Belaake senen tippunia kabagania, bui' nupilinia.

⁷ Kalulut logau sipiliakenennia aipeile ka katalagania; aipiliake ka uddut leleu bukku siguluk. Ta aipiliake ka uddut polak, bule itabbonia pasamba polak.

⁸ Kalulut golu sibebela samba lumun sitususuru Kupiliake le logaunia ka uddut leleu bukku siguluk bule bui' itutabbo.

⁹ Kalulut nenda kise te tiboiet Tuhan Taikamanua: Paan te laggai simasun utak logau! Kuoba leu masibeuake kudduat abunia.

¹⁰ Pagalak loina simigi, obekngake obengan, eddangan bulat imara' akkulania, ribbaiake suania samba eddangan imakasak tolatnia.

¹¹ Galakngake pariok nenda sitakabaga ka uddut bot obengan, bule itulabo nenda samba ibailiu mabonan tembagania, bailiu mabubunangan simalolitnia kabagania samba isappru kaopnia.

¹² Mubesi' tubu le Aku siboboi, kalulut kaopnia simakeppu ta sasappru katubunia, kenanen ka obengan.

¹³ Kalulut anupalolit poi tubum ka paeletnu, samba Kuoba masilinaake ekeu, tapoi ta amalina ekeu ka pulolinannu, oto taan tulilinaake ekeu, teret Kubelaake goluKu katubum.

¹⁴ Aku, Tuhan, amasikua. Momoi te pagalaiat nenda, samba Aku te igagalaiakenia. Ta Kupuaraknia samba ta manununtu bagakKu, samba ta iolei bagakKu. Kuukum le ekeu siripot sigalainu, kise te tiboiet Tuhan Taikamanua.”

Kamateiat sikalalep Jehezkiel sibailiu pasikat katukataikat Jerusalem

¹⁵ Iageti oi tiboiet Tuhan katubukku:

¹⁶ “Ale togat sirimanua, itco, Kuoba masiala katubum nia bulat simanuntu bagaKu kele siorak pateleiat, tapoi bui' nupusou geri ele nupusou samba bui' nubelaake elum.

¹⁷ Sitangeu le nupuhoihoi, bui' nubaraake sougeri kamateiat; bolitake sorot ute samba pakei tarangainu, bui' nutabbo matam samba bui' nukom roti pureureugat baga.”

¹⁸ Simanseman panibokungan katubutda bangsa nenda samba ka soibonia matei sikalalepku. Simanseman minca galaiakekungan kele siparentaakenen katubukku.

¹⁹ Oto bangsa nenda masikua katubukku: “Ta pa nuoba masipaagai katubumai, aponia katukolobatnia kakai, nugalaiake kisedda”

²⁰ Lepa alegikungan sia: “Amoian tiboiet Tuhan katubukku:

²¹ Kua ka muntogat Israel: Kise te tiboiet Tuhan Taikamanua: Bulatnia te Kupalolit le geti kudduat sipunenanKu, puaabeu karoakenennu, nanam ka matam samba ketcatnu; samba tatogam taimanteu samba tainanalep sikaddiuakenennu matei le sia ka lanjau.

²² Nugalaiake le kele sigalaiakenenku: Ta nutatabo matam samba ta nukokom pureureugat baga, ta nukokom,

²³ utenu sibarasorot samba rerem masipakei tarangai; samba ta musosou ekeu ele musougeri. Tapoi mabubu le ekeu kabagat ukumannu, samba muhoihoi le kam ka pasasambamui.

²⁴ Kisedda te si Jehezkiel aibailiu pasikat kakam; kele sigalaiakenennia nugagalaiake te kam. Ke amuailingan nenda, oto agaimuiannia, Aku te Tuhan Taikamanua.

²⁵ Ekeu, togat sirimanua, ta pa kisene muaaili? Ka gogoi Akuala iripda katubutda, pulaingeannia siangkaake bagania, nanam matania samba repdemen ketcatnia, tatogania taimanteu samba tainanalep,

²⁶ ka gogoi nenda momoi te sara sirimanua sibebela masiambit katuagaiat katubum.

²⁷ Kateteret nenda tubukanangan ngungungku samba panibokungan ka sirimanua situarau nenda samba amoian kupanibo. Oto kisedda bailiunangan ekeu pasikat ka sia samba agairangan getinia, Aku te Tuhan.”