Jehz. 23 - BUKO SIPUNENAN

Kebbubagi si Ohola samba si Oholiba

¹ Iageti oi tiboiet Tuhan katubukku:

² “Ale togat sirimanua, ai rua tainanalep, togat sara ina.

³ Muolop tubu le sia ka Misir, muolop tubu le sia kateteret sibau tubu sia; rapapetcuni le sedda tottotda samba raparapeiji le pusiokkonia.

⁴ Onin sikebbukat iate Ohola samba onin baginia iate Oholiba. Sia bebe Aku sibakkatnia samba sia nene masitu'tuake matat toga simanteu samba sinanalep. Pagalaiat oninda, Ohola iate Samaria samba Oholiba iate Jerusalem.

⁵ Si Ohola mupaelet, beringannia Aku sibakkatnia. Bulat mabotbot tubunia katubutda simanuntu bagania, ktubutda tai Asyur, simagege pasaggak,

⁶ muleppei komak simasurou, bupati-bupati samba saute, sangamberita tailainge simalainge tubu, saladdu sipukukuro.

⁷ Igalaiake le puoloman tubu katubutda, sangamberitda tai Asyur sipili; ilolitake le tubunia ka sangamberi sirimanua, ktubut kasei ipubotbot tubunia samba ka sabulungannia.

⁸ Ta aikaddiuake puoloman tubu sigalaiakenennia barania peile ka Misir, kalulut kateteret sibau tubunia peile arapaperepakeannia, samba raparapeiji le pusiokkonia samba masibelaake puoloman tubutda katubunia.

⁹ Kalulut nenda Kukau le nia kakabeira simanuntu bagania, ka kabeira tai Asyur, katubut kasei pa ipubotbot tubunia.

¹⁰ Nga'ngaakerangan kailaakenennia, tatogania taimanteu samba tainanalep tulaba samba nia tumateiake pasamba lanjau. Kalulut kisedda ratiboi le oninia katalagatda tainanalep kalulut atukauan ukuman katubunia.

¹¹ Kenanen aiitco pagalaiat nenda baginia, si Oholiba, mabotbot peile tubunia ka sia samba puoloman tubunia bele peile ka kebbunia.

¹² Mubotbot tubu le nia ka tai Asyur, ka tai bupati samba ka sautenia, ka simagege pasaggak sipuleppei simaeru, ka saladdu sipukukuro, sangamberita tailainge simalinge tubu.

¹³ Akuitco ilolitake tubunia; paraboatda ruatda makere le.

¹⁴ Tapoi itutuppai le puoloman tubunia: iitco le tularat taimanteu sitularani ka rupi, tularatda tai Kasdim, tutularani siputubu simapusu,

¹⁵ tengania tuappra pasamba akkik tenga, utenia masipakei sorot sipujajai, sangamberinia ituitco kele utet saladdu, simakere kele tai Babel sibara ka Kasdim, laggai putu'tukat matatda.

¹⁶ Simaruei le aiitconia pubotbotnangan tubunia katubutda samba koiniakenangan pakoinien katubutda ka polak Kasdim.

¹⁷ Iageti oi tai Babel katubunia masinanam parate pubotbonan tubu samba palolitrangannia kabagat puoloman tubutda; kalepat arapalolitnia, betunangan tubunia katubutda.

¹⁸ Kalulut aigalaiake puoloman tubunia ka simatoila samba ipakoinong kailaakenennia, oto reunanakekungan tubuKu kalulut sitsit katubunia, kele Kureunanake tubu ka baginia.

¹⁹ Igalaiake simaigi peile puoloman tubunia samba irepdep kateteret sibau tubunia, kateteret aipuolop tubu ka Misir.

²⁰ Mubotbot tubu le nia ka saaleinia simaolop tubu, kailaakenennia kele kailaakenen kalidei samba keikeietnia kele keikeiet kuro.

²¹ Makiddi le bagam paeletnu kateteret sibau tubum, kateteret raparapeiji ukduknu tai Misir samba rapaposaiji tottot puookkonu.

²² Kalulut nenda, ale Oholiba, kise te tiboiet Tuhan Taikamanua, kirenangan anuareuakean ka simanuntu bagam, tapoi bulatnia te, Kukoiniake le sia raoi masisaggangi ekeu; Kuambit le sibara kabebenu rasaggangi ekeu:

²³ tai Babel samba tai Kasdim, tai Pekod, tai Soa samba tai Koa, samba pasambatda sangamberi tai Asyurtailainge simalainge tubu, tai bupati samba sangamberi saute, sautet saladdu samba saladdu simagege pasaggak, sangamberitda saladdu sipukukuro.

²⁴ Moi le sia rasaggangi ekeu sangamberi kereta samba rodania samba sangamungkuat tai bangsa; rapagalak le korabbi sabeu samba sigoiso samba ketopong kabebenu masisaggangi ekeu, samba Kukau le pakaroat nene ka matania samba raukum le ekeu siripot surukatda.

²⁵ Kulumunake le geti tu'tut bagaKu katubum, bailiu galaiakerangan katubum kabagat oloi golu, asak samba talingam tutippu samba sirimanua sipulelegei katubum matei le ka lanjau. Ralaba le geti tatogam taimanteu samba tainanalep samba sirimanua sipulelegei katubum ilabo le obengan.

²⁶ Rabulutuni le ekeu samba raraurau sangamberi pulaingeannu.

²⁷ Kugalai le ekeu nuariake paeletnu samba puoloman tubum barania peile ka laggai Misir, bailiu taan nulilikki sia samba taan nurerepdep minca tai Misir.

²⁸ Kalulut kise te tiboiet Tuhan Taikamanua: Itco, Kukau le ekeu ka kabeira sirimanua simalaga bagam, kenanen anuareuakean tubum katubutda.

²⁹ Ragalaiake le katubum kabagat lagat baga samba raraurau sangamberi buat besit tubum samba rakaddiuake le ekeu sibulutut, bailiu matoilanangan keikeiet puoloman tubum. Paeletnu samba puoloman tubum

³⁰ sibaraake nene katubum, kalulut muolop tubu le ekeu kakabagat pasikakaroake tai bangsa samba masipalolit tubum ka sabulunganda.

³¹ Murimanua le ekeu masitut paraboat kebbunu, kalulut nenda Kuake le geti lo'nu sibara ka pulokatnia.

³² Kise te tiboiet Tuhan Taikamanua: Buita mulo le ekeu ka pulokat kebbunu, pulokat simakeru baga samba simalio ngungu, iate pulokat simaigi kabagania; ekeu ibailiu tutangsiake samba geigeit.

³³ Masun le ekeu pupuinengan samba reureu baga. Pulokat kalotoakenen sialei putameugat iate pulokat kebbunu Samaria.

³⁴ Lo'nungannia pasamba pokkainia, pat bolotnungan siragatatnia samba suruketakenungan tottotnu. Kalulut Aku le amasikua, kise te tiboiet Tuhan Taikamanua.

³⁵ Kalulut nenda, kise te tiboiet Tuhan Taikamanua: Kalulut anukalipogi poi Aku samba nukateiteiake Aku, kineneiget bairatle paeletnu samba puloman tubum.”

³⁶ Iageti panibonangan si Tuhan katubukku: “Ale togat sirimanua, nuoba leu masiukum si Ohola samba si Oholiba samba nupaagai katubutda sigalaiakenenda sikatai?

³⁷ Kalulut paelet le sia, mugorok le logai kakabeira samba paelet le sia kabagat masibuluiji subulungannia, beringan tatoga situ'tuakenenda bakkatKu rapanguruatake sibailiu buluakenen kabagat obengan katubutda sabulungannia sibailiu komen.

³⁸ Aipei bagei pagalaiat nene ragalaiake le katubukKu, rapalolit le kudduat sipunenanKu ka gogoi nenda samba masipasabau pusisipunenan gogoi SabatKu.

³⁹ Raja'ja le tatogatda uktuk sabulunganda, moi le sia ka gogoi nenda ka kudduat sipunenanKu samba masipasabau pusisipunenannia. Bulatnia, nene te aragalaiake kabagat lalepKu.

⁴⁰ Ratiddou le minca raoi sirimanua sibara ka kudduat simareunan rakoiniake pakoinien masisogai sia, samba bulatnia, moi le sia. Kalulut kaooira murau le ekeu simalina, masipusuake akkekeilunu samba nupalainge tubum pasamba pulaingeannu.

⁴¹ Mukuddu le ekeu ka parate simalainge sibara meja kamatania pasamba komen sitarekanenen; kaunungan kumanyangKu samba tulakKu ka uddut paratem.

⁴² Lepa maarepnangan lamau puririmanua simasanang katubunia samba ka sirimanua ka simigi sirimanua tuppainangan minca simapuinengen sibara ka kudduat simatangeu. Rapakei le letcu ka kabeira samba kirit pulatsanan ka utera.

⁴³ Kuakungannia: Igagalaiake peile pa paelenan ogo simalaju nene? Sirimanua muolop tubu katubunia.

⁴⁴ Moi le sia katubunia kele raailiake sinanalep simaolop tubu. Kisedda te raei katubut Ohola samba Oholiba bule ragalaiake paelenan.

⁴⁵ Tapoi raukumake le sia sirimanua bulat simatopit kele raukumake tainanalep sipaelet samba sipamamatei, kalulut sia iate tainanalep sipaelet samba kabeira mugorok le logau.”

⁴⁶ Kalulut kise te tiboiet Tuhan Taikamanua: “Eddangan ratusuru sangamungkuat sirimanua masisaggangi sia samba obaake sia ibailiu kalotoakenen samba raurauget.

⁴⁷ Rurukat sirimanua nene rapabaijungi le sia bukku samba rasaggri le lolokkatda pasamba lanjaura, masimateiake tatoga taimanteu samba tatogatda tainanalep samba laborangan itata sangamberi lalepda.

⁴⁸ Kuariake le paelenan ka polak nenda samba tainanalep ralelekngake le geti paasekat nenda samba taan ragagalaiake minca paelenan kele sigalaiakenenmui.

⁴⁹ Ralumunake le sirimanua paelenannu katubum samba buita nubairat sangamberi jom kalulut nubuluiji kam sabulungan. Samba agaimuian getinnia Aku te Tuhan Taikamanua.”