Jehz. 21 - BUKO SIPUNENAN

Lanjau Tuhan masisaggangi Jerusalem

¹ Kuanangan si Tuhan katubukku, kuanangannia,

² “Ale togat sirimanua, ipoake matam ka Jerusalem samba tiboake simigi paasekat ka kudduat sipunenannia samba pupatuptup masisaggangi polak Israel.

³ Kua katubut polak Israel: Kise te tiboiet Tuhan: Itco, Ibailiu le Aku saggaknu samba tugolok le lanjauKu ka umania samba tusappruake le katalagamui sirimanua simatopit samba sikatai.

⁴ Kalulut Kuoba masisappruake katalagamui sirimanua simatopit samba sirimanua sikatai, tuoppat le lanjauKu ka umania masisaggangi sangamberi sirimanua sibara ka kaiaman pat aili ka bare.

⁵ Samba agairangan getinia sangamberi sirimanua, Aku, Tuhan masigolokaake lanjauKu ka umania, bailiu taan totoili minca sedda.

⁶ Samba ekeu togat sirimanua, pukatci le kamatatda kele sara rimanua sitatakki tolat kokdoknia samba sikuddu ka pangoringan simapongit.

⁷ Samba ka parere sia katubum: Angoi nupuhoihoi? aleginungannia: Kalulut sara katuagaiat! Ke amakakrangan katuagaiat nenda, senen patuat ibailiu le masaggo samba sangamberi sirimanua bela oinannia kalulut loto. Bulatnia, bulat momoi samba muaaili te! kise te tiboiet Tuhan Taikamanua.”

⁸ Iageti oi tiboiet Tuhan katubukku,

⁹ “Ale togat sirimanua, pupatuptup samba kua: Kise te tiboiet Tuhan: Lanjau! Lanjau! Silepa ajat samba leu tusasai!

¹⁰ Tuajat bule tupiliake logau samba tusasai bule imakirisau kele bila'. Muangka baga pa sita? Tuturat togakku masipaloloi senengamata loina.

¹¹ Tuake lanjau nenda bule tusasai, bule imatarek itupakei; lanjau nenda tuajat samba tusasai, bule tukau ka kabei sipamamatei.

¹² Pusoga samba pusou kam, ale togat sirimanua! Kalulut lanjau nenda masisaggangi paamianKu tuobaake ramatei ka lanjau. Kalulut nenda bo'bo tengam sibailiu toggaiat pureureugat baga.

¹³ Kalulut moi le pasisiboat samba taanai berisara siomakennia, kise te tiboiet Tuhan Taikamanua.

¹⁴ Samba ekeu togat sirimanua, pupatuptup samba pupokpok, eddangan ibailiu lanjau nenda rua ngaminca rua, telu ngaminca telu. Nenda lanjau sipamamatei, lanjau pamamatei simakope, sipasibobokko isappruake sia.

¹⁵ Bule imabubu patuatda samba ituppai sibebele siputatagguilu ka senen matatbaliura, Kuparentaake le lanjau nenda isappruake sia. Enaa, lanjau nenda tugalai makere kele bila samba tusasai bule ipamatei.

¹⁶ Pasisaggri kaikattoet samba kaikatciu, kaipa le imatai matam.

¹⁷ Samba mupokpok leu Aku samba patuatKu simaoloi ibailiu le minca masanang. Aku, Tuhan sipasikukua.”

Lanjau Rimata Babel

¹⁸ Iageti oi tiboiet Tuhan katubukku:

¹⁹ “Ale togat sirimanua, tularani rua enungan enungien lanjau rimata Babel; ka ruania barania ka sara laggai. Galai sara lappri pasisau'sau enungan ka matat enungan siailiake ka senesenen laggai.

²⁰ Tularani ka enungan kaipa ioi lanjau isaggangi Raba, inan laggai muntogat Amon samba masisaggangi Jehuda, sipuirip ka Jerusalem.

²¹ Kalulut rimata Babel murio le nia ka parubaiat enungan nenda, ka panandaat enungan nenda bule igalaiake putatawa; nia masigotco silogui, masitiddou enungan ka terafim samba masilelekake atei tarimeu.

²² Ka kabei sikattoetnia bele le silogui putatawa pagalaiat Jerusalem: bule tupaarepmaake ngangan sirimanua sipamamatei samba sisogaake gerei pasaggangan, bule ipagalak pasitukklut matatbaliu samba masitabbui polak ibailiunia irip pasialougat samba masirioake kekre pasialougat.

²³ Tapoi ka sia, nenda iate tawa patajuat, kenanen rabaraake suppa simaeru; tapoi irerepdep le puseleatda, bailiu tulaba le sia.

²⁴ Kalulut nenda, kise te tiboiet Tuhan Taikamanua: Kalulut anugalai poi iturepdep minca puseleat nenda imatoila pinasabumui, bailiu makoinongnangan sangamberi jomui kabagat sangamberi sigalaiakenenmui. Kalulut aibailiu nurepdep kamnia minca, tulba le kam kabagat golu sikaatai.

²⁵ Samba ekeu, rimata Israel, sirimanua sikatai sipatataju, aialingan tetere kalepakat pasiukumannu,

²⁶ kise te tiboiet Tuhan Taikamanua: Areuake sorot utenu samba ribbaiake kirit purimataatnu! Taanai simariuriu puririmanua kele purimanua kineneiget. Simarepe buita tubuakngake, simabuak buita turepeake.

²⁷ Simaragat, simaragat, Kubailiuake le nia simararagat! Nene leu ta matotom. Teret ioi bulat sipubabakkat katubunia, samba Kukau le nenda katubunia.”

Lanjau Tuhan masisaggangi muntogat Amon

²⁸ “Ekeu togat sirimanua, pupatuptup samba kua: Kise te tiboiet Tuhan Taikamanua pagalaiat muntogat Amon samba paloloiatda; kua: Lanjau, lanjau, atugolokngan lanjau bule ipiliake logau, tusasai bule ipasisubuake, samba bule imakirisau kele bila.

²⁹ Kenanen sirimanua sipasiitco pamoilianan patajuat kakam, siake putatawa pabokoat katubumui. Lanjau tusaggriake ka lolokkat sirimanua sikatai sipatataju, aiailingan teterenia pangampulat pasiukuman.

³⁰ Toiliake minca nenda ka umania! Ka Kudduat aitubaraake ekeu samba laggai kabaraiatnu, Kuukumake le ekeu.

³¹ Kupiliake le geti ngoingoi bagaKu katubum samba masikitcitake obengan goluKu katubum samba masisaragaiake ekeu ka kabeira sirimanua sitaiagai patuat, sibaraake katusubuat.

³² Bailiunangan ekeu komen obengan, mapilinangan logaunu katalagat polak nenda, samba taan turerepdep ekeu minca, kalulut Aku, Tuhan , sipasikukua.”