Jehz. 20 - BUKO SIPUNENAN

Nuntut baga samba ukuman Taikamanua kabagat pumumuan Israel

¹ Ka rura sikapitu, ka laggo sikalima, ka gogoi sikapulu laggo nenda, moi piga pa sikebbukat laggai Israel masitiddou enungan sibara kai Tuhan samba pukuddurangan kamataku.

² Iageti oi tiboiet Tuhan katubukku:

³ “Ale togat sirimanua, panibo ka sikebbukat laggai Israel samba kua katubutda: Kise te tiboiet Tuhan Taikamanua: Taleu masitiddou enungan le nuoi kam katubukKu? Kalulut Aku sipuririmanua, ta Kuoba nutiddou kam enungan katubukKu, kise te tiboiet Tuhan Taikamanua.

⁴ Nuoba leu masiukum sia, ale togat sirimanua, Nuoba leu masiukum sia? Paagai katubutda sangamberi sikatai sigalaiakenenda taikebbukatda,

⁵ samba kua katubunia: kise te tiboiet Tuhan Taikamanua: Kateteret Akupili Israel, amusuppa Aku ka muntogat Jakob samba masipatoila tubu katubutda ka laggai Misir; amusuppa Aku katubutda: Aku te Tuhan Taikamanuam!

⁶ Ka gogoi nenda amusuppa Aku katubutda masiambit sia bela ka laggai Misir mei ka polak sipilikKu kaunenKu katubutda, laggai sipususukkra susu samba suat mani, polak simaeru katalagat sangamberi laggai.

⁷ Samba Aku masikua katubutda: Eddangan senen sirimanua masiribbaiake sabulungannia kasitsitakenen, ka simareirei imattai samba bui' nupalolit kam tubumui ka sabulungan Misir; Aku te Tuhan, Taikamanuam.

⁸ Tapoi amukela le sia patuat katubukKu samba ta raoba masiarep Aku; senen sirmanua ta araribbaiake sabulungannia kasitsitakenen, ka simareirei imattai, samba ta arakaddiuake sabulungan Misir. Oto bara patuatKu Kubelaake goluKu katubutda bule Kubelaake goluKu katubunia katalagat polak Misir.

⁹ Tapoi Kugalaiake le kalulut oningKu, bule nenda bui' tukasitsitake kamatatda tai bangsa, kaipa le rakuddu. Kamatatda tai bangsa nenda Kupatoila tubukKu katubutda kabagat pasiambit sia bela ka laggai Misir.

¹⁰ Ambitkungan sia bela ka laggai Misir samba palulukungan sia ka kudduat simatangeu.

¹¹ Sedda kaukungan katubutda sangamberi siteuakenenKu samba paagaikungan sangamberi surukatKu, samba sirimanua sigalaiakenia, murimanua le nia.

¹² Gogoi SabatKu leu kaukungannia katubutda sibailiu pasirepdeman rarepdep Aku samba leu sia, bule raagainia, Aku te Tuhan, sipunenanake sia.

¹³ Tapoi mukela patuat le muntogat Israel katubukKu ka kudduat simatangeu; ta amurimanua sia siripot siteuakenenKu samba rakeraake le sangamberi surukatKu, ke ragalaiake bainia sirimanua, murimanua le nia. Pasabaurangan leu pusisipunenan gogoi SabatKu. Oto bara patuatKu masipiliake goluKu katubutda ka kudduat simatangeu samba masisubuake sia.

¹⁴ Tapoi Kugalaiake le kalulut oningKu, bule nenda bui' tukasitsitake kamatatda tai bangsa, sipasiitco kateteret Akuambit sia rabela.

¹⁵ Kenanen kisedda musuppa le Aku katubunia ka kudduat simatangeu, ta Kuambit sia ka polak sikauKu katubutda, sipususukkra susu samba suat mani, polak simaeru katalagat sangamberi laggai,

¹⁶ kalulut arakeraake sangamberi surukatKu samba ta murimanua sia siripot siteuakenenKu samba masipasabau pusisipunenan gogoi SabatKu; kalulut patuatda masitutake sabulunganda.

¹⁷ Tapoi manuntu bagakKu masiitco sia, bailiu ta Akusubuake sia samba ta Akumateiake sia ka kudduat simatangeu.

¹⁸ Oto kuakungan ka tatogatda ka kudduat simatangeu: Bui' nupurimanua kam siripot siteuakenenda saukkuimui samba bui' nupusiddonan kam ka surukatda samba bui' nupalolit kam tubumui ka sabulunganda.

¹⁹ Aku te Tuhan, Taikamanuamui: Purimanua kam siripot siteuakenenKu samba galaiake kam surukatKu kabagat riuriu topit,

²⁰ pusipunenanake kam gogoi SabatKu, oto nenda sibailiu pasirepdeman Kaku samba leu kam, bule raagainia sirimanua, Aku te Tuhan, Taikamanuamui.

²¹ Tapoi mukela patuat le tatogatda katubukKu, ta amurimanua sia siripot siteuakenenKu samba ta mariuriu ragalaiake surukatKu, oto sirimanua sigalaiakenia murimanua le sia, rapasabau leuet pusisipunenan gogoi sabatKu oto bara patuatKu kukau golukKu katubutda ka kudduat simatangeu.

²² Tapoi Kutitik le minca kabeiKu samba Kugalaiake nene kalulut oningKu, bule bui' ibailiunia kasitsitakenen kamatatda tai bangsa sipasiitco kateteret Akuambit sia rabela.

²³ Kenanen kisedda musuppa le Aku katubunia ka kudduat simatangeu bule tusaragaiake katalagatda tai bangsa samba tusaragaiake sia ka sangamberi laggai.

²⁴ Kalulut ta aragalaiake sangamberi surukatKu samba masikeraake sangamberi siteuakenenKu samba masipasabau pusisipunen gogoi SabatKu samba matatda mariuriu raitco ka sabulunganda saukkuira.

²⁵ Kisedda te Akukau leu katubutda siteuakenen samba surukat sitaimaeru, bule kalulut nenda tamomoi rapurimanua.

²⁶ Obaakekungan sia ramalolit ka panguruatda, kabagat mupanguruat sibailiu buluakenen kabagat obengan sangamberi sipututu'tu mata siboiki ka suruket, bule Kugalai ratuge'ge, samba agairangan getinia, Aku te Tuhan.

²⁷ Kalulut nenda panibo ka muntogat Israel, ale togat sirimanua, samba kua katubutda: Kise te tiboiet Tuhan Taikamanua: Kabagat nene leu rapaloloi le Aku taikebbukatmui, iate isaili riuriu topitda katubukKu.

²⁸ Kalulut kalepat Akuambit sia ka laggai kabagat suppa Akupalelekngan Kukaunia katubutda. Raitco le ka senen leleu simabuak samba ka senen buttet loina simaigi ran samba panguruatakerangan sedda buluakenenda sija'ja samba ambitrangan panguruatda sibesikiake patuat, samba leu rasinginake sedda panguruatda simasingin samba panguruatakerangan sedda buluakenenda sipiliakenen.

²⁹ Oto Aku masikua katubutda: Aponia nenda kudduat simabuak nutatatraiji kam? Oto teret kineiget oninia tukua Kudduat Simabuak.

³⁰ Kalulut nenda kua ka muntogat Israel: Kise te tiboiet Tuhan Taikamanua: Taleu anupalolit leuet kam tubumui ka enungan puririmanuanda taikebbukatmui samba paelet kabagat masitut sabulungannia kasitsitakenen?

³¹ Kabagat pasiambit panguruatmui, iate masipanguruatake tatogam sibailiu buluakenen ka obengan, palolitmuian tubumui ka sangamberi sabulunganmui teret kineiget. Kuoba peile pa nutiddou kam katubukKu enungan, ale muntogat Israel? Kalulut Aku sipuririmanua, kise te tiboiet Tuhan Taikamanua, taan Kuoba nutiddou kam minca enungan katubukKu.

³² Samba aponia sibabara ka patuatmui bulat ta muaaili, iate kele sikuamui: Kuoba kai kele tai bangsa bagei, kele sangamberi muntogat palaggailaggai manindou katubut loina samba ka bukku.

³³ Kalulut Aku sipuririmanua, kise te tiboiet Tuhan Taikamanua, Kuparentaake le kam kabagat kabei simaron samba para situtototoi samba kabagat golu sibebela.

³⁴ Kuambit le geti kam bela katalagatda tai bangsa samba masiruruake kam baramui ka sangamberi laggai, ka kudduat anupasaragai kam tubumui kabagat ka kabei simaron samba para situtototoi samba kabagat golu sibebela,

³⁵ samba ambitkungan geti kam ka kudduatda tai bangsa simatangeu sedda pakaroakekungan kam sipamamatai.

³⁶ Kele Kupakaroake taikebbukatmui ka kudduat simatangeu ka polak Misir, kisedda Kupakaroake kam, kise te tiboiet Tuhan Taikamanua.

³⁷ Kuobaake le geti nutusabau kam ka tei tutura pasijagoKu samba msiguruake kam kabagat geli samba masiadde kam.

³⁸ Kusaraake le geti sirimanua katalagamui simakela patuat samba sipataju Aku; Kuambit le sia geti rabela ka laggai, kudduatda sibailiu siooiake, tapoi ka polak Israel ta tuguguru sia. Samba agaimuiannia geti Aku te Tuhan.

³⁹ Ale kam, muntogat Israel, kise te tiboiet Tuhan Taikamanua, eddangan senesenenda mei manindou ka sabulunganda. Tapoi lepa geti nuarep te geti kam Aku samba taan nupasasabau kam pusisipunen oningKu sipunenan kabagat panguruatmui samba sabulunganmui.

⁴⁰ Kalulut ka uddut leleuKu sipunenan, ka uddut leleu Israel simabuak, kise te tiboiet Tuhan Taikamanua, sedda ka polak nenda sangamberi muntogat Israel ka sangamberinia manindou le sia katubukKu. Sedda te imakikiliu bagakKu katubum samba sedda te Kutitiddou kakam panguruatmui simakokoi samba sinarekanenmui bulat sipili, sangamberi sipunenimui.

⁴¹ Kele ka panguruat simasingin aimakiliu bagakKu katubmui kateteret Akubelaake katalagatda tai bangsa samba masiruruake kam baramui ka palaggailaggai, kudduat anumasaragai kam, samba Kupatotoila te pusisipunenanKu katubumui kamatatda tai bangsa.

⁴² Samba agaimuiannia geti Aku te Tuhan, kateteret Kuambit kam tuguru ka polak Israel, ka laggai sipalelekakenenKu kabagat suppa Kukaunia katubutda taikebukatmui.

⁴³ Sedda repdepmuian geti sangamberi paraboatmui, anupalolit kam tubumui, samba imunnangan geti bagamui masiitco tubumui kalulut sangamberi sikatai sigalaiakenenmui.

⁴⁴ Samba agaimuiannia geti Aku te Tuhan, kateteret Aku, kalulut oningKu, ta atugalaiake kele siripot paraboatmui sikatai samba simabutek, ale muntogat Israel, kise te tiboiet Tuhan Taikamanua.”

Obengan sibara ka laggai ka kaiaman

⁴⁵ Iageti oi tiboiet Tuhan katubukku:

⁴⁶ “Ale togat sirimanua, ipoake matam isit ka kaiaman samba tiboake simigi paasekat ka polak ka kaiaman samba pupatuptup katubut polak simaleleu ka isit ka kaiaman;

⁴⁷ samba kua ka leleu isit ka kaiaman: Kise te tiboiet Tuhan: Kise te tiboiet Tuhan Taikamanua: Itco, Kuobekngake te obengan katubum sipasilabo itata senen loina sipuririmanua katubum samba loina simamantei simagarak. Obengan sipujujulu ta pepe samba sangamberi mata sibara ka kaiaman pat aili ka bare malabo le geti ioloinia.

⁴⁸ Samba senen sirimanua raitco le geti, Aku, Tuhan te amasikau; obengan nenda ta pepe.”

⁴⁹ Lepa kuakungannia: “Enaa, Tuhan Taikamanua, kuarangan pagalaiat aku: Ta pa tiboiet pasiggirat le ititiboake?”