Jehz. 2 - BUKO SIPUNENAN

Pasogaiat katubut Jehezkiel

¹ Kuanangan katubukku: “Ale togat sirimanua, suruake ekeu samba purio, kalulut Kuoba manibo katubum.”

² Ainia maninibo katubukku, toili ketcatku katubukku samba rioakenangan aku. Iageti arepikunganNia ipaninibo katubukku.

³ Kuanangan katubukku: “Ale togat sirimanua, Kukoniake ekeu ka tai Israel, ka bangsa simakela patuat sitaimareddet katubukKu. Sia samba taikebbukatda arakaddiuakean Aku pat aili gogoi kineiget.

⁴ Ka reddenan nene samba ka simakela patuat nene te, Kukoiniake ekeu samba buita nukua katubutda: Kise te tiboiet Tuhan Taikamanua.

⁵ Samba ele raarepi ele ta raarepi kalulut sia iate muntogat simakela patuat – raagai te geti, sara nabi ai katalagatda.

⁶ Samba ekeu, togat sirimanua, bui numaloto nuitco sia samba nuarepi tiboietda, kenanen ai ekeu katalagat se'se simarui samba mukuddu kabebet telenganga. Bui numaloto nuarepi tiboietda samba bui ipugeret tubum nuitco pumataatda, kalulut sia iate muntogat simakela patuat.

⁷ Segeake sangamberi tiboietKu katubutda, ele raarepi ele ta raarepi, kalulut sia nene iate simakela patuat.

⁸ Samba ekeu, togat sirimanua, arepake aponia sitiboakenenKu katubum; bui numakela patuat kele muntogat simakela patuat nene. Nganga'ake ngungum samba kom aponia siakeKu katubum.”

⁹ Itcokungannia, bulatnia ai kabei situtotoi katubukku, samba bulatnia, aiukkaake sara buko situpupurut,

¹⁰ lepa nganangakenangannia kamatakku. Buko situpupurut nenda ruangasilania atusuratnan samba sedda tusuratake sangamberi urai sougeri, hoihoi samba katci.