Jehz. 19 - BUKO SIPUNENAN

Sougeri pagalaiat Rimata Israel

¹ Ale, tiboake sara sougeri pagalaiat Rimata Israel,

² samba kua kise: “Apate aibailiu inam sangamuneng singa sinanalep katalagat sangamberi singa! Merep le nia katalagat singa sibau tubu, samba itottotake togania.

³ Uraunangan sangamuneng katalagat tatogania, bailiunangannia singa sibau tubu; gelainangan masitarakkup, beringan leu sirimanua koiloknangannia.

⁴ Pusogarangan tai bangsa: Aimugegege singa! kalepakatnia belenia ka guluggu'ra; labarangannia samba giritrangannia ka Misir.

⁵ Kele aiagainia inan singa siboboi le sigalainia samba asapprungan karoakenennia, alanangan togania bagei samba uraunangannia bailiu singa sibau tubu.

⁶ Puenungnangan togania nene katalagat mungkuat singa, bailiuinangannia sangamuneng singa sibau tubu; gelainangan masitarakkup, beringan leu sirimanua koiloknangannia.

⁷ Pakatainangan sangamberi uma purimataatda samba subuakenangan sangamberi laggaira; polak samba sangamberi sibabara kabagania mumengmeng kalulut loto masiarep ngangan rounia.

⁸ Iageti saggangirangannia tai bangsa sibara ka laggai ka sibokkonia, belerangan jarik rajariknia samba galairangan itujunung ka guluggu'.

⁹ Geliakerangannia kabagat geli, sialei appra, tuambit kamatat Rimata Babel samba tuguruake kabagat tangsi, bule bui' imaarep minca ngangania ka uddut sangamberi leleu Israel.

¹⁰ Inam kele buttet anggur kabagat monen anggur, situurep kabebet oinan, mubua samba muran kalulut oinan sipususukkra.

¹¹ Putu'tunangan katubunia sara ran simaron sibailiu tuturat purimataat; sipusumbulat simabuak katalagat ran simareret, samba bailiunangannia makoinong kalulut buaknia samba kalulut rannia simaigi.

¹² Tapoi tuburau le nia kabagat golu samba turibbaiake ka polak; malajunangan kalulut rusa sikalaut, goloknangan buania, ran simaron bailiu malajunangan; samba sappruakenangannia obengan.

¹³ Samba kineneiget tuurepnia ka polak simalio simangai, ka polak simagarak samba simaonggou oinan.

¹⁴ Oto bela obengan sibara ka rannia sipasilabo itata ran samba buania, bailiu taan anai katubunia ran simaron samba taanai tuturat purimataat.” Nene iate sougeri samba aibailiuan sougeri.