Jehz. 18 - BUKO SIPUNENAN

Senen sirimanua masipasikeli tubunia

¹ Iageti oi tiboiet Tuhan katubukku:

² “Aponia sibabara katubum, bailiu tiboakenungan tiboiet pasailukat nene ka polak Israel: Sangamberi saukkui mukom bua simata' samba sotda tatoga bailiu puseretnangan?

³ Kalulut Aku sipuririmanua, kise te tiboiet Tuhan Taikamanua, taan te nutitiboake minca tiboiet pasailukat nene ka Israel.

⁴ Bulatnia, sangamberi ketcat Aku sibakkatnia! Ketcat ukkui samba leu ketcat toga Aku sibakkatnia! Samba sirimanua sigalaiake jo, nenda te bulat tumamateiake.

⁵ Ke sara sirimanua simatopit le nia samba igalaiake puroipoat samba pubulanan,

⁶ samba ta aikom akkula sipanguruatakenen ka uddut leleu ele ta aimattai ka sabulunganda samuntogat Israel, ta aigalaiake jo ka sikalalepda saaleinia samba ta aipaperepake tainanalep kateteret ai kabagat suat tubu,

⁷ ta aipaorei sirimanua sabagei, itoiliake sibaleakenen sirimanua, ta airaurau aponia pa, ikau komenda sirimanua simalaje, ikau leppeira sirimanua sibulutut,

⁸ ta aiala bungan bulagat ele iala uktuk, iareuake tubunia ka patajuat, igalaiake surukat sipulelelek katalagat sirimanua,

⁹ murimanua siripot siteuakenenKu samba mariuriu masitut surukatKu kabagat riuriu topit, oto iate sirimanua simatopit, bulat murimanua le nia, kise te tiboiet Tuhan Taikamanua.

¹⁰ Tapoi ke itu'tuake matat sara toga ibailiunia sipasiraurau, samba sioba pamatei ele masigalaiake sara kele nenda,

¹¹ kenanen taanai berisara aigalai ukkui. Toga nenda masikom akkula panguruat ka uddut leleu samba masipajo sikalalep saaleinia,

¹² masipaorei sirimanua sipangongorik samba simageba, masiraurau, ta aitoiliake sibaleakenenda sirimanua, masimattai ka sabulungan samba igalaiake kasitsitakenen,

¹³ masiala bungan bulagat samba iala uktuk, sirimanua kele nenda ta muririmanuania. Sangamberi kasitsitakenen aigalaiakean samba buita matei le nia; logaunia tuorakngake katubunia.

¹⁴ Bulatnia te, ke itu'tuake matat sara toga samba toga nene aiitco sangamberi jo sigalaiakenen ukkuinia, tapoi iagai pagalaiat nenda, bailiu ta igalaiake kele nenda:

¹⁵ ta ikom akkula panguruat ka uddut leleu samba ta imattai ka sabulungan muntogat Israel, ta aipajo sikalalepda saaleinia,

¹⁶ ta aipaorei sirimanua sabagei, ta ioba masitiddou sibaleakenen, ta airaurau aponia pa, masikau komenda sirimanua simalaje, masikau leppei ka sirimanua sibulutut,

¹⁷ masiareuake tubu ka patajuat, ta aiala bungan bulagat ele uktuk, masigalaiake surukatKu samba murimanua siripot siteuakenenKu, sirimanua kele nenda ta mamateinia kalulut puseleat ukkuinia, bulat murimanua le nia.

¹⁸ Ukkuinia, sigalaiake parauraugat, iparauraugi aponia pa, samba masigalaiake pagalaiat sitaimaeru katalagat bangsania, bulatnia, matei le nia kalulut puseleatnia.

¹⁹ Tapoi nukua le kam: Angoi ta atuorakngake toga masibairat puseleat ukkuinia? Kalulut toga nenda masigalaiake puroipoat samba pubulanan, masigalaiake sangamberi siteuakenenKu kabagat riuriu topit, oto bulat murimanua le nia.

²⁰ Sirimanua sigalaiake jo, nia te bulat mamatei. Ta tuorakngake toga masibairat puseleat ukkuinia samba ukkui ta tuorakngake masibairat puseleat togania. Sirimanua simatopit isilo le geti panukanan pubulanannia, samba pukakatai sirimanua sikatai tuorakngake le katubunia.

²¹ Tapoi ke sirimanua sikatai nenda ibauake patuatnia ka sangamberi jo sigalaiakenennia samba iukkaake sangamberi siteuakenenKu samba leu igalaiake puroipoat samba pubulanan, bulat murimanua le nia, ta mamateinia.

²² Sangamberi sikatai sigalaiakenennia taan turerepdep; murimanua le nia kalulut pubulanan sigalaiakenennia.

²³ Kuoba pa kamateiat sirimanua sikatai? Kise te tiboiet Tuhan Taikamanua. Ta pa pasibaugat patuatnia le Kuoba bule ipurimanua?

²⁴ Ke ikaddiuake putopinannia sirimanua simatopit samba igalaiake patajuat kele sangamberi kasitsitakikenen sigalaiakenenda sirimanua sikatai, muririmanua pa nia? Sangamberi pubulanan sigalaiakennia taan turerepdep. Buita mateinia kalulut aisili topitnia kabagat jo sigalaiakenennia.

²⁵ Tapoi nukua le kam: Ta aisese sigalai Tuhan! Arep kam boiki, ale muntogat Israel, ta aisese pa sigalaiKu ele sigalaimui le ta aisese?

²⁶ Ke ikaddiuake putopinannia sirimanua simatopit samba igalaiake patajuat bailiu mateinia, buita matei le nia kalulut patajuat sigalaiakenennia.

²⁷ Bailoknia, ke sirimanua sikatai nenda ibauake patuatnia ka sikatai sigalaiakenennia samba igalaiake puroipoat samba pubulanan, iarauake le engania.

²⁸ Oleinangan bagania samba bauakenangan patuatnia ka sangamberi sikatai sigalaiakenennia, bulat murimanua le nia, ta mamateinia.

²⁹ Tapoi muntogat Israel masikua: Ta aisese sigalai Tuhan! Ta aisese pa sigalaiakenenKu, ale muntogat Israel, ele sigalaimui le ta isese?

³⁰ Kalulut nenda Kuukum te kam senesenemui siripot sigalaiakenenmui, ale muntogat Israel, kise te tiboiet Tuhan Taikamanua. Bauake kam patuatmui samba areuake kam ka sangamberi pukakataimui, bule bui' ibailiunia nenda katusoksonganmui, sibeleake kam kabagat puseleat.

³¹ Ribbaiake kam sangamberi sikatai sigalaiakenenmui katubukKu samba baugi kam patuat samba ketcatmui! Angoian le numamatei kam, ale muntogat Israel?

³² Kalulut ta ioba bagakKu kamateiat sara sirimanua, kamateiat bulat siloketnia, kise te tiboiet Tuhan Taikamanua. Kalulut nenda, bauake kam patuatmui, bule nupurimanua kam!”