Jehz. 17 - BUKO SIPUNENAN

Pasikat taimariuriu topit Rimata Zedekia

¹ Iageti oi tiboiet Tuhan katubukku:

² “Ale togat sirimanua, kua sara patura samba tiboake sara pasikat ka muntogat Israel.

³ Kua: kise te tiboiet Tuhan Taikamanua: Sangamuneng uma manyang sabeu sipukappo sabeu samba simananta, simaigi bulu simagurik mei ka leleu Libanon samba alanangan rorot loinat pinilok.

⁴ Bakbakakenangan roronia bulat ka tu'tunia samba abbitnangannia ka sara laggai pasisakiat, lepa galakakenangannia ka laggai panakiat.

⁵ Alanangan sara sirourou polak nenda samba urepakenangannia ka mone simatarek tukarapake. Lepa galakakenangannia kabebet oinan sipububura kele loinat gandarusa,

⁶ bailiu putu'tunangan samba bailiunangannia loinat anggur simalibbut, siputu'tu simarepe samba sangamberi rannia musikkou siailiake uma' nenda samba sangamberi ungatnia ai kateinia. Kisedda te ibailiunia loinat anggur samba ibelaake sinulania samba iottouake sirourounia.

⁷ Kabagat nenda ai leuet uma' manyang sabeu bagei sipukappo sabeu samba sipubulu simigi. Samba bulatnia, loinat anggur nene iipoake sangamberi ungatnia ka uma' nenda samba sangamberi rannia totoiakenangannia katubunia, bule igurunginia uma' bele peile baruk polak kudduatnia aituurep.

⁸ Tapoi tuurep le nia ka mone simaeru, kabebet oinan sipububura, bule ipuran samba ipubua samba bule ibailiunia loinat anggur simaeru.

⁹ Kua: Kise te tiboiet Tuhan Taikamanua: Maririuriu pa nenda? Taleu rabuburau le sirimanua sangamberi ungatnia samba rapapekpengi buania, bailiu magaraknangan sangamberi buluknia sibau? Ta leu kabei simaron samba sirimanua simigi ituburau sangamberi ungatnia.

¹⁰ Itco, kirenangan atuurepnia, tapoi ibabaraake leu uktuk? Ta pa mamantei le nia imagarak ke ioraknia rusa sikalaut? Mamantei le nia ka baruk polak ka kudduat putu'tukatnia nenda.”

¹¹ Iageti oi tiboiet Tuhan katubukku:

¹² “Kua katubutda muntogat simakela patuat: Ta pa nuagai kam katukolobatnia nene? Kua: Itco, rimata Babel moi ka Jerusalem samba alanangan rimata samba sikebbukat laggai ka Jerusalem samba abbitnangan sia ka Babel.

¹³ Lepa alanangan sara sibara ka muntogat rimata samba galainangan palelengan pasambania samba koiniakenangan leu nia musuppa. Alanangan leu sangamberi sipuute ka laggai nenda,

¹⁴ bule ta imaron purimataat nenda samba bui' ramakela patuat minca, samba leu bule raukkaake palelengan nenda simaron samba kalulut nenda mariuriunangan ibara palelengan nenda.

¹⁵ Tapoi sirimanua nenda mukela patuat katubunia kabagat masikoiniake pakoiniatnia ka Misir, bule itukau katubunia kuro samba saladdu simigi. Mauktuk pa nia? Momoi pa imaarau sirimanua sigalaiake kisedda? Momoi pa imaarau sirimanua sipasabau palelengan?

¹⁶ Kalulut Aku sipuririmanua, kisedda te tiboiet Tuhan Taikamanua, bulat matei le nia ka Babel, ka kudduat rimata sipasiuddetake sibailiu rimata. Kalulut ta aipuletsei ka suppa sitiddou rimata nenda katubunia samba aipuarak palelengania pasamba rimata.

¹⁷ Ta iroromakenia si Parao kabagat pasaggangan pasamba saladdu simigi samba mungkuat sirimanua simigi, kateteret tutabbui irip pasialougat samba aiturioake kekre pasialougat bule tutataake sirimanua simigi.

¹⁸ Bulatnia, mapuaraknia ka suppa samba masipasabau palelengan. Bulatnia, kenanen itotoiake kabeinia pagalaiat nenda kabagat pasalam, tapoi ipasabau le sangamberinia nenda, oto ta maaraunia.

¹⁹ Kalulut nenda, kise te tiboiet Tuhan Taikamanua: Kalulut Aku sipuririmanua, bulat Kuorakake le ka utenia suppania katubukKu, puarangennia samba palelengannia kamatakKu, sipasabaunia.

²⁰ Moi le geti Aku masibele jarikKu bule ijariknia samba kabagat seserekKu serenangan leu nia. Abbitkungannia ka Babel samba sedda pakaromaian, kalulut taimariuriu topitnia katubukKu.

²¹ Matei le geti ka lanjau sangamberi saladdu sipilinia samba simaarau tusaragaiake le geti ka sangamberi matat rusa. Samba agaimuian getinia Aku te Tuhan, sipasikukua.

²² Kise te tiboiet Tuhan Taikamanua: Aku le geti masiala sara ran ka joinong loinat pinilok simabuak samba urepakekungania; bakbakakekungannia ka roro bulat ka tu'tut samba sibau peile samba Aku le geti masiurepake ka uddut sara leleu sipusumbulat simabuak kapata.

²³ Kuurepake le getinia ka uddut leleu Israel simabuak, bule ipuran samba ipubua samba bailiunangannia loinat pinilok bulat simaeru. Senengamata uma' sibara kappo mukuddu ka teinia, mukunem le sia ka tei rannia.

²⁴ Iageti agairangan getinia sangamberi loina ka mone, Aku, Tuhan, masirepeake loina simabuak samba masibuakake loina simarepe, masigalai imantei imagarak loina sipusirourou minca. Aku, Tuhan, sipasikukua samba sipasigagalaiake.”