Jehz. 16 - BUKO SIPUNENAN

JERUSALEM SITAIMARIURIU TOPIT Taikamanua masiala Jerusalem sibailiu sinanalepNia

¹ Iageti oi tiboiet Tuhan katubukku:

² “Ale togat sirimanua, paagai katubut Jerusalem sangamberi sigalaiakenennia sikatai

³ samba kua: Kise te tiboiet Tuhan Taikamanua katubut Jerusalem: Kabaraiatnu samba putu'tukat matam iate ka polak Kanaan; ukkuinu iate tai Amori samba inam iate tai Heti.

⁴ Putu'tukat matam kisene: Kateteret aiputu'tu matam, talit pusounu ta atutippu samba ta aturau ekeu oinan bule numalina; samba leu beringan garam ta atulokotake ele tutabut ekeu komak.

⁵ Berisara sirimanua simanuntu baga katubum bailiu tugalaiake kisedda katubum kalulut nuntut baga; beringan leu ekeu turibbaiake le ka mone, kalulut sirimanua masiputata ekeu kateteret putu'tukat matam.

⁶ Sabau Aku sedda samba itcokungan ekeu ainupangongoingoi rerem sibara logau samba kuakungan katubum kabagat aimulologau tubum: Buita murimanua le ekeu

⁷ samba kau ibailiu ekeu sabeu kele sipututu'tu ka mone! Bailiunangan puuraunungan samba makebbukatnangan tubum, pat ailinangan ekeu siokko. Iageti puuraunangan tottotnu, putu'tunangan alainu, tapoi sibulutut peile ekeu.

⁸ Iageti sabaua Aku sedda samba itcokungan ekeu, bulatnia, aiailingan ekeu ka pubotbonan tubu. Apoakekungan komakKu katubum samba tabbokungan kailaakenennu. Kabagat suppa baraakekungan palelengan katubum, kisedda te tiboiet Tuhan Taikamanua, samba kabagat nenda ekeu bailiu bakkatKu.

⁹ Kubui le ekeu pasamba oinan bule tupalina logaunu katubum samba tulaijikungan ekeu tula.

¹⁰ Leppeiakekungan leppei katubum simagurik samba akekungan tarangai kulit silebbuk samba komak juto simaalit baga tabbot ute samba salendang sutera.

¹¹ Samba palaingekungan ekeu pasamba senengamata pulaingean samba letcuakekungan letcu ka kabeinu samba inu ka lolokkatnu.

¹² Kuake le subang ka asaknu samba subang ka talingam samba kirit ute pulatsanan ka utenu.

¹³ Kabagat nenda palaingenungan tubum pasamba mas samba perak, lepeinu juto simaalit baga, sutera samba komak simagurik. Kannu iate tapung bulat simaeru, suat mani samba tula. Bailiunangan ekeu bulat simalinge tubu, bailiu mateunangan ibailiu ekeu rimata sinanalep.

¹⁴ Maabeunangan onim katalagatda tai bangsa kalulut laingen tubum, makapplu laingenia, kalulut laingenia pulaingeanKu siakeKu katubum, kise te tiboiet Tuhan Taikamanua.”

Puoloman tubut Jerusalem samba ukumannia

¹⁵ “Tapoi nukaroake le laingen tubum samba paolopnungan tubum kabagat masikaroake pubebeunannu samba masigalai puoloman tubu ka senen sirimanua situsasabau.

¹⁶ Alanungan leppeinu bule nugalai kudduat pasibuluatnu simagurik samba paolopnungan tubum sedda; kele nenda tapei amuaili samba taan babara minca.

¹⁷ Alanungan leu sangamberi pulaingeannu sigalai sibara ka masKu samba perakKu, siakeKu katubum, samba galainungan kekeu tularat simanteu samba puolopnungan tubu ka sia.

¹⁸ Alanungan ka leppeinu simagurik bule nutabbo sia samba panguruatakenungan katubutda tulakKu samba kumanyangKu.

¹⁹ Samba leu kanKu siakeKu katubum, tapung bulat simaeru, tula samba suat mani Kuake sibailiu komennu, panguruatakenungan katubutda sibailiu panguruat simasingin, kise te tiboiet Tuhan Taikamanua.

²⁰ Beringan leu tatogam taimanteu samba tainanalep situ'tuakenennu bakkatKu alanungan samba panguruatakenungan sia ka tularat sibailiu komenda. Malabbei peile pa puoloman tubum nene

²¹ nuja'ja tatogakKu samba nukau sia katubutda rapanguruatakenia sibailiu buluakenen ka obengan?

²² Kabagat sangamberi sigalaiakenennu sikatai samba puoloman tubum nenda taan nurerepdep minca kateteret mabau peile tubum, kateteret sibulutut peile ekeu sialei nupangoingoi rerem kabagat logaunu.

²³ Kalepat sangamberi pukakatai nenda, paan te, Paan te kekeu! Kise te tiboiet Tuhan Taikamanua.

²⁴ Galainungan kekeu kudduat simabuak samba galainungan kekeu kudduat pasibuluat ke senen polak simalio.

²⁵ Ka senen parubaiat enungan galainungan kudduat pasibuluat. Sakiakenungan laingen tubum bailiunangannia sikatai kabagat nunga'ngaake karua bakkapatnu ka senen sirimanua situsasabau, bailiu tuppainangan puoloman tubum.

²⁶ Paolopnungan tubum ka tai Misir, pabebeakenennu lalep, sabeu keikeiet nenda, bailiu tuppainangan puoloman tubum, sibaraake besit patuatKu.

²⁷ Itco, Akusaggangingan ekeu samba Akubelekingan rubeiatnu samba akukauan ekeu ka siobat bagatda sirimanua simalaga baga katubum, iate tainanalep tai Filistin, simaaila masiitco paraboatnu simaolop nenda.

²⁸ Muolop tubu leu ekeu ka tai Asyur, kalulut tapei sesege bagam; bulatnia, muolop tubu le ekeu ka sia, tapoi tapei sesege bagam.

²⁹ Tuppainungan minca puoloman tubum ka laggai pasakiat ka Kasdim, tapoi nenda leu tapei sesege bagam.

³⁰ Bulat abeu pubotbonan tubum nenda, kise te tiboiet Tuhan Taikamanua, ekeu sigalaiake sangamberinia nene, iate galajet sara sinanalep sikatai simaolop tubu,

³¹ sipasigagalai kudduatnu simabuak ka senen parubaiat enungan samba masigalai kudduat pasibuluatnu ka senen polak simalio. Tapoi ekeu ta kele olop tubu simatukle, kalulut nukeraake le upat olop tubu.

³² Ale sikalalep sipaelet, silakkaiake sirimanua sabagei sailit simanteunia.

³³ Ka sangamberi tainanalep simaolop tubu rakau le sirimanua upa, tapoi kekeu bailoknia le, ekeu le masikakau panguruat ka sangamberi sioba ekeu sibailiu pananakat, bule sia sibara kabebenu moi katubum muolop tubu.

³⁴ Kabagat puoloman tubum iate bailoknia le ka tainanalep sabagei. Ta sirimanua sikukru ekeu sioba muolop tubu; tapoi ekeu le masikakau upa puoloman tubu, oto kekeu ta raake aponia pa; nenda bailoknia katubum.

³⁵ Kalulut nenda, ale tainanalep simaolop tubu, arepake kam tiboiet Tuhan!

³⁶ Kise te tiboiet Tuhan Taikamanua: Kalulut anuparubei poi paeletnu samba keikeietnu tunga'ngaake kabagat puoloman tubum ka sirimanua sioba ekeu, ka sabulungannu sikatai samba kalulut logaura tatogam sipanguruatakenennu katubutda,

³⁷ bulatnia, kalulut nenda Kururuake le geti sangamberi simaala baga katubum, iate sina'na patuatnu, sirimanua simanuntu bagam ele simalaga bagam. Kururuake le geti sia kabebenu bule rasaggangi ekeu samba Kunga'ngaake le geti keikeietnu kamatatda, bailiu itcorangan sangaliot keikeietnu.

³⁸ Kuukum le geti ekeu kele sirimanua rapasiukum tainanalep sipaelet samba sipamamatei. Kubelaake le geti golu tu'tut bagakKu katubum.

³⁹ Kusegeake le ekeu ka kabeira. Bukkatakerangan leu kudduatnu simabuak samba pakatairangan sangamberi leleunu, bulututakerangan ekeu, parauraugirangan sangamberi pulaingeannu samba obaakerangan ekeu sibulutut.

⁴⁰ Koiniakerangan leu ratusuru sangamungkuat sirimanua masisaggangi ekeu, sipabaijungi ekeu bukku samba sisaggri ekeu pasamba lanjaura.

⁴¹ Laborangan geti sangamberi lalepnu samba masiake ukuman katubum kamatatda tainanalep simigi. Kabagat nenda Kugalai le ekeu nuariake muolop tubu samba taan nukakau upat olop tubu.

⁴² Kisedda te Kubelaake goluKu katubum bailiu malebaknangan minca tu'tut bagaKu katubum; ipeite Kumasanang samba taan mabesik patuatKu.

⁴³ Kalulut taan anurepdep teteret mabau peile tubum, tapoi ka sangamberinia nene sibaraake geret tubukKu pugogolu, bulatnia, Kuorakngake leu paraboatnu ka utenu, kise te tiboiet Tuhan Taikamanua. Ta pa anugalai le minca paelenan nene, ka bagei ka sangamberi sigalaiakenennu sikatai?

⁴⁴ Itco, senen sipasigagalai urai rakua le geti pasailukat nene pagalaiat ekeu: Ke kisedda ina, kisedda leuet toga!

⁴⁵ Ekeu togat inam, simasitsit masiitco simanteunia samba tatogania taimanteu samba ekeu bagitda sakebbunu tainanalep, simasitsit masiitco taimanteura samba tatogatda taimanteu. Inam iate tai Heti samba ukkuinu iate tai Amori.

⁴⁶ Kebbunu sikebbuakat iate Samaria, pasamba tatogania tainanalep mukuddu ka isit bare, samba sarainam bulat sisule iate Sodom, pasamba tatogania mukuddu ka isit kaiaman.

⁴⁷ Ta pa murimanua le ekeu siripot sigalaira samba galaiakenungannia kele sigalaiakenenda sikatai; taan mauju nugalai bulat sikatai ka sanganantat purimanuaiatnu bele peile kataira.

⁴⁸ Kalulut Aku sipuririmanua, kisedda tiboiet Tuhan Taikamanua, bulatnia te Sodom, sarainam bulat sisule pasamba tatogania tainanalep ta aragalaiake kele sigalaiakenennu pasamba tatogam tainanalep.

⁴⁹ Itco, nene te puseleat Sodom, kebbunu nenda: puukkanan tubu, komen sipususukkra samba pusasanang murimanua ai katubunia samba ka tatogania tainanalep, tapoi ta airopmake sirimanua sipangongorik samba simageba.

⁵⁰ Bailiunangan sia simabuak patuat samba galairangan sikatai kamatakKu; oto areuakekungan sia kalepat Akuitco nenda.

⁵¹ Samaria ta aigalaiake iletalaga jom, tapoi nugalaiake le maigi pukakatai bele peile ka ruatda, bailiu ka sangamberi pukakatai sigalaiakenennu, nubailiuake sangamberi sasarainam tainanalep kele simatopit.

⁵² Bairat le puailaatnu, ale ekeu, sibaraake ukuman simanangka peile katubutda sarainam tainanalep; kabagat jom bulat sikatai bele peile ka sia, sia peile matopit kekeu. Eddangan numaila samba bairat le puailaatnu, kalulut anubailiuake sangamberi sakebbunu kele simatopit.”

Taikamanua masipalelekake palelengan sibau

⁵³ “Tapoi Kupaeru te geti puririmanuanda, puririmanuan Sodom pasamba tatogania tainanalep samba leu puririmanuan Samaria pasamba tatogania tainanalep, samba Kupaeru leuet puririmanuam katalagatda,

⁵⁴ bule nubairat puailaatnu samba bule numaila kalulut sangamberi sigalainu, pat bailiunangan leu ekeu pusuibiat bagatda.

⁵⁵ Pagalaiat sarainam, Sodom pasamba tatogannia tainanalep tupaeru le puririmanuania kele puririmanuania siboiki; Samaria leu pasamba tatogania tainanalep tupaeru le geti puririmanuania kele puririmanuania siboiki; samba leu ekeu pasamba tatogam tainanalep tupaeru le geti kele puririmanuam siboiki.

⁵⁶ Ta pa Sodom, sarainam, aibailiu tiboietnu kateteret puukkanannu,

⁵⁷ kepei imatoila pukakatainu, kele kateteret kineneiget rapakaila ekeu tatoga tainanalep tai Edom pasamba sangamberi sikuddu kabebenia samba tatoga tainanalep tai Filistin, sipaloloi ekeu sikuddu kabebenu?

⁵⁸ Paeletnu samba sangamberi sigalainu sikatai buita nubairat, kise te tiboiet Tuhan.

⁵⁹ Kalulut kise te tiboiet Tuhan Taikamanua: Kugalaiake le katubum kele sigalaiakenennu, iate masipulabbei suppa kabagat masipasabau palelengan.

⁶⁰ Tapoi Kurepdep le palelenganKu pasamba ekeu kateteret mabau peile tubum samba Kuronake le kekeu palelengan sitaimasususu.

⁶¹ Iapeite nurepdepnia paraboatnu samba maailanungan, kateteret Akuala sasaraunam, sikebbukat samba leu sisule, samba tuake sia katubum sibailiu togam, tapoi ta kalulut anuukkaake palelengan.

⁶² Kuronake le geti palelenganKu pasamba ekeu, samba againungan getinia, Aku te Tuhan.

⁶³ Kabagat nenda repdepnungan siburu samba maailanungan, bailiu tupetpetnangan ngungum kalulut puailaatnu, kateteret Kubaraake paabanan kekeu kalulut sangamberi sigalaiakenennu, kisene te tiboiet Tuhan Taikamanua.”