Jehz. 15 - BUKO SIPUNENAN

Jerusalem, loinat anggur sitakatukaunan

¹ Iageti oi tiboiet Tuhan katubukku:

² “Ale togat sirimanua, aponia pabaggeiat ran anggur ka sangamberi loina sipubua kele anggur sipututu'tu katalagat sangamberi loina ka leleu?

³ Raala pa sirimanua rannia bule tugalai aponia pa ele tugalai pananggaat senengamata pugalai?

⁴ Bulatnia, ran nenda turibbaiake le ka obengan itulaboake; karua taimingnia sappru le ilabonia obengan samba tengania aimuoobek, ai peile pa katukaunannia bule tugalai aponia pa?

⁵ Itco, beringan aipeilenia mamumuine, ta atupakei ka aponia pa, sarapei kalepat ailabonia obengan samba aimalabo; momoi pa tupakeinia minca ka aponia pa?

⁶ Kalulut nenda kise te tiboiet Tuhan Taikamanua: Kele ran anggur katalagat loina ka leleu, siribbaiakenenKu ka obengan bule imalabo, kisedda te Kugagalai ka silaggaiji Jerusalem.

⁷ Aku le masiukum sia. Kenanen tuarau sia ka obengan, tapoi ilalabo le sia obengan. Samba agaimuian getinia Aku te Tuhan, kateteret Kuukumake sia

⁸ samba Kubailiuake le laggai nenda simatangeu, kalulut taimatopitda, kise te tiboiet Tuhan Taikamanua.”