Jehz. 14 - BUKO SIPUNENAN

Ukuman katubutda sibuluiji sabulungan

¹ Lepa nenda oi katubukku piga pa sirimanua sibara ka sikebbukat laggai Israel samba pukuddurangan kamatakku.

² Iageti oi tiboiet Tuhan katubukku:

³ “Ale togat sirimanua, sangamberi sirimanua nene raabeuake le sabulunganda kabagat patuatda samba ragalakake bukku pasisoksok kamatatda, sibeleake sia kabagat puseleat. Kuoba pa ratiddou enungan katubukKu?

⁴ Kalulut nenda panibo katubutda samba kua: Kise te tiboiet Tuhan Taikamanua: Senen sirimanua sibara ka muntogat Israel siabeuake sabulungannia kabagat patuatnia samba sigalakake kamatania bukku pasisoksok sibeleakenia kabagat puseleat, lepa einia masiailiake nabi. Aku, Tuhan masialeginia kalulut sabulungannia simigi nenda,

⁵ bule Kuala patuat muntogat Israel, sangamberitda arakaddiuakean Aku kabagat aratatnake sabulunganda.

⁶ Kalulut nenda kua ka muntogat Israel: Kise te tiboiet Tuhan Taikamanua: Bauake kam patuatmui samba kaddiuake kam sabulunganmui samba pisikake kam matamui ka senengamata sikatai kasitsitakenen sigalaiakenenmui.

⁷ Kalulut senen sirimanua, sibara ka muntogat Israel ele sirimanua siooiake sikuddu katalagat Israel. Sia situsosoip katubukKu samba siabeuake sabulungan kabagat patuatnia samba sigalakake bukku pasisosoksok kamatania, sibeleakenia kabagat puseleat. Lepa geti einia masiailiake nabi masitiddou enungannia sibara katubukKu. Aku, Tuhan masialeginia.

⁸ Aku le geti masisasaggangi sirimanua nenda, Kugala le nia geti sibailiu tularat samba pasikat samba tutataakenia katalagat paamianKu. Agaimuian getinia Aku te Tuhan.

⁹ Ke iobaake tubunia nabi ka pasisiboat kabagat masikua sara tiboiet, Aku, Tuhan sipasisisibo nabi nenda, oto Kutotoiake le geti kabeiKu masisagganginia samba masisubuakenia katalagat paamianKu Israel.

¹⁰ Rabairat le geti puseleatda, sia sipasititiddou enungan samba leuet nabi,

¹¹ bule bui' ramapepe minca muntogat Israel katubukKu samba buian rapalolit tubutda kabagat sangamberi pinasabaura; oto kalulut nenda bailiunangan sia geti paamianKu samba Aku ibailiu Taikamanuanda, kisedda te tiboiet Tuhan Taikamanua.”

Ukuman taan momoi tukeraake

¹² Iageti oi tiboiet Tuhan katubukKu:

¹³ “Ale togat sirimanua, ke mujo sara laggai katubukKu ibailiu sia sitaimatopit, Kutotoiake le kabeiKu masisagganginia kabagat masisubuake komen sitarekakenenda samba masibaraake pulajeat katubunia samba masitataake sirimanua samba tarimeu ka laggai nenda,

¹⁴ kenanen ai sitelu sirimanua nene katalagatda, iate Noak, Daniel samba Job, sarat enganda le geti raarauake kalulut putotopitda, kise te tiboiet Tuhan Taikamanua.

¹⁵ Ke Kugalai ipugejek tarimeu simasabbak ka laggai nene, sisubuake silaggaijinia, pat bailiunangan simatangeu laggai nenda, samba berisara sirimanua simagege sisabaunia kalulut tarimeu simasabbak nenda,

¹⁶ samba kenanen ai sitelu sirimanua nenda katalagatda, kalulut Aku sipuririmanua, kise te tiboiet Tuhan Taikamanua, ta raarauake tatoga taimanteu samba tatoga tainanalep; sarat sia le tuarauake, tapoi laggai nenda ibailiu le geti simatangeu.

¹⁷ Ke Kubaraake lanjau ka laggai nenda samba kuakungan: Ale lanjau, gejengi laggai nene. Kusappruake le sirimanua samba tarimeu ka laggai nenda,

¹⁸ kenanen ai sitelu sirimanua nenda katalagatda, kalulut Aku sipuririmanua, kise te tiboiet Tuhan Taikamanua, ta raarauake tatoga taimanteu samba tatoga tainanalep; tapoi sarat sia le geti tuarauake.

¹⁹ Ke Kubaraake besi' simasappo ka laggai nenda samba Kubelaake goluKu katubutda, bailiu puguruknangan logau kabagat pasisusubuake sirimanua samba tarimeu ka laggai nenda.

²⁰ Kenanen ai si Noak, Daniel samba Job katalagatda, kalulut Aku sipuririmanua, kise te tiboiet Tuhan Taikamanua, ta raarauake tatoga taimanteu samba tatoga tainanalep, tapoi sarat enganda le raarauake kalulut putotopitda.

²¹ Bulatnia, kise te tiboiet Tuhan Taikamanua: sisaliu sangamberinia nenda, ke Kubaraake ka epat ukumanKu simakope sane nenda, iate lanjau, pulajeat, tarimeu simasabbak samba besi' simasappoka ka Jerusalem bule Kusappruake katubunia sirimanua samba tarimeu!

²² Tapoi bulatnia, mukuddu le geti sedda sirimanua situaarau, sigiritake ka uja tatoga taimanteu samba tainanalep; itco, moi le geti sia katubum samba itcomuiannia geti paraboatda, lepa geti muangka baga le kam pagalaiat pugejaat baga sibaraakenenKu ka Jerusalem, bulatnia, pagalaiat sangamberi sibaraakenenKu katubunia.

²³ Rapusuibi le geti bagamui, ke nuitco kam paraboatda, samba agaimuian getinia ta sitapaluluat Kugalaiake senengamata sigalaiKu katubut Jerusalem, kise te tiboiet Tuhan Taikamanua.”