Jehz. 13 - BUKO SIPUNENAN

Ukuman ka sangamberi tai nabi sipatataju

¹ Iageti oi tiboiet Tuhan katubukku:

² “Ale togat sirimanua, pupatuptup masisaggangi sangamberi nabi Israel. Pupatuptup samba kua katubutda sipupatuptup ka siobat bagatnia: Arepmake tiboiet Tuhan!

³ Kise te tiboiet Tuhan Taikamanua: Paan te kakam sangamberi tai nabi simakela patuat situtnake sikuat patuatnia samba sitaiitco sara pamoilianan.

⁴ Kele jo'jot leleu katalagat karagatat, kisedda te tai nabim, ale Israel!

⁵ Ta anukeraake kam sangamberi lobok iripmui samba ta anurioake kam irip ka sangaliot lalep Israel, bule ioi imariuriu rapurio kabagat pasaggangan ka gogoi Tuhan.

⁶ Pamoiliananda patajuat samba tawatda iate pabokoat; kuarangan: Kise te tiboiet Tuhan, tapoi bulat siripokatnia ta aikoiniake sia si Tuhan, samba rangena le tiboiet nenda igalaiakeNia.

⁷ Ta pa pamoilianan patajuat le anuitco kam samba tawa pabokoat le sikuamui, ke manibo kam: Kise te tiboiet Tuhan, tapoi bulat siripokatnia ta amanibo Aku?

⁸ Kalulut nenda, kise te tiboiet Tuhan Taikamanua, kalulut nutiboake le kam tiboiet patajuat samba masiitco sangamberi pakaroat boko, oto Aku ibailiu le geti saggakmui, kise te tiboiet Tuhan Taikamanua.

⁹ Kutotoiake le geti kabeiKu masisaggangi sangamberi tai nabi sipasiitco sangamberi pakaraoat patajuat samba sitiboake tawa pabokoat.Ta tuaddeake sia ka pusaraat paamianKu samba ta tususuratake sia kabagat surat muntogat, taan tuguguru sia ka polak Israel, agaimuian getinia Aku te Tuhan Taikamanua.

¹⁰ Kalulut, bulatnia rapepeake le paamianKu kabagat masikua: Paabanan! tapoi bulat taanai le paabanan. Sia nenda masirioake irip samba itco, ralokotake le kapurnia.

¹¹ Kua katubutda sipasilolokotake kapur ka irip nenda: mueba le geti urat simatirit, bele le geti urat es samba muboroi le geti rusa talabari.

¹² Ke amabukkatnan irip nenda, ta pa rakukua sirimanua katubum: kaipa kineiget kapur silokotakenenmui nenda?

¹³ Kalulut nenda kise te tiboiet Tuhan Taikamanua: Kabagat goluKu Kugalaiake le geti ipuboroi rusa talabari samba kabagat oloi goluKu mueba le urat simatirit, samba kabagat goluKu bele le geti urat es sipasisubuake.

¹⁴ Kubukkatake le geti irip sikapurmui nenda samba Kubeleakenia ka polak, bule imatoila bongennia. Mabukkatnangan irip laggai nenda samba mateimuian leu kabagania. Samba agaimuian getinia Aku te Tuhan.

¹⁵ Kisedda te Kubelaake goluKu ka irip nenda samba katubutda sipasikakapur nenda samba Kuakungan katubum: Sappru le iripnia samba sappru le sangamberi sirimanua sipasikakapur,

¹⁶ iate sangamberi nabi Israel sipupatuptup pagalaiat Jerusalem samba sipasiitco sara pamoilianan pagalaiat paabanan, tapoi bulat siripokatnia taanai paabanan, kise te tiboiet Tuhan Taikamanua.”

Ukuman ka tai nabi tainanalep sipatataju

¹⁷ “Ekeu togat sirimanua, ipoake matam ka bangsam tainanalep sipupatuptup siobat bagatda samba pupatuptup masisaggangi sia.

¹⁸ Kua: Kise te tiboiet Tuhan Taikamanua: Paan te ka tai kerei tainanalep, siappraake pasiappra jimat ka sangamberi puletcuet kabei samba sipakei tabbot ute ka utet sangamberi sirimanua, simabaja samba sibau tubu, sipasilaba ketcat sirimanua. Taleu nulalaba le kam ketcat sirimanua addeakenen paamianKu samba tuobaake rapurimanua sangamberi sirimanua sabagei sibailiu puuktunganmui?

¹⁹ Anupasabauan kam pusisipunenanKu katalagatda sapaamianKu kalulut pigangatakep pa jelai samba pigangatippu pa roti, kabagat masimateiake sangamberi sirimanua sitaimateu tumateiake, samba tuobaake rapurimanua sangamberi sirimanua sitaimateu murimanua, kabagat nupaboko kam ka sapaamianKu simatarek masingena pabokoat.

²⁰ Kalulut nenda kise te tiboiet Tuhan Taikamanua: Kusaggangi le geti sangamberi apprat jimatmui, pakeietmui masilaba ketcat sirimanua samba Kubiritake le geti ka kabeimui samba masiobaake sangamberi sirimanua silabamui kele sangamberi uma'.

²¹ Kubiritake le geti tabbot utemui samba Kubelaake paamianKu ka kabeimui samba taan ibabailiu sia komen ka kabeimui. Agaimuian getinia Aku te Tuhan.

²² Kalulut anusaggoiji poi kam patuatda sirimanua simatopit kabagat patajuat. Beringan Aku taanai kupareureugi bagania, tapoi bailoknia nukelaake le kam patuatda sirimanua sikatai, bailiu taibauakenangan patuatnia ka paraboatnia sikatai nenda, samba nuobaake le kam rapurimanua.

²³ Kalulut nenda taan nuitco kam pagalaiat patajuat samba titiboat tawa pabokoat; Kubelaake le paamianKu ka kabeimui samba agaimuian getinia Aku te Tuhan.”