Jehz. 12 - BUKO SIPUNENAN

Jehezkiel masipasikatake katuribbaiat Israel

¹ Iageti panibonangan Tuhan katubukku:

² “Ale togat sirimanua, mukuddu le ekeu katalagat muntogat simakela patuat, sibara mata ipasiitco, tapoi ta iitco mata samba sibara talinga ipasirep, tapoi ta maarep piu, kalulut sia iate simakela patuat.

³ Oto ekeu, togat sirimanua, tarekake bibiletnu kele sara sirimanua siribbaiakenen samba puenung sinago kele sara sirimanua siribbaiakenen kamatatda; tuituiake ekeu ka kudduatnu kineiget nuei ka kudduat bagei kele sara sirimanua siribbaiakenen kamatatda. Buleu iagai bagatda, sia nene iate simakela patuat.

⁴ Ambit sangamberi bibiletnu nenda ka uja kele bibilet sara sirimanua siribbaiakenen kateteret sinago kamatatda; samba buita bela ekeu sinoibo kamatatda, kele ibela sara sirimanua samba mei ka kudduat katuribbaiat.

⁵ Galainungan sara lobok kamatatda ka irip samba belaake ekeu sedda.

⁶ Kamatatda kaunungan bibiletnu ka ta'tanu, samba ambit nenda ka uja ka teteret sinoibo simagepgep; buita nutabbo pumataatnu, pat taitconungan polak; kalulut Kugalai le ekeu ibailiu tularat ka muntogat Israel.”

⁷ Lepa galaiakekungan kele siparentaakenen katubukku: abbitkungan sinago sangamberi bibilet kele bibilet sara sirimanua siribbaiakenen samba sinoibo pakeikungan kabeiku kugalai sara lobok ka irip bukku, ka soibo simagepgep bela aku samba kamatatdangan leu kaukungan sangamberi bibiletku ka ta'taku.

⁸ Ka mansepnia oi tiboiet Tuhan katubukku:

⁹ “Ale togat sirimanua, ta pa araparereakean katubum samuntogat Israel, muntogat simakela patuat nenda: Aponia nugagalai nene?

¹⁰ Kua katubutda: kise te tiboiet Tuhan Taikamanua: Tiboiet sipunenan nene pagalaiat rimata ka Jerusalem samba sangamberi muntogat Israel sikuddu sedda.

¹¹ Kua: Aku ibailiu pasikat kakam; kele sigalaiakenenku nene kise te tugagalaiake katubutda: sibailiu sirimanua siribbaiakenen mei le sia geti ka kudduat katuribbaiat.

¹² Rimata katalagatda ikau le geti sangamberi bibiletnia ka ta'tania ka soibo simagepgep samba mei ka uja; ragalai le sara lobok sirimanua ka irip bukku bule ibara enungan kabelaiatnia; itabbo le geti pumataatnia bule ta iitco polak nenda.

¹³ Kubele le geti jarikKu bule kujariknia samba ialania seserekku samba abbitkungannia ka Babel, laggaira tai Kasdim, tapoi taiitco laggai nenda; matei le nia geti sedda.

¹⁴ Sangamberi kabebennia, sipasiroropnia samba saladdunia, Kupasaragai le geti ka sangamberi ipot matat sulu samba Kuoppat le lanjau kateiteira.

¹⁵ Oto agairangan getinia Aku le Tuhan, ke Kusegeake sia katalagat sangamberi bangsa samba kusaragaiake le sia ka sangamberi laggai.

¹⁶ Tapoi Kulelegeiake le sia goiso situarau ka lanjau, ka pulajeat samba ka besi' simasappo, bule rapupumuanake sangamberi sigalaira sikatai katalagat bangsa, kaipa raei; samba agairangannia geti Aku le Tuhan.”

¹⁷ Iageti oi tiboiet Tuhan katubukku:

¹⁸ “Ale togat sirimanua, kom kannu kabagat geret tubu samba lo oinan kabagat lopot samba kabagat karat baga,

¹⁹ samba kua ka sikudduiji laggai nene: Kise te tiboiet Tuhan Taikamanua pagalaiat silaggaiji Jerusalem ka polak Israel: Rakom le kanra kabagat karat baga samba mulo oinan kabagat ingon patuat bule imatangeu polakra kalulut aisappru kabagania, kalulut pukakatai simakope sigalaiakenenda sangamberi sikuddu sedda.

²⁰ Sangamberi laggai kudduijietda peile sirimanua ibailiu le geti karagatat samba polak nenda bailiu le geti simatangeu; samba agaimuian getinia Aku te Tuhan.”

²¹ Iageti oi tiboiet Tuhan katubukku:

²² “Ale togat sirimanua, pasailukat aponia ai katalagamui ka polak Israel, sipasikua: Amaburuan atusabau, tapoi ta' amuaili berisara pamoilianan?

²³ Kalulut nenda kua katubutda: Kise te tiboiet Tuhan Taikamanua: Kuariake le geti pasailukat nene samba taan rakukua minca ka polak Israel. Bailoknia, kua katubutda: teterenia amalegrengan samba muaili le geti senen pamoilianan.

²⁴ Kalulut taan babara minca pamoilianan pabokoat samba leu tawa sipasipepeake katalagat muntogat Israel,

²⁵ kalulut Aku, Tuhan, manibo le geti samba aponia Kutiboake muaili le geti, samba tiboiet nenda taan tukekeraake, kalulut kateteret puririmanuam, ale muntogat simakela patuat, Kukua le sara tiboiet samba galaiakekungan leuetnia, kise te tiboiet Tuhan Taikamanua.”

²⁶ Iageti oi tiboiet Tuhan katubukku:

²⁷ “Ale togat sirimanua, itcopei, samuntogat Israel masikua: Pamoilianan siitconia nenda, mareunan peile gogoinia, sibalat sikuania, maburu peile teterenia.

²⁸ Kalulut nenda kua katubutda: Kise' te' tiboiet Tuhan Taikamanua: Berisara tiboietKu sita'puaaili. Aponia Kutiboake muaili le geti, kise te tiboiet Tuhan Taikamanua.”