Jehz. 11 - BUKO SIPUNENAN

Tuukumake sangamberi siuteake Israel

¹ Iageti akkatakenangan aku ketcat nenda samba abbitnangan aku ka matatbaliu isit sikalaut ka uman Tuhan, matatbaliu simatai ka isit kabelaiat matat sulu. Itco, kabagat matatbaliu nenda ai rua pulu lima sia sirimanua samba katalagatda itcokungan Jaazanya togat Azur samba Pelaca togat Benaya, iate siuteake bangsa.

² Kuanangan katubukku: “Ale togat sirimanua, nene te sirimanua siisiake pukakatai samba sikarapake nganturat sikatai ka laggai nene,

³ sipasikukua: Ta pa ta mauju tugalai minca lalepta? Laggai nene te pariok samba sita akkulania.

⁴ Kalulut nenda pupatuptup masisaggangi sia, pupatuptup, ale togat sirimanua!”

⁵ Iageti salukinangan aku Ketcat Tuhan samba kuanangan katubukku: “Kua: Kise te tiboiet Tuhan: Anukuangan kam, ale muntogat Israel, samba Kuagai aponia sibabara kabagat patuatmui.

⁶ Sangamberi sirimanua simateiakenenmui makokope le imaigi samba nusunake le kam sia ka sangamberi enunganda.

⁷ Kalulut nenda kise te tiboiet Tuhan Taikamanua: Sangamberi sirimanua simateiakenenmui ka laggai nene, sia te akkulania samba laggai nene te pariok, tapoi Kugigiritake te kam bela kabagania.

⁸ Maloto le kam ka lanjau, tapoi Kubaraake le geti lanjau katubumui, kisedda te tiboiet Tuhan Taikamanua.

⁹ Kugiritake le geti kam bela kabagania samba segeakekungan kam kakabeira siooiake samba akekungan leu ukuman katubumui.

¹⁰ Mutagguilu le kam kalulut lanjau samba ukumkungan leu kam ka polak Israel; samba agaimuiannia geti, Aku te Tuhan.

¹¹ Laggai nene ta ibabailiu pariok kakam ele ibailiu kam kele akkula kabagania; Kuukum le kam ka polak Israel.

¹² Samba agaimuiannia geti, Aku te Tuhan, kalulut paraboatmui ta siripot sangamberi siteuakenenKu samba sangamberi surukatKu ta anugalaiake kam; sarapei anugalaiake le kam sangamberi surukatda tai bangsa sikuddu kabebemui.”

¹³ Kateteret aiaku mupatuptuman, matei si Pelaca togat Benaya. Lepa purekkukungan samba musoga ka nganga sabeu, kuakungannia: “Ena, Tuhan Taikamanua, taleu nusasappruake le tai Israel sipulelegei?”

Palelengan pagalaiat pasibaugat Israel

¹⁴ Iageti panibonangan Tuhan katubukku:

¹⁵ “Ale togat sirimanua, sangamberi sipulaggai ka Jerusalem masikua pagalaiat sangamberi sasarainamui, pagalaiat samuntogatmui samba sangamberi muntogat Israel: Atuareuan sia katubut Tuhan, tuake le polak nene kakai ibailiunia bakkatmai.

¹⁶ Kalulut nenda kua: Kise te tiboiet Tuhan Taikamanua: Kenanen Kuabbit sia ka reunan baratda katalagatda tai bangsa samba tusaragaiake ka sangamberi laggai nenda samba piga pa tetere ujunia ibailiu le Aku kudduat sipunenan ka sia,

¹⁷ kalulut nenda kua: Kise te tiboiet Tuhan Taikamanua: Kupatataddeake te kam baramui ka tai bangsa samba masiruruake kam baramui ka sangamberi laggai ka kudduat katusaragaiatmui, samba akekungan geti katubumui polak Israel.

¹⁸ Oto kalepat raoi sedda, areuakerangan geti sabulunganda kasitsitakenen samba sangamberi sikatai sigalaiakenenda ka polak nene.

¹⁹ Kukau le geti patuatda bagei samba ketcat sibau katubutda. Areuakekungan leu katubutda kelat patuat, samba kaukungan leu patuat simareddet,

²⁰ bule rapurimanua siripot sangamberi siteuakenenKu samba sangamberi surukatKu kabagat riuriu topit; oto bailiunangan sia paamianKu samba bailiunangan geti Aku Taikamanuanda.

²¹ Pagalaiat sia, simaron patuat ka sabulungan kasitsitakenen samba ka sangamberi galajet sikatai, Kuorakake le galai tubutda ka utera, kise te tiboiet Tuhan Taikamanua.”

²² Iageti akkatakerangan kappora sangamberi tularat malaika nenda, samba pungoingoinangan sangamberi rodania pasamba sia, oto pulatsanan Taikamanuan Israel ai kapata ka ipo'ra.

²³ Lepa tusakainangan pulatsanan Tuhan kapata barania katalagat laggai samba tuleunangan ka uddut leleu ka isit sikalaut laggai.

²⁴ Akkatakenangan aku Ketcat nenda samba abbitnangan aku minca kabagat pamoilianan sibara ka Ketcat Taikamanua ka laggai Kasdim katubutda sirimanua siribbaiakenen. Lepa mapepenangan pamoilianan siitcoku nenda

²⁵ samba segeakekungannia ka sirimanua siribbaiakenen nenda sangamberi sipatoilat Tuhan katubukku.