Jehz. 10 - BUKO SIPUNENAN

Pulatsanan Tuhan masikaddiuake Uma Sipunenan

¹ Lepa itcokungan, bulatnia, ka uddut manua sikuddu ka utet malaika makoinong ka utera sara kele uddenan purimataat, ituitconia kele pulaingean lazurit.

² Iageti kuanangan ka sirimanua sipuleppei komak juto nenda: “Guruake ekeu ka tei tularat malaika ka paoggangan sangamberi rodania samba sunake takepnu bot obengan katalagat tularat malaika nenda samba so'so'ake ka uddut laggai nenda.” Lepa itcokungannia ituguru'.

³ Sangamberi tularat malaika nenda murio ka isit kaiaman Uma Sipunenan, kateteret aratuguru' sirimanua ka talagat sangamberi roda; samba salukinangan pugeratat kabaga sangatappa tanai rusa.

⁴ Kateteret aitusakai pulatsanan Tuhan ka uddut tularat malaika nenda samba ei ka uddut taggat matatbaliu Uma Sipunenan, samba Uma Sipunenan nene salukinangannia tanai rusa nenda samba laibokat sun le torot pulatsanan Tuhan.

⁵ Nau kappot tularat malaika nenda maarep pat aili ka laibokat ka uja kele ngangan Taikamanua Sipulubeunan, ke maniboNia.

⁶ Koiniakenangan sirimanua sipuleppei komak juto nenda: “Ala obengan katalagat sangamberi rodania, katalagat sangamberi tularat malaika nenda!” Iageti sirimanua sipuleppei komak juto einia samba purionangan kabebet ka sara roda nenda.

⁷ Lepa geti sara tularat malaika nenda totoiakenangan kabeinia katalagat samalaika ka obengan sikuddu ka talagatda. Alanangan goiso samba kaunangan ka takep sirimanua sipuleppei komak juto. Silonangannia sirimanua nenda samba tuituinia.

⁸ Ka sangamberi tularat malaika nenda makoinongnangan kele kabei sirimanua ka tei kappora.

⁹ Itcokungan, bulatnia, kabebet sangamberi tularat malaika nenda ai epat roda, sara roda kabebet sara tularat malaika, samba ituitco sangamberi roda nene kele kirisau pulaingean pirus.

¹⁰ Ituitco ka epatnia iate makere, kele roda sisara ai katalagat roda bagei.

¹¹ Ke muenung sia momoi raei ka epat matat rusa samba ta rasosoksok; kalulut kaipa kudduat ailiakenen sikuddu kamata, sedda te raei sabagei, ta rasosoksok.

¹² Sangaliot tubutda, teiteira, kabeira, kappora, samba sangamberi rodatda sun le mata, bulatnia, kisedda leuet ka epat rodatda.

¹³ Akuarep sangamberi rodatda nenda tuoniake “Kasou Baliok”.

¹⁴ Senesenenda ai epat pumataatda: pumataatnia siboiki iate pumataat malaika, sikarua iate pumataat sirimanua, sikatelu iate pumataat singa samba sikaepat iate pumataat manyang.

¹⁵ Sangamberi tularat malaika nenda tusakai kapata. Nenda te sipuririmanua siitcoku siburu kabebet oinan Kebar.

¹⁶ Ke muenung sangamberi tularat malaika nenda, puenungnangan leu sangamberi roda nenda kabebera; ke raakkatake kappora tularat samalaika nenda ratuburut baratda ka polak, sangamberi roda nenda ta mungongoingoi kabebera.

¹⁷ Ke muari sangamberi tularat malaika nenda, puarinangan sangamberi roda nenda, ke tusakai sangamberi tularat malaika nenda kapata, tusakairangan leu simakere pasamba sangamberi roda nenda; kalulut ketcat sangamberi sipungongoingoi nenda iate ai kabagat sangamberi roda nenda.

¹⁸ Iageti putuituinangan pulatsanan Tuhan nenda ka taggat matatbaliu Uma Sipunenan samba tuleunangan ka uddut sangamberi tularat malaika.

¹⁹ Akkatakerangan kappora tularat samalaika nenda, samba kateteret aratuitui, itcokungan, aratusakai baratda ka polak pasamba sangamberi roda. Lepa puarirangan kabebet matatbaliu uman Tuhan ka isit kabelaiat matat sulu, oto pulatsanan Taikamanuan Israel ai kapata ka ipo'ra.

²⁰ Nenda te sipuririmanua siitcoku siburu ka tei Taikamanuan Israel kabebet oinan Kebar. Samba kuagai, sia nenda iate tularat samalaika.

²¹ Senesenenda ai epat pumataatda samba ka senenenda ai epat kappo samba ka tei kappora ai kele kabei sirimanua.

²² Ituitco pumataatda makere pumataat siitcoku kabebet oinan Kebar. Senesenenda muenung simaroipo kamata.