Jak. 4 - BUKO SIPUNENAN

Pasuruangan ka taikapolak

¹ Kaipa kabaraiatnia pasaggangan samba pagolukat ka talagamui? Ta pa sibara ka pubotbonan sipauukele ka bagat tubumui?

² Ainubebesiake kam, tapoi ta babara, lepa pasimateimuian. Mututu kam baga, tapoi ta sesege kam ka besiakenenmui, lepa pajoggolomuian samba pagolumuian. Ta babara apa pa ka kam, kalulut ta maninindou kam.

³ Ele kenanen manindou leu kam, tapoi ta nusisilo kam apa pa, kalulut masele panindogatmui; aipoi sinindoumui nenda, ka pubotbonan tubumui le nusasappuruake kam nia.

⁴ Kam sipaeelet! Ta nuagai kam, pasuruangan ka taikapolak nene, pasaggangan ka Taikamanua le? Oto kasei sibailiuake tubunia suruak taikapolak nene, aibailiuakean tubunia saggak Taikamanua.

⁵ Ele ka bagamui siboboi le sikuat Surat Sipunenan, “Ketsat sikudduakenen Taikamanua ka bagata, maron puoobania.”

⁶ Tapoi abeu pei le kiliu baga sipanguruatnakenennia ka sita. Ia te lulunia aikua Surat Sipunenan, “Isasaggangi Taikamanua le simabuak paatuat, simaepe paatuat geti ikikiliu le.”

⁷ Oto pusum kam ka Taikamanua, saggangi kam Sanitu, kaddiuakenangan kam.

⁸ Legeri le kam Taikamanua, legerinangan leu kam. Linaake kam kabeimui, kam sirimanua sijo! Linaake kam paatuatmui, kam simarua paatuat!

⁹ Seseake kam kalilimaimui, pureureu kam baga samba pusou kam; gagamui kau ibailiu soumui samba angkat bagamui bailiu reureu bagamui.

¹⁰ Paepe kam tubumui ka matat Tuhan, buakngakenangan kam geti.

Bui masitiboi sirimanua

¹¹ Ale sasarainangku, bui nupatiboi kam pasasambamui! Sitiboi sarainania, ele siseleake nia, ia te sipaloloi surukat ele siseleake surukat. Ke nuseleake surukat, oto ta sipasirereddet surukat ekeu, sipasiukum surukat le.

¹² Sarat sara Sipasiaake surukat samba Sipasiukum, ia te nia simagege masiarauake samba masilangoake. Kasei te ekeu, iooi nuseleake pasambamui sirimanua?

Bui masiumunake tubu

¹³ Arep kam, kam sipasikukua, “Gogoi nene ele mancep mei kai ka laggai anu, kuddu kai sedda pasaki samba masigaba bulagat.”

¹⁴ Apa sibabara ka purimanuaiatmui mancep tapei nuagai kam. Aipoi purimanuaiatmui samba le kele kujuk sitaimauju tuitco, lepa tata.

¹⁵ Siripokatnia kise le nukukua kam, “Ke iobaake bai si Tuhan samba murimanua kai, galaimaian nene samba nenda.”

¹⁶ Kise nuumunake le kam tubumui ka buak paatuatmui. Pasiuumunmui tubu kele nene, katai le.

¹⁷ Oto siagai masigalai simaeru, tapoi ta igagalaiake, bailiu jo le ka tubunia.