Jak. 3 - BUKO SIPUNENAN

Jo kalulut lila

¹ Ale sasarainangku, bui maigi ka talagamui sibesiake bailiu guru; nuagai poi kam, sita sibailiu guru maoru te ukuman siloketta.

² Aipoi sangamberita mareirei masele. Ke ai kasei pa sitaimasele ka bagat tiboietnia, ia te sirimanua simasun eru, siooi masipaneinei tubunia.

³ Ke takau ratsat ka ngungun kuro bule itut sita, oinangan leu tatiktik sangamberi tubunia.

⁴ Itco leu kam kapal, kenanen makope beu samba iboroi nia rusa simaron, momoi imuriake nia gurungan sigoiso siripot siobat bagat jurumuri.

⁵ Kisedda leu lila, kenanen laddou tubuta sigoiso le nia, tapoi momoi iumunake tubunia ka pagalaiat apa pa simabeunan. Paatu leu kipa goisonia api, momoi ilabo leleu sabeu.

⁶ Lila leu, kele api le nia, polak pukataikat le nia, mukuddu nia ka talagat laddou tubuta sipalolit sangalio tubu samba ikau malabo sangalio purimanuaiatta, api sibara ka narako ikau masilabo nia.

⁷ Sangamberi ngamataat tarimeu simalia, paumauma, leiti sipugugurui samba sipungongoingoi ka koat, momoi tupaum samba araumakean sirimanua.

⁸ Lila geti ta anai sirimanua siooi masiumake nia. Bulat sikatai, sitaiagai pareddet le nia, sisun lagat omai simateiake sirimanua.

⁹ Lila tapakei kam masiumun Tuhan, Ukkuita samba lila leu et tapakei kam masitelei sirimanua sibaraakenen siripot tularat Taikamanua.

¹⁰ Sibara ka sara ngungu nenda leu et bela panukanan samba pateleiat. Siripokatnia sasarainangku, ta momoi ibara kele nene.

¹¹ Ai pa bubuakat sibelaake oinan simananam samba simapongit ka matat bubuakat nenda leu et?

¹² Ale sasarainangku, momoi pa loinat sileu masibuaake jambu, ele anggur masibuaake sileu? Kisedda leu bubuakat simakalo ta momoi ibelaake oinan simananam.

Sikut paatuat sibara ka pata

¹³ Kasei ka talagamui simasiku paatuat samba simaagai? Kau le ipatoila ka puririmanuania simaeru sangamberi sigalainia ka bagat sikut paatuat sibara ka leppet baga.

¹⁴ Tapoi ke ai tutut baga samba masipuuktungi tubuna le ka paatuatmui, bui nuumunake kam tubumui samba bui nupaboko kam masisaggangi pubulanan.

¹⁵ Sikut paatuat kele nene, ta sibara ka pata; sibara ka polak le, siobat bagat sirimanua, siobat sanitu.

¹⁶ Kaipa poi ai tutut baga samba masipuuktungi tubu, sedda te pulamagat samba sene ngamata galajet sikatai.

¹⁷ Sikut paatuat sibara ka pata geti ia te: siboiki malina, sioba paaban, maleppe baga, mareddet, masun katet baga samba bua simaeru, ta magoa baga samba ta anai patajuat.

¹⁸ Samba buat puroipoat ia te sikaramakenenda ka bagat aban sia sioba aban.