Jak. 2 - BUKO SIPUNENAN

Bui masiitco putubuat

¹ Ale sasarainangku, kam sikatonemi Jesus Kristus, Tuhanta simalatsat, bui nuiggat kam sirimanua kalulut masiitco tubu.

² Ke tuguru bai sara sirimanua ka parurukatmui sibara sipsip mas samba leppei simalainge, lepa oi leu sara simageba sipuleleppei sikatai,

³ roroimuian sipakei leppei simalainge nenda, kuamuian ka matania, “Uddetnake ekeu sene ka simaeru!” Ka simageba geti nukua kam, “Rioake ekeu sedda!” ele, “Uddetnake ekeu ka bagat lalep, ka bebet kalak rereku!”

⁴ Ta anugalaian kam paigganan ka pasasambamui samba nukau kam tubumui sipasiukum sipupaatuat sikatai?

⁵ Arep kam sasarainangku kilibet baga! Ta aipilingan Taikamanua sia simageba ka polak nene ramakayo ka bagat tonem baga, samba bailiu sipasiikep purimataat sinibalaakenennia ka sia sipununtuki nia baga?

⁶ Tapoi nupaloloi le kam simageba. Ta sia simakayo sipajo kam samba sipagirit kam ka pasiukuman?

⁷ Ta sia poi sipasiaasa Oni simaeru, sibailiuake kam bakkat Taikamanua?

⁸ Ke bulatnia nugalaiake kam surukat purimataat sitususurat ka Surat Sipunenan, “Pununtuki baga aleinu sirimanua kele tubum,” anugalaian kam simaeru.

⁹ Tapoi ke nuiggat le kam sirimanua, amajongan kam, ukumnangan kam surukat lulut pasasabaumui nia.

¹⁰ Kasei sireddet sangamberi surukat, tapoi ipasabau sara, amaselengan nia ka sangamberinia.

¹¹ Aipoi nia sipasikukua, “Bui nupaelet,” nia leu masikua, “Bui nupamatei.” Ke ta bai paelet ekeu, tapoi pamatei, sipasabau surukat leu et ekeu.

¹² Oto ke manibo samba nugalai kam apa pa, repdep kam, ukumakenen surukat sipasiuujaake sirimanua te kam.

¹³ Aipoi ukuman si ta katet baga le kaunen ka tubuda sitaigalai katet baga. Tapoi katet baga le mamamanang ka ukuman.

Tonem baga samba pasigagalaiake

¹⁴ Apa kauta nia, sasarainangku, ke ai sipasikukua matonem bagania, tapoi ta anai pasigagalaiake? Momoi pa tonem baga kele nenda masiarauake nia?

¹⁵ Ai bai sara sarainanta ele maniuta si ta leppei samba simagulai kan senen gogoi,

¹⁶ samba ai sara ka talagamui masikua, “Kenanan ka erut baga, pakei leppei simakeppu samba pukom teret ektek!”, tapoi ta anai ikau apa pa besiakenen ka tubunia, apa kauta nia?

¹⁷ Kisedda leu te tonem baga: Tonem baga ke ta sialei pasigagalaiake, simamatei le tonem baga nenda.

¹⁸ Ele ai sipasikukua, “Kekeu ai tonem baga, kaku ai pasigagalaiake,” kualegi nia, “Pakoinong kaku tonem bagam sitaialei pasigagalaiake, kupakoinong kaku tonem bagaku sialei pasigagalaiake.”

¹⁹ Matonem bagam sara le Taikamanua? Maeru nenda. Tapoi beri sanitu matonem bagada samba mugeret tubuda.

²⁰ Ale sirimanua taiagai paatuat, noba nuseseake nia kineneiget pagalaiat tonem baga sitaialei pasigagalaiake, tonem baga si ta baga le?

²¹ Kai Abraham, ukkuita, ta pa kalulut sigalaiakenennia aiparoipo nia Taikamanua, ka teteret aibuluake togania si Isak ka pasibuluat?

²² Itco pei, tonem baga samba pasigagalaiake samba ipugalai, samba kalulut pasigagalaiake le imamumuine tonem baga.

²³ Sedda te ipuaili siniboi Surat Sipunenan sipasikukua, “Matonemnangan bagat Abraham ka Taikamanua, addeakenangan ka tubunia Taikamanua puroipoatnia.” Ia te lulunia tuoniake si Abraham, “Suruak Taikamanua.”

²⁴ Oto anuitcoan kam, kalulut pasigagalaiake le tuparoroipo sirimanua, ta sarat tonem baga.

²⁵ Kisedda leu et si Rahab, sinanalep sijo; ta kalulut sigalainia atuparoipo nia, ka teteret aisilo ka lalepnia tai Israel sipananaiko, samba aibelaake sia ka enungan bagei?

²⁶ Aipoi kele tubu si ta ketsat, simamatei le; kisedda leu tonem baga sitaialei pasigagalaiake, simamatei le tonem baga nenda.