Jak. 1 - BUKO SIPUNENAN

Salam

¹ Salam sibara kaku Jakobus, pagugulet Taikamanua samba Tuhan Jesus Kristus, masiailiake sipulurua muntogat sikuddu ka puekpangan.

Tonem baga samba sikut paatuat

² Ale sasarainangku, ke iorak kam sene ngamata pasisiboat, addeake le kam nia puuktungan,

³ nuagai poi kam, pasisiboat tonem bagamui masibaraake om baga.

⁴ Tapoi om baga nenda kau ibaraake bua simatua, bule ibailiu kam simasun eru samba simamuine, ta anai simagulai apa pa.

⁵ Ke ai ka talagamui simagulai sikut paatuat, kau itiddou nia ka Taikamanua, – sipasikakau ka sangamberi sirimanua ka anggai bagania samba ta iaatsiake –, ta isosoppi ikau nia ka tubunia.

⁶ Tapoi kau le ka tonem baga itiddou nia, bui ka karat baga; aipoi simakarat baga makere le nia onun koat siboroiat samba sibuubugat rusa.

⁷ Sirimanua kele nenda bui maro bagania isilo apa pa sibara kai Tuhan;

⁸ aipoi simarua paatuat ta maririuriu puririmanuania.

Pugebakat samba pukayoat

⁹ Saraina simageba kau imaangka bagania ke ibuakngake nia Taikamanua,

¹⁰ samba simakayo kau imaangka bagania ke iepeake nia Taikamanua, tatata le poi nia kele botcoket turuturu.

¹¹ Aipoi bela ibela sulu iake oloi simaraka, malajunangan turuturu, ragatnangan botcoketnia, tata itata latsatnia. Kisedda leu te simakayo; tatata le nia ka talagat aieenungake pukayoatnia.

Pasisiboat

¹² Mauktuk te sirimanua siomake pasisiboat, aipoi ke amoian iomake pasisiboat, silonangan kirit purimanuaiat sinibalaakenen Taikamanua ka sipununtuki nia baga.

¹³ Ke ai kasei pa siorak pasisiboat, bui ikua, “Pasisiboat nene sibara ka Taikamanua!” Aipoi Taikamanua ta momoi isibo nia sikatai samba leu ta isisibo kasei pa.

¹⁴ Itusisibo senen sirimanua geti lulut paniktingan samba pananakat pubotbonan tubunia le.

¹⁵ Baga ipubaga pubotbonan, tutuakenangan jo; tua imatua jo, tutuakenangan kamateiat.

¹⁶ Sasaraina kilibet bagaku, bui numapepe kam!

¹⁷ Senen siloket simaeru samba panguruat sipulelelek sibara ka pata le, ka Ukkui pupatokat; ka tubunia ta anai pasiliat ele pasakkeriat kalulut pasiliat.

¹⁸ Sibara ka teu bagania le aitutuake sita kalulut tiboiet pubulanan, bule ibailiu sita sikebbukat ka sangamberi sibaraakenennia.

Masiarep samba masigalaiake

¹⁹ Repdep kam sasaraina kilibet bagaku! Senen sirimanua kau maruei masiarep, tapoi bui maruei manibo samba bui maruei mugolu.

²⁰ Aipoi golut sirimanua ta ibabaraake simaroipo ka matat Taikamanua.

²¹ Oto ribbaiake le kam sangamberi pulolinan samba pukataikat simaigi, samba silo le kam ka leppet baga tiboiet siurepmakenen ka paatuatmui, simagege masiarauake ketsatmui.

²² Kau le ibailiu kam sipasigagalaiake tiboiet, bui sarat masiarep masibokoi tubuna.

²³ Aipoi kasei pa ke sarat masiarep tiboiet le, tapoi ta igagalaiake, makere le nia ka sirimanua sikinere pumataatnia ka puailiggobat.

²⁴ Lepa aiitco tubunia, tui nia, kalipoginangan leu kipa pagalaiat tubunia.

²⁵ Tapoi kasei silelekngake surukat sisun eru, ia te surukat siujaake sirimanua, samba mariuriu nia ka bagania, ta sarat areparep kalipou, tapoi bulat igagalaiake le, nia te mauuktuk kalulut gagalaiakena nia.

²⁶ Ke ai kasei pa siaddeake tubuna simasuru arat, tapoi ta ipasisikeli lilania, aipatajungan tubunia, siboboian le pususurunia arat.

²⁷ Puaarat simalina samba si ta loloiet ka matat Taikamanua Ukkuita, ia te: masibalou sipululusai siputataina samba sipululumang ka bagat gejat bagada, samba masijago tubu bui ilolitnake nia polak nene.