Ibr. 8 - BUKO SIPUNENAN

Jesus Imam Sabeu pakerekat baga sibau

¹ Oto bulat bagania sangamberi siniboita ia te: Aian ka sita Imam Sabeu sikuddu kai kattoet uddenan purimataat Sipulubeunan ka sorga,

² samba sipasikeli pasikelat ka kudduat sipunenan, ia te sapou sipulelelek, sirioakenen Tuhan, ta sirioakenen sirimanua.

³ Aipoi senen imam sabeu turioake bule ibuluake panguruat samba buluakenen; ia te lulunia Imam Sabeu Jesus buita ai leu buluakenennia.

⁴ Ke ka polak bai ikuddu, ta leu ibabailiu nia imam, aian poi sia tai imam sibuluake buluakenen siripot aturan Surukat.

⁵ Pugagalaira ia te tularat samba ailiggou sibabara ka sorga, kele sinegeakenen Taikamanua kai Mose, ka teteret igalai sapou, “Repdep,” ngangania, “galai sangamberinia siripot tularat sinausau ka tubum ka uddut leleu.”

⁶ Kineneiget Jesus masisilo pasikelat sisaliu beunan pasikelatda siburu, bailiu poi nia Sipatalaga palelengan sisaliu latsat, sipubobongen ka palelengan sisaliu eru.

⁷ Aipoi ke bai ta anai gulainia palelengan siboiki, taan leu tugagaba minca kudduat sikarua.

⁸ Aiitco poi Taikamanua seleda sabangsania, kuanangan, “Babarangan le te gogoinia,” ngangan Tuhan, kubaraake pakerekat baga sibau, aku, uman Israel samba uman Juda.

⁹ Taan kele pakerekat baga sigalaiku ka taikebbukatda, ka teteret akupalulu sia bela ka laggai Misir. Sia le poi amasipakatai pakerekat bagaku, aku leu, taan kupuuku sia,” ngangan Tuhan.

¹⁰ “Nean le pakerekat baga baraakenenku ka uman Israel pasat oggak nene,” ngangan Tuhan. “Ka bagadangan le kukakau surukatku, ka paatuatdangan le kususurat nia, bailiu aku Taikamanuanda samba sia bailiu bangsaku.

¹¹ Taan pangangantoman sia pasasambada taikaumanda, ele saraina ka saraina masikua, ‘Agai si Tuhan!’ Sangamberidangan le poi iaagai aku, barania ka sigoiso aili ka sabeu.

¹² Kuaappeakean le poi seleda, joda leu taan kurerepdep.”

¹³ Ka bagat kukuana pakerekat baga sibau, sedda ipatoila siboiki amaburuan. Samba apa simabuburu samba simababaja, tataakenenan le.