Ibr. 7 - BUKO SIPUNENAN

Kristus samba Melkisedek

¹ Aipoi si Melkisedek nene, ia te rimata ka Salem samba imam Taikamanua Sipulubeunan; ia te sieei masiroroi si Abraham kele aitoili si Abraham masikalaake tai rimata samba isukatnake nia.

² Ka tubunia leu aikau si Abraham saparpulu ngarubeiat ka sangamberi sirauraunia. Katukolobat onin Melkisedek ia te siboiki rimata puroipoat, samba leu rimata Salem, tibonannia rimata paabanan.

³ Si ta ukkui le nia, si ta ina, si ta paninikat, gogoinia ta anai panandaatnia samba purimanuaiatnia ta anai kalepakat samba kalulut tupakereake nia ka Togat Taikamanua, riuriu le nia imam teret buruburu.

⁴ Itco pei kam beunannia si Melkisedek. Si Abraham, taikebbukatta, masikau ka sia saparpulu ka sangamberi bibilet simaeru sirauraunia ka pasaggangan.

⁵ Samba sia sapunuteteu Lepi, sipaninilo galajet puiimam, ai ka sia patonekat siripot surukat, masisilo saparpulu ka bangsa Israel, ia te sibara ka sasarainanda, kenanen sia punuteteu Abraham leu et.

⁶ Tapoi si Melkisedek, ta sibara ka punuteteu Lepi, aialaan saparpulu sibara kai Abraham samba isukatnake nia, kenanen sipasiikep palelengan Taikamanua le nia.

⁷ Kirenangan ta iagai tusakkala, simabeunan le masisusukatnake simagoiso.

⁸ Sene sipaninilo parsapulu sirimanua simamateiet, tapoi sedda nia simunengakenen masisilo saparpulu, riuriu le ipurimanua.

⁹ Oto momoi tukua, si Lepi leu sipaninilo saparpulu, aikauan sisaparpulu kalulut si Abraham,

¹⁰ aipoi kenanen tapei amututu matania, aian nia ka tubut taikebbukatnia ka teteret aipaailiake taikebbukatnia si Melkisedek.

Kristus ia te Imam sisaliu beunan Aron

¹¹ Oto ke puiimamda tai Lepi bulat asutnan bai – kalulut puiimam nenda poi arasilo Surukat tai Israel – turirioake pei le kodda imam sabeu bagei siripot aturan Melkisedek samba pugagalainia ta aikua siripot aturan Aron?

¹² Aipoi ke ai pasiliat puiimam, oto Surukat leu tusili.

¹³ Aipoi nia sikuania sene, rubeiat suku bagei le; ka suku nene ta anai beri sara sipasikeli buluakenen.

¹⁴ Aipoi bulat amakolouan, Tuhanta sibara ka punuteteu Juda le, samba pagalaiat suku nene ta anai apa pa aikua si Mose pagalaiat tai imam.

¹⁵ Samba ituppai pei le kolounia, ke turioake minca imam bagei kele pagalaiat si Melkisedek,

¹⁶ sibailiu imam ta siripot aturan surukat sirimanua, tapoi siripot purimanuaiat sitaitatata le.

¹⁷ Aipoi pagalaiat nia aimunengakean, “Imam teret buruburu le ekeu, siripot aturan Melkisedek.”

¹⁸ Kirenangan aturan sibaraakenen siburu tuaariake kalulut taan maron samba taan anai kauta nia, –

¹⁹ aipoi Surukat ta ibabaraake katumuinekat – tapoi kineneiget aiguruakean sita ka pukakaronan simaeru, silegereake sita ka Taikamanua.

²⁰ Ai pei bagei sialei suppa le. Rapuimam ka sia sabagei geti si ta suppa le,

²¹ nia ka sia geti sialei suppa le, sisuppaakenen Taikamanua sipasikukua ka tubunia, “Aisuppaakean si Tuhan samba ta ioolei bagania: Imam teret buruburu le ekeu.”

²² Kisedda te aibailiu Jesus sipasiroronake palelengan bulat simaron.

²³ Sipuiimam siburu maigi sia, aipoi ta ioobaake sia kamateiat ramariuriu muimam.

²⁴ Jesus geti, kalulut simariuriu le nia teret buruburu, oto puiimamnia ta tukakau ka sabagei.

²⁵ Ia te lulunia iooi iarauake sipulelelek sangamberi sirimanua siooi ka Taikamanua kalulut nia. Riuriu le poi ipurimanua ibailiu nia sipasititiddouake sia.

²⁶ Imam Sabeu kele nene poi maakkup ka sita: sipunenan, si ta sele, si ta lolit, sinaraakenen ka sirimanua sijo, samba sibuakngakenen ka pamanuamanua;

²⁷ ta kele tai imam sabeu bagei, sisenen gogoi masibuluake buluakenen pasiappet jonia ka sia, lepa nenda ia pei jot bangsania; aipoi sangaminca le lepa aigalaiake nia teret buruburu, ka teteret aibuluake tubunia.

²⁸ Aipoi Surukat, sirimanua simasaggoet le airioake bailiu imam sabeu, tapoi suppa sisuppaakenen pasat Surukat masirioake Toga, sisun eru teret buruburu.