Ibr. 6 - BUKO SIPUNENAN

¹ Oto tagalakngakean kam nganturat panandaat pagalaiat Kristus, tariuriuake masiailiake simasun. Buian taoleake minca masigalakngake bongen pasibaugat paatuat ka galajet siboboi, samba bongen putoneman baga ka Taikamanua,

² ia te nganturat pagalaiat pasiraukat, pasitoneman kabei, katusuruat simamatei samba ukuman sialu.

³ Masituppaiakean le tagagalaiake, ke iobaake Taikamanua.

⁴ Aipoi sia, ke atutoroijingan paatuatda sangaminca, arananaman panguruat sorga, samba amueneuan sia ka bagat Ketsat Sipunenan,

⁵ samba arananaman tiboiet sibara ka Taikamanua samba arananaman geget gogoi sialu sibabara geti,

⁶ tapoi lepa siksikrangan teiteira minca, taan iagai tuoleake sia minca ka pasibaugat paatuat, aipoi arasiliktengaakean minca Togat Taikamanua ka tubuda samba rapakaila nia ka matat siberikabaga.

⁷ Aipoi polak sipasipopotpot urat simareirei bele ka uddutnia, samba itutuake uremen simaeru ka sia sipasigagalai, rasilo uktuk sibara ka Taikamanua.

⁸ Tapoi ke rui samba bekbekkurut le itutuake ta anai kauta nia, teleietnan le, kalepakatnia tulaboake.

⁹ Tapoi sasaraina kilibet baga, kenanen kukua kai kisedda pagalaiat kam, matonem bagamai aian ka kam simaeru sibaraake puaragat.

¹⁰ Aipoi ta sitaimaroipo Taikamanua bailiu ikalipogi galajetmui samba nuntut baga pinatoilamui ka oninia, kalulut pasikelatmui ka sia sipunenan, samba teret kineneiget ainupasisikeli kam.

¹¹ Tapoi kiddietmai, bule nupakoinong kam senemui ngamang kele nenda, imamuine pukakaronanmui teret kalepakat,

¹² bule ta ibailiu kam simabeili, tapoi bailiu sipasitututnake sia sipasiikep palelengan Taikamanua kalulut tonem baga samba om baga.

Palelengan Taikamanua ta isisili

¹³ Aipoi ka teteret aikau palelengan kai Abraham Taikamanua, ka tubunia le aipusuppa, ta anai poi kasei pa sisaliu beunannia,

¹⁴ kuanangan, “Bulatnia kususukatnake ekeu samba kuiigiake ekeu.”

¹⁵ Kele aingenaake nia si Abraham ka om baga, silonangan leu siripot palelengan ka tubunia.

¹⁶ Aipoi sirimanua musuppa ka onin sirimanua siabeu ka tubunia, samba suppa nenda pasiron ka tubunia, silepaake sangamberi pajoggolat.

¹⁷ Kalulut ioba Taikamanua masipakoinong imakope ron tonem bagada sipasiikep palelengan pagalaiat taisisilina siteuakenenia, ronakenangan nia Taikamanua ka bagat suppa,

¹⁸ bule kalulut sirua toggaiat sitaioi tusili, ka bagat nenda ta maboko Taikamanua, sita sigaba pukuneman bara ka sita patubbuiat simaron masiagoi karonietta sikuddu ka matata.

¹⁹ Pukakaronan nenda ia te kele sao sitaioi tugeugeu samba simaron ka ketsatta, sisaoakenen pat aili ka teitei komang kekere,

²⁰ ka kudduat situguruna Jesus sipapa enunganta, sibailiu Imam Sabeu teret buruburu siripot aturan Melkisedek.