Ibr. 3 - BUKO SIPUNENAN

Jesus pei le abeu kai Mose

¹ Oto sasaraina sipunenan, sipururubeiat ka bagat pasogaiat sorga, mattai kam Apostel samba Imam Sabeu munengakenenta, ia te Jesus,

² simatopit ka tubut Taikamanua sipasikokoiniake nia, kele si Mose simatopit masipasikeli lalep Taikamanua.

³ Aipoi tuaddeake nia mateu masisilo pulatsanan sabeu bele pei si Mose, kele ke sipasigagalai lalep nia le makope tuabeuake bele pei ka lalep sigalainia.

⁴ Aipoi senen lalep ai sigalainia, tapoi sigalai sangamberinia ia te Taikamanua.

⁵ Si Mose kirenangan matopit nia ka bagat lalep Taikamanua siripot pupapagugulet masimunengake pagalaiat paaremen pei le ka gogoi sibabara.

⁶ Kristus geti matopit nia siripot putotoga masikupkup lalepnia; lalepnia ia te sita, ke mariuriu taukkaake simaron tonem bagata samba pukakaronan atsiakenenta teret kalepakatnia.

Masubu kalulut taimareddet

⁷ Ia te lulunia kele sikuat Ketsat Sipunenan, “Gogoi nene ke nuarep kam ngangania,

⁸ ba kekelaake kam paatuatmui kele ka pukelakat paatuatda taikebbukatmui ka teteret pasisiboat ka simatangeu.

⁹ Sedda ragalai pasisiboat taikebbukatmui rasibo aku, kenanen araitcoan sigalaiku,

¹⁰ epat pulu ngarura ujunia. Ia te lulunia akupugolu ka sia reddenan nenda, samba kukua: Sarat mupepe paatuat le sia, samba ta raagai enunganku,

¹¹ bailiu pusuppakungan ka goluku: Taan tuguguru sia ka kudduat puariatku!”

¹² Pagaba kam sasaraina, bui ibara kasei pa ka talagamui sikatai paatuat samba sitaimatonem baga kalulut ikaddiuake Taikamanua sipuririmanua.

¹³ Tapoi panganturu le kam pasasambamui senen gogoi, ujut momoi pei le tukua “gogoi nene,” bule ta bara ka talagamui sikelaake paatuatna kalulut patajuat jo.

¹⁴ Aipoi amurubeiatnan sita ka bagat Kristus, sarat kau le imaron taometnake sikatoneminta panandaatnia teret kalepakatnia.

¹⁵ Tapoi ke ikua, “Gogoi nene ke nuarep kam ngangania, ba kekelaake kam paatuatmui kele ka pukelakat paatuatda taikebbukatmui.”

¹⁶ Kasei poi sia sikelaake paatuat, kenanen araarepman ngangania? Ta pa sia sangamberida sibelaakenen Mose ka laggai Misir?

¹⁷ Samba kasei aipugoluki Taikamanua epat pulu ngarura ujunia? Ta pa sia sigalai jo, simasusubu ka simatangeu?

¹⁸ Samba kasei sia sisuppaakenen Taikamanua, sitaioi masiguruki kudduat puariatnia? Ta pa sitaimareddet?

¹⁹ Oto ataitcoan, taiooinia ratuguru, kalulut taimatonem bagada.