Ibr. 13 - BUKO SIPUNENAN

Kipa tuangkaake bagat Taikamanua

¹ Kau imariuriu nuntut bagamui ka sasaraina.

² Bui nukalipogi kam masirauma sirimanua, aipoi kalulut pasirarauma, pat bara sabagei taiaagaietda raumarangan samalaika.

³ Repdep kam sia sipenjaraakenen, addeake kam tubumui kele sambamui tupenjaraake. Samba repdep kam sia pinaorei, aipoi beri kam leu ai pei le kam muririmanua ka polak.

⁴ Suru kam sangamberimui putatalimou samba bui nupalolit kam pereman; aipoi sipuuumun samba sipaeelet iuukum le sia Taikamanua.

⁵ Bui numaalau kam baga ka bulagat; kipa teret sibabara iangan te nupusasanangi kam. Aikuangan poi Taikamanua, “Bulat ta kuooreake ekeu samba bulat ta kukakaddiuake ekeu.”

⁶ Ia te lulunia tonem le bagata masikua, “Si Tuhan le sirom aku; ta maloloto aku. Apate momoi ragalai sirimanua ka tubuku?”

⁷ Repdep kam sia siuteake kam, sipasititiboi tiboiet Taikamanua ka kam. Lelekngake kam kalepakat purimanuaiatda samba ului kam tonem bagada.

⁸ Jesus Kristus geti ia leu ne nia sokat, kineneiget samba teret buruburu.

⁹ Bui ipepeake kam sene ngamata nganturat pabageibagei. Aipoi kiliu bagat Taikamanua le simaeru masironake paatuat, ta kalulut komen. Sia situtnake aturan komen kele nenda ta anai uktukda.

¹⁰ Ka sita ai kudduat pasibuluat samba sia sipugagalai ta momoi rakom apa pa ka bagania.

¹¹ Aipoi tubut tarimeu, silepa ala logaunia iambit nia imam sabeu ka kudduat sipunenan simakope sibailiu buluakenen pasiappet jo, tulabo ka gerat sapou.

¹² Ia leu te lulunia, Jesus ka bebe le, ta ka bagat kota aipasiorik ikau logaunia masipalina bangsania.

¹³ Oto sita kam tatagetnake nia ka gerat sapou taorik kam nia sambata paloloiat ka tubunia.

¹⁴ Ta poi anai sene laggaita simariuriu; laggai sibabara le gabaetta.

¹⁵ Oto kau imariuriu tabuluake kam pusurakat ka Taikamanua ka onin Jesus, ia te buat bibo silatsatnake oninia.

¹⁶ Samba bui nukalipogi kam masigalai simaeru samba masikau paroman, buluakenen kele nene poi obaket bagat Taikamanua.

¹⁷ Reddet kam sia siuteake kam samba tut kam sia; airapasisikeli poi ketsatmui, samba sia leu masiaalegi ka Taikamanua. Bule ka angkat baga ragalaiake nia, bui ka puhohoihoi; aipoi nenda ta mauuktuk kam.

¹⁸ Tiddouake kam kai simariuriu. Aipoi matonem bagamai maeru le bagai bagamai, kalulut sarat simaeru le koba kuparaboatnake kai.

¹⁹ Kutiddou simakope nutiddouake kam aku, bule imaruei itoiliake aku Taikamanua ka kam.

Panindogat

²⁰ Ia geti Taikamanuan paabanan, sipasiririmanuaake minca Tuhanta Jesus, ia te Sipasijajago Sabeu ka sangamberi biribiri kalulut logau pakerekat baga sitaitatata,

²¹ bule nia le masipatarek kam ka sangamberi simaeru nugalai kam obaket bagania, samba mugalai ka bagata apa sipasesese ka matania kalulut Jesus Kristus. Ka tubunia le pulatsanan teret buruburu! Amen.

Pasilepa

²² Kutiddou ka kam, sasaraina, bule nusilo kam ka erut baga nganturat nene, ta le poi mananta suratku nene ka kam.

²³ Bule nuagai kam nia, sarainanta si Timoteus, abelangan nia ka penjara. Segena le, oi kai ruamai masibalou kam.

²⁴ Segeake kam salammai ka sautemui samba ka sangamberi sipunenan. Salam ka kam sibara ka sasaraina ka Italia.

²⁵ Kiliu bagat Taikamanua masipaalei kam sangamberimui.