Ibr. 11 - BUKO SIPUNENAN

Tonem baga

¹ Tonem baga ia te masibulatnake karoniet, masimunengake sitaiiitcoket.

² Kalulut tonem baga poi taikebbukatta siburu bailiu tumunengake sia.

³ Kalulut tonem baga, agaitangan polak nene sibaraakenen tiboiet Taikamanua le; oto sangamberi simaiitco, sibara ka sitaimaiitco le.

⁴ Kalulut tonem baga, ibuluake si Abel ka Taikamanua buluakenen simakaeru bele pei buluakenen Kain. Nenda te masimunengake simaroipo le nia, ioba poi Taikamanua buluakenennia, samba kalulut tonem baga, kenanen amateian nia, ai pei le nia maninibo.

⁵ Kalulut tonem baga, si Henokh tuakkat ka sorga, bui iitco kamateiat, samba ta atusese nia, aiakkatnakean poi nia Taikamanua ka sorga. Aipoi enan tapei tuakkat nia aian pasimunengan ka tubunia obana nia Taikamanua.

⁶ Si ta tonem baga geti ta iooba nia Taikamanua. Kasei poi silegeri Taikamanua, buita ikatonemi kababarat Taikamanua, samba senen sipasigagaba nia ikakau upania Taikamanua.

⁷ Kalulut tonem baga, lelekngakenangan si Noak nganturat Taikamanua pagalaiat sibabara ka sitaiiitcoket pei le. Lotonia, reddetnangan masigalai kinapat katuaragatda sangalalepnia; samba kalulut tonem baga, ukumnangan taikapolak, samba bailiu nia sipasiikep puroipoat siripot tonem bagania.

⁸ Kalulut tonem baga, mareddetnangan si Abraham, ka teteret aisogai nia Taikamanua ipujaujau ka laggai sibailiu ikepmakenennia; pujaujaunangan leu et ka kudduat taiaagaietnia pei le.

⁹ Kalulut tonem baga, kuddujinangan polak palelengan, musitoi ka polakda sasareu; kuddu nia sedda ka sapou, samba sia si Isak, samba si Jakob, sibailiu sipasiikep palelengan nenda leu et.

¹⁰ Aipoi ai le ingengenaake kota sipubobongen simaron, sitularani samba sirioakenen Taikamanua.

¹¹ Kalulut tonem baga leu si Sara, aioi aipusuruket, kenanen aisabauan rurania, kalulut iaddeake Taikamanua sikau palelengan katoneman le.

¹² Ia te lulunia sibara ka sara sirimanua, momoi tukua amateian tubunia, mututu sapunuteteu kele panyanyat ka manua samba ngai ka bebet koat, sitaioi tuadde iginia.

¹³ Sangamberida nene amateian sia ka tonem baga, ta arasilo sinibalaakenen, ka sareunan le araitco nia samba raroroi nia samba raseseake sitoi le sia samba sipueekpak ka polak nene.

¹⁴ Aipoi sia sipasikukua kisedda masipatoila ai le sia masigagaba bakkat laggai.

¹⁵ Samba ke bai rarepdep polak kabaraiatda sikaddiuakenenda, metnangan iaili tetere ratoili.

¹⁶ Tapoi kineneiget laggai simakaeru le rabebesiake, ia te ka sorga. Ia te lulunia ta maila Taikamanua itukua nia Taikamanuanda, aitarekngakean poi ka sia sara kota.

¹⁷ Kalulut tonem baga, buluakenangan si Isak si Abraham ka teteret aisibo nia Taikamanua. Aisiloan tebai palelengan, matarek nia masibuluake togania sisasara,

¹⁸ kenanen aikuangan Taikamanua ka matania, “Sibara kai Isak le oniakenen punuteteunu.”

¹⁹ Ipaatu poi momoi le isuruake simamatei Taikamanua. Oto momoi tukua sibara ka simamatei le aisilo minca si Isak si Abraham.

²⁰ Kalulut tonem baga leu kai Isak aisukatnake si Jakob samba si Esau sipuaaili ka gogoi sibabara.

²¹ Kalulut tonem baga kai Jakob, kei matei nia, sukatnakenangan ruada togat Josep, lepa panindounangan aiaaddaiji utet tuturania.

²² Kalulut tonem baga, malegerengan le imatei si Josep, parepdepnangan pagalaiat kabebelada tai Israel samba ipatone galaiakenenda ka pagalaiat tolatnia.

²³ Kalulut tonem baga, kele aipututu matat Mose, lipputnakerangan nia saeppunia telu ngalaggo burunia, kalulut raitco laingen tubunia samba ta rakalotoake parentat rimata.

²⁴ Kalulut tonem baga, kele aimabeunan si Mose, ta ioba ituoniake nia toga ka togat Parao sinanalep,

²⁵ aipoi masiorik paoreat sambada bangsat Taikamanua pei le ioba bele pei muangka baga goiso sibara ka jo.

²⁶ Aipoi katuloloiat kalulut Kristus le iaddeake pukayoat sabeu bele pei le sangamberi bibiletda tai Misir; upa ka gogoi sibabara le poi imamattai.

²⁷ Kalulut tonem baga, kaddiuakenangan Misir, ta aikalotoake golut rimata; iriuriuake le, aipoi Taikamanua sitaimaiitco kele aiitcoan le.

²⁸ Kalulut tonem baga, galainangan si Mose Paska samba pasisosokat logau, bui ilangoake togada sikebbukat malaika sipasilalango.

²⁹ Kalulut tonem baga, talipokirangan Koat Simabonan tai Israel samba le kele masitalipoki polak simagarak; tai Misir geti kele arasibo nia ka sia, maloulourangan.

³⁰ Kalulut tonem baga, maragatnangan gelit Jeriko, kele arabokko nia tai Israel pitu ngagogoi ujunia.

³¹ Kalulut tonem baga, si Rahab, sinanalep sijo, ta amasubu nia pasamba sia simakela paatuat, aisilo poi tai Israel sipananaiko ka bagat aban.

³² Apangan le bagei kuanenku? Aipoi ta iaaili tetere kununuake pagalaiat si Gideon, si Barak, si Simson, si Jepta, si David samba si Samuel samba tai nabi.

³³ Sia nenda kalulut tonem baga, arakalaakean purimataat, ragalaiake puroipoat, rasilo sinibalaakenen, rapetpet ngungun singa,

³⁴ rapeake api sipujujuluu. Abelangan ka son lanjau, simagulai tubu sia amaronan, amagegengan sia ka pasaggangan samba arasabuakean saladduda tai saggak.

³⁵ Saina masisilo minca saeppuda simamatei, atusuruakean poi sia. Sabagei geti raobaake tubuda rapaorei sia, ta raoba rabelaake sia, bule rasilo katusuruat simakope eru.

³⁶ Sabagei raorik paloloiat samba rabobo, rakabe pei samba rapenjaraake.

³⁷ Rabaijungi bukku, ragaji, ramateiake sinete; muekpak sia muleppei kulit biribiri samba kulit kambing; raorik pei geba, gejat baga samba paoreat.

³⁸ Polak nene ta mateu kudduatda. Muekpak le sia ka simatangeu samba ka leleu, ka bagat ngaliu samba ka lobok polak.

³⁹ Sangamberida nene, kenanen atuumunakean sia kalulut tonem bagada, tapoi tapei arasilo sinibalaakenen.

⁴⁰ Aipoi aitarekngakean Taikamanua simakope eru akenennia ka sita; ta rasisilo simasun eru ke ta sambata.