Ibr. 10 - BUKO SIPUNENAN

¹ Aipoi ka Surukat sarat ailiggou pagalaiat simaeru ka gogoi sibabara le, ta bulat tubut puaragat. Ia te lulunia ka bagat buluakenen simakere sibuluakenen senen rura, Surukat ta momoi masipaeru sia siooi masipanindogi Taikamanua.

² Ke momoi bai ipaeru sia, taan leu maoole rabuluake buluakenen, aipoi sia sipanindogi Taikamanua taan iagai tubuda joda, atulinaakean sia sangaminca, lina teret buruburu.

³ Tapoi ka bagat pasibubulu buluakenen senen rura, sedda te masiparepdep sirimanua kababarat joda.

⁴ Aipoi ta momoi logau jaui simanteu samba logau kambing simanteu masiposa jo.

⁵ Ia te lulunia kele aioi Kristus ka polak, kuanangan, “Buluakenen samba panguruat ta nukikiddi, tubu le anutarekngake kaku.

⁶ Buluakenen tarimeu rarangen samba buluakenen pasiposat jo ta nuoba.

⁷ Lepa kuanangan, ‘Bulatnia, amoian aku, ka bagat buko sipurutnakenen atusuratnakean pagalaiat aku masigalaiake siobat bagam, Taikamanuangku.’ ”

⁸ Ka pata aikua, “Buluakenen samba panguruat, buluakenen tarimeu rarangen samba buluakenen pasiposat jo ta nukikiddi samba ta noba nenda” – kenanen tubuluake siripot Surukat –.

⁹ Lepa nenda kuanangan, “Bulatnia amoian aku masigalaiake siobat bagam.” Tataakenangan siboiki, bule irioake sikarua.

¹⁰ Ka bagat teu bagania nene te aipalina sita kalulut katububulut tubut Kristus Jesus sisangaminca teret buruburu.

¹¹ Samba senen imam masigalaiake pasikelatda senen gogoi samba paoleole masibuluake buluakenen simakere, sangamberinia nenda ta momoi masiposa jo.

¹² Tapoi Kristus geti kele aibuluake sara le buluakenen kalulut jo, pukuddunangan teret buruburu kai kattoet Taikamanua,

¹³ kineneiget masingena teterengan le itukau saggaknia bailiu kalak rerenia.

¹⁴ Aipoi lulut sara buluakenen le aibailiuake simasun eru teret buruburu sia sipuneninia.

¹⁵ Pagalaiat nene Ketsat Sipunenan leu masimunengake ka sita, aipoi lepa aikua,

¹⁶ “Nean le pakerekat baga baraakenenku ka sia pasat oggak nene,” kuanangan minca, “Ka bagadangan le kukakau Surukatku, ka paatuatdangan le kususurat nia,

¹⁷ sangamberi joda samba seleda taan kurerepdep.”

¹⁸ Kaipa poi ai katuappekat sangamberinia nene, taan leu tububuluake buluakenen kalulut jo.

Kauan talegeri kam Taikamanua

¹⁹ Oto sasaraina, kalulut logau Jesus, amaemengan sita masiguruki sipunenan simakope,

²⁰ aibukaakean poi ka sita enungan sibau samba sipuririmanua masitebek kekere, ia te tubunia,

²¹ samba aian ka sita Imam Sabeu sikupkup Uman Taikamanua.

²² Oto talegeringan kam nia Taikamanua ka paatuat simalina samba ka tonem baga simaron, atupalinaan poi paatuatta ka pubabagai baga sikatai, samba tubuta atubuian oinan simalina.

²³ Kau imaron taukkaake pukakaronanta munengakenenta, simatopit le poi nia sipusisibala.

²⁴ Pajigi le kam sita pasasambata mununtu baga samba mugalai simaeru.

²⁵ Bui tamaore moi ka parurukat kele galai tubuda sabagei. Panganturu le kam sita pasasambata, sara pei itutangari, anuitcoan poi kam gogoi Tuhan aian malelegere.

²⁶ Aipoi ke tapali bai mugalai jo, lepat atasilo puaagai pubulanan, taan te anai minca buluakenen pasiposat jo.

²⁷ Sarat ukum sikatai besian le ngenaakenen samba api golut baga sisubuake sipasilalawan.

²⁸ Ai bai sipasabau surukat Mose, tumateiake le nia ta tuiinou, ke aian rua ele telu sipasimumuneng.

²⁹ Sara pei kopet sanenia ukuman simateu orakngakenen ka sipaperaki Togat Taikamanua, siaddeake simalolit logau pakerekat baga sipuneni nia, samba sipaloloi Ketsat siake kiliu baga.

³⁰ Aipoi ataagaian nia sipasikukua, “Kaku le pasiukuman. Aku le masilulumunake.” Samba minca, “Iuukum le bangsania si Tuhan.–

³¹ Bulat kalotoakenen te ke iorak sita kabei Taikamanua sipuririmanua.

³² Repdep kam ka tetere situsasabau. Lepa aitutoroiji kam, maigi anuorik kam, kalulut nuomake kam pasaggangan simaron.

³³ Sabagei rabailiuake ikbungen paloloiat samba pugejaat baga, sabagei isappo masiorik oringenda sipasioorik kisedda.

³⁴ Aipoi anututnan kam masiorik oringenda sipenjaraakenen, samba ka teteret raraurau bibiletmui, maangka le bagamui masisilo nia, nuagai poi kam, ai pei le ka kam bibilet simakope eru samba simatom.

³⁵ Oto bui nugikgikngake kam tonem bagamui, abeu poi upania.

³⁶ Aipoi besiakenen le nupuom kam baga, bule ioi nugalaiake kam obaket Taikamanua samba nusilo kam sangamberi palelengannia.

³⁷ “Aipoi ai le goiso, bulat taan mauuju, momoian le nia, nia siooi, taan ipauuju kaooinia.

³⁸ Sirimanuangku simaroipo geti muririmanua sia kalulut tonem baga, tapoi ke isiksik teiteinia, taan kuooba nia.”

³⁹ Sita geti ta sirimanua sisiksik teitei, sieei ka pulangokat, simatonem baga le, sieei ka puaragat.