Ibr. 1 - BUKO SIPUNENAN

Taikamanua manibo ka bagat Togania

¹ Siburu mareirei samba ka sene ngamata enungan aipatiboake taikebbukatta Taikamanua ka ngungunda tai nabi.

² Tapoi ka tetere sikateitei nene, patiboakenangan sita ka bagat Togania, sikokoiakenennia bailiu sipasiikep sangamberi sibabara. Kalulut nia leu aibaraake polak nene Taikamanua.

³ Torot pulatsanan Taikamanua le nia samba tularat putubuat Taikamanua samba ibairat sangamberi sibabara kalulut tiboietnia simasun gege. Samba lepa aigalai pulinakat jo, puuddetnangan kai kattoet Sipulubeunan, ka pata.

Pubeunanan Togat Taikamanua

⁴ Toga nene saliu beunanda samalaika, kele oni sipanguruatnakenen ka tubunia saliu pei le laingen oninda samalaika.

⁵ Ka matat malaika kasei poi aikua Taikamanua, “Ekeu te Togaku! Gogoi nene kututuake matam?” samba minca, “Bailiunangan aku Ukkuinia, samba bailiu nia Togaku?”

⁶ Samba minca ka teteret aikoiniake Togania sikebbukat ka polak, kuanangan, “Sangamberi malaikat Taikamanua buita murappo ka matania.”

⁷ Samba ka pagalaiat malaika aikua, “Sibailiuake samalaikania bailiu rusa samba sapaguguletnia bailiu juluu api.”

⁸ Ka pagalaiat Toga geti aikua, “Uddenan purimataatnu Taikamanua, riuriu le teret buruburu, samba tuturat purimataatnu tuturat puroipoat le.”

⁹ “Nupununtuki baga puroipoat samba nupulagaki baga pukataikat; ia te lulunia aitulaji ekeu Taikamanua, Taikamanuam tula puangkakat baga, bele pei saaleinu.”

¹⁰ Samba, “Ka panandaatnia pei le, ekeu le, Tuhan aibaraake polak, samba pamanuamanua sigalai kabeinu le.

¹¹ Sangamberinia nenda tatata le, ekeu geti riuriu le, samba sangamberinia nenda makakatai le kele leppei;

¹² kele mantel le nupurutnake sia, samba kele leppei tusisili le sia, ekeu geti ia leu ne nia, samba ruram ta anai kalepakat.”

¹³ Samba ka matat malaika kasei poi aikua, “Uddetnake ekeu kai kattoetku, teret kukau saggaknu bailiu kalak rerem?”

¹⁴ Samalaika geti ia te ketsat pagugulet Taikamanua, koiniakenen masirom sia sipasiikep puaragat.