Hos. 9 - BUKO SIPUNENAN

Ta babara angkat baga ka kudduat katuribaiat

¹ Ale bangsa Israel, bui te nuabeuake kam minca sangamberi gogoi siabemui kele bangsa bagei. Anukaddiuakean kam Taikamanuamui samba ta'matopit kam katubunia. Kasenen pamerakat gandum nupasakai kam tubumui paelet katubut sabulungan baal, samba mangka bagamui manilo gandum addeakenenmui sibailiu upa taikamanua nenda katubumui.

² Tapoi ta'mauju minca magulainangan kakam gandum samba leu tulat zaitun, samba anggur leuet geti sapru pi

³ Kam ale bangsa Israel, ta'nukukudduiji kam geti polak siaket Tuhan kakam buita toili kam ka Misir samba buita nukom kam simaharam ka Asyur

⁴ Ka sangamberi laggai nenda ta'momoi kam geti masipanguruatake anggur samba buluakenen tarimeu addeat masiangkaake bagat Tuhan. Komenmui geti sikau sangamberi sirimanua sipasikokomnia ibailiu malolit, kele kan komen kapasirateiat. Komen nenda katukaunannia sarat addeat masiektekake balugumui, ta'anai goiso poi geti tuabbit ka Uman Tuhan addeat panguruatakenen sedda.

⁵ Kasangamberi gogoi sabeu siripot arat masisuru si Tuhan, ta'momoi nugalai kam apapa addeat masiabeuakenia.

⁶ Ke sipuaaili aian, samba abbitrangan kam ka laggai bagei, iageti sipulelegei sibara katalagamui geti ruruakerangan sia tai Misir addeat ramateiake samba rarateiake ka Mampis! Se'se samba rui geti mutu'tu masitabbo kudduat pulalemanmui samba bibilet perakmui simakeppu saki.

⁷ Ke iaili teterenia pasiukuman, addeat tetere masisilo silit sangamberi sigalaiakenen. Iapeite raagainia geti tai Israel. Kuamuian, “Nabi sikupkup ketsat nene sitaiagai patuat! Siroro le nia kuamuian kidedda kalulut makope lagat bagmui katubukku samba bulat makope beunan jomui.

⁸ Taikamanua masikoiniake aku sibailiu nabi addeat masiparepdep kam pamiannia, tapoi kaipa le kuei aile nubebesiake kam masisere kele uma. Ka laggai bakkat Taikamanua, sangamberimai tai nabi rasaggangi tai sarakyat.

⁹ Bulat makope katai galaiakenenmui kele sigalaiakenendra tai Gibea! Taikamanua geti masirepdep puseleatmui samba kalulut jomui ukumnangan kam.

Jot Israel samba siloketnia

¹⁰ Kuanangan si Tuhan, “Kateteret akusese tai Israel, mangka bagaku kele sirimanua sisese buat anggur ka simatangeu. Kateteret siboiki akuitco taikebbukatmui mangka bagaku kele sirimanua siitco bua siboiki buat sileu. Tapoi, kateteret araei kaleleu Peor, taddarangan masibuluiji baal, bailiu sia malolit kele taikamnua pununtukietdra baga nenda

¹¹ Pubebeura tai Israel geti tuburut le imapepe kele uma, sipususuruket geti taat babara, samba ta'anai tatoga sipututumata.

¹² Iageti kenanen poi ai tatoga sipututumata samba tuurau, kuaala leuet sia. Ta'anai poi sia sara geti sara kuoobaake murimanua. Matei le kam, ale bangsa Israel, ke kukaddiuake kam!”

¹³ Tuhan, akuitco rakukru tatogadra samba ramateiake.

¹⁴ Aponia et sibulatnia kutitiddou katubum addeat sirimanua nenda? Bailiuakean le sangamberinia tainanalepdra ta'masusuruket. Galai bui ioi ratototake tatogadra.

¹⁵ Kuanangan si Tuhan, “Sangamberi pukakataira barania ka Gilgal. Sedda te aitadda kumalaga baga ka sia. Kalulut jo sigalaira, tuituiakekungan geti sia ka laggaiku nene. Ta'at kupunununtuki baga minca; sangamberi siuteake sia arasaggangingan aku.

¹⁶ Tai Israel geti kuukum. Bailiunangan geti sia kele siureman sitaipububua, samba ungatnia amagarakngan. Sia geti taat babara tatoga. Kumamateiake le geti tatoga pununtukietdra baga nenda.”

Manibo nabi pagalaiat tai Israel

¹⁷ Taikamanua reddenenku nenda geti masituituiake paamiannia, kalulut ta'raoba masiarepakenia pueppakrangan geti ka bangsa-bangsa bagei.