Hos. 8 - BUKO SIPUNENAN

Katubukkanan Israel kalulut pukakatainia

¹ Kuanangan si Tuhan, “Nauake kam toggaiat kalotoakenen! Tai saggak masisaggangi laggaiku kele manyang itarakkup ibania! Paamianku masipasabau palelenganku katubudra, samba masisaggangi sangamberi sigelaiakenenku.

² Kenanen poi rakukua aku Taikamanuandra, samba rakua sia leuet paminaku siagai aku,

³ tapoi sia ta'raoba masisilo apa simaeru. Oto kalulut neda sia geti rakrukru sia tai saggakra.

⁴ Sapamianku masipilih rimata ta'rarere sipinatuku. Rarot ake siute ake sitaiagaietku. Raala mas samba perakra bule ragalai tularat sabulungan sikau ramasaragai.

⁵ Malaga bagaku katularat jaui mas panindogietdra sikuddu ka laggai Samaria. Bulat magolu aku katubudra. Teret kaipapa sia geti rapalolit tubudra masibuluiji sabulungan.

⁶ Jaui mas panindogiet ka Samaria nenda iate sigalaira siagai masipaddai mas tai Israel! Ta' Taikamanua nenda samba bui ta'tuanauake!

⁷ Paamianku masisogai rusa ialeuet sia geti masimonei julungen monen gandumra ta'makikiniu, ialeuet geti ta'babara tepung addeat komen. Tapoi ke mone nenda makikiniu leu et, ialeuet gandumnia geti raala le bangsa bagei.

⁸ Kele pario simararagat kisedda tai Israel tat nanai katukaunanra minca, samba aibailiuan sia bangsa simaturere kele bangsa-bangsa bagei.

⁹ Kele kalidei simaliak simalawan, kisedda te tai israel masitut siobaket bagadra. Ragaba paroman ka tai Asyur samba rasaki pasuruangan ka bangsa-bangsa bagei.

¹⁰ Kenanen kisedda aku geti masiruruake samba masiukum sia. Ta'an leu mabuburu geti rakatciakenia ke rimata Asyur masipaoreiji sia.

¹¹ Iapei imaigi ragalai mezbah tai Isarel addeat masiposa jo memei maigi leuet kudduatdra addeat masigalai jo!

¹² Bulat maigi akusurat gelaiakenen ka sia, tapoi sangamberinia nenda ta'arasilo kalulut raaddeake ta'anai lulunia ka sia.

¹³ Raoba masipanguruatake buluakenen katubukku, samba masikau akkulat buluakenen nenda, tapoi aku, Tuhan, ta'maangka bagaku sangamberi buluakenenda. Kineneiget aku geti masirepdep sangamberi jodra samba masiukum sia kalulut sangamberi jo nenda; kutoiliake sia minca ka Misir!

¹⁴ Tai Israel masigalai lalep, tapoi rakakalipogi sipasibabara sia. Tai Jehuda masipaigi laggai sibara pujagoat, tapoi aku geti masibeleake obengan addeat masilabo itata sangamberi lalep samba laggaira.