Hos. 4 - BUKO SIPUNENAN

Taimareddet ka tai imam samba bangsa sitaimariuriu topit

¹ Ai pakaroat Tuhan kasikudduiji laggai nene. Ale Israel, arep kam apa sikuaNia, “Ka laggai nene ta'anai putopinan ele nuntut baga, samba ta raseseake Aku le sibailiu Taikamanua.

² Pusupparangan, tapoi taragagalaiake; paboboko le sia, manangkou, pamatei, samba paelet. Itutuppai le pukakatai samba ipuaili pamamatei sipatutut.

³ Kalulut nenda laggai nene ibabailiu le simagarak, samba matei le geti sangamberi sipuririmanua sedda. Sangamberei ngamatat tarimeu sitububurut samba sikuddu ka polak samba leu ka koat matei.

⁴ Kuanangan si Tuhan, ale kam tai-imam, bui' ibara siseleake ele sipugoluki paamianKu, aipoi kam le Kuseseleake!

⁵ Sina'go samba sinoibo nugalai kam puseleat, kisedda leuet sia tai nabi. Kalulut nenda Kumamateiake le geti tai Israel, inamui.

⁶ Kam tai imam taanupuletcei kam Aku, samba leu paamianKu taipuletceirangan Aku bailiu matei sia. Oto, kerakkungan kam, samba ta'an Kusisilo tatogamui sibailiu imamKu.

⁷ Memei itutuppai igimui, ituppai leuet jomui ka tubukKu, ale kam tai imam! Kalulut nenda tiboi tubumui geti kusasailingan le, taat te rasusuru kam, tapoi rapalololoi le kam.

⁸ Anumakayo kam kalulut jot paamianKu, kalulut nenda bulat nuoba le kam bule ramariuriu mugalai jo.

⁹ Oto mangorik le kam simakere kele sapaamian! Kuukumake te kam siripot kirekat sigalaimui.

¹⁰ Komenmui sibara ka buluakenen sipanguruatakenen, tapoi tamaektek kam. Iageti panindogimuian taikamanua sibaraake uktuk addeat musuruket, tapoi taitutuppai kam, kalulut anukaddiuakean kam Aku nupanindogi kam taikamanua bagei.”

¹¹ Kuanangan si Tuhan, “Ale kam paamianKu, anggur siburu samba leu anggur sibau aitata'akean ronmui mupatuat simaeru.

¹² Nutiddou kam enungan sibara ka sangatippu loina! Sara tutura masipaagai kakam apa kiddietmui nuagai kam! Makere kam kele sara sinanalep sisakiake tubunia; kaddiuakemuian Aku samba segeakemuian tubumui ka taikamanua bagei.

¹³ Ka sangamberi kudduat panindogat sabulungan ka sangamberi tinambu samba leleu, nupanguruatnake kam buluakenen samba nulabo kam kumanyang katei sangamberi loina sabeu simeru buttet sedda kalulut kudduat nenda makunem. Tapoi kipa kalepakatnia? Sangamberi taiokkomui ibailiu sipasisasakiake tubu samba sangamberi talikumui sinanalep sipaeelet!

¹⁴ Tapoi ta Kuukumake sigalaira nenda, kalulut ai kam memei katubutda simaolop tubu sipugagalai ka sangamberi kuil, sambamui masipanguruatnake buluakenen ka sabulungan. Bulat sineseatnia tiboiet nene: “Bangsa sitaiagai kolou pagalaiat Taikamanua mabubukkat le.”

¹⁵ Ale kam tai Israel, tamariuriu topitmui ka tubukKu! Tapoi kukatonemi tai Jehuda ta ragagalaiake puseleat simakere! Bui nugalai kam panindogat ka Gilgal ele ka Betel! Bui nupusuppa sedda ka onin Taikamanua Sipuririmanua.

¹⁶ Kam ale tai Israel, bulat simakela paatuat! Kipa ioi Kujago kam kele biribiri ka simatangeu?

¹⁷ Paamian Israel ai apprangan kam bulungan. Kalulut nenda obaakean le sia.

¹⁸ Lepa aimapuineng kalulut pasilolo anggur simigi, pasakirangan tubudra ka bagat angkat baga. Raoba peile rapaloloi sia bele pei rasuru sia.

¹⁹ Kalulut nenda tata le sia geti kele siguguat rusa. Mailarangan geti kalulut sangamberi buluakenen sipanguruatakenen ka tubut sangamberi sabulungan.