Hos. 3 - BUKO SIPUNENAN

Tusilo minca, tapoi tuaddeake matangeu

¹ Kuanangan si Tuhan katubukku, “Kenan minca pununtuki baga sara sinanalep sioba paelet. Pununtukinia baga kele Kupununtuki baga tai-Isrsel kenanen rakakaddiuake Aku samba rapanindogi taikamanua bagei samba leu raoba masipanguruatake kue kismis katubutda sabulungan.”

² Iageti luluikungan pulu lima bulagat perak samba sangotu lima pulu kilogram gandum bule kuala sinanalep nenda.

³ Kuakkungan ka tubunia buita ingena aku kenanen maburu. Kaburunia nenda ta momoi igalai puoloman tubu ele paelenan, samba aku leuet ta momoi kulegreake tubukku ka tubunia.

⁴ Kasedda te pagalaiatnia bangsa Israel, bulat maburu te rapurimanua sita'anai rimata ele siuteake sia, ta'anai buluakenen ele kudduat keikeijet, ta'anai sabulungan ele jagot tubu sipaagai purimanuaiat ka gogoi sibabara.

⁵ Tapoi babara te teterenia ratoili minca tai Israel katubut Tuhan Taikamanuandra, samba ka rimatadra sibara ka muntogat David. Malotorangan geti samba masururangan kai Tuhan, samba leu silorangan panukananNia.