Hos. 2 - BUKO SIPUNENAN

Israel tukeraake samba tupaeru

¹ Kalulut nenda pasogai le kam ka pasasambamui ka bagat oni “Paamian Taikamanua” samba “Pununtukiet bagat Tuhan.”

² Kuanangan si Tuhan, “Ale kam tatogakKu, inamui ta'an sinanalepKu, samba ta'an simanteunia Aku. Kalulut nenda pakaroake kamnia bule bui ipaelet samba buian ipuolop tubu minca.

³ Ke mariuriu peile ipuolop tubu, Kururugut te bibiletnia bule ipubulutut kele kateteret aipututu matania. Kubailiuake te nia kele polak simagarak samba simangai, oto matei nia kalulut oggou.

⁴ Kam, sangamberimui tatogania, ta Kupupununtuki kam baga; aiputu'tu matamui kapuoloman tubu le.

⁵ Inamui simaolop tubu taiagai aila, aikua le, “Mei le geti aku katubutda simanuntu bagakku sipasiake kan samba loku, wol samba komak simaalit baga, tulat zaitun samba anggur.”

⁶ Lulut nenda, kugegeliake getinia pasamba puo simarui, samba kaukungan kekret enungannia bukku.

⁷ Kukrunangan geti sangamberi simanuntu bagania, tapoi ta iaaili sia. Gabanangan sia, tapoi ta isese sia. Iageti kuanangan, “Totoilingan le aku ka simanteuku siboiki, siboiki puririmanuangku maeru bele pei kapuririmanuangku kineneiget!

⁸ Ta iseseake inam ai poi Aku le amasikau ka sia gandum, anggur, tulat zaitun, samba sangamberinia mas perak pakeietnia masipanindogi sabulungan Baal nenda.

⁹ Kalulut nenda, tetere pasimoneiat Kuala minca sikauKu, iate gandum, anggur samba wol samba leu komak simaalit baga sikauKu ka tubunia pakeietnia.

¹⁰ Kububulututake te nia geti ka matadra sangamberi paumunakenennia. Taanai sia sara momoi masibelaakenia ka kabeiKu.

¹¹ Kuaariake te sangamberi punenmui, punen sisangarura samba leu punen sisangalaggo samba punen sisenen gogoi sabat; tetenia, sangamberi punen ka bagat aratnia.

¹² Kupakakatai te sangambei loinat anggur samba loinat sileu, kuanennia iate upa aipasikeli sangamberi paumunakenennia. Kubabailiuake te sangamberi monen anggur samba sangamberi monen sileu ibailiu leleu simaparou; pakatainangannia sangamberi tarimeu simasabbak.

¹³ Ukumkungannia geti kalulut sangamberi gogoi sipakeinia masilabo kemenyan ka tubut Baal, samba leu masipakei pulaingeannia, bulet ikukru sangamberi paumunakenennia, iageti bulat kalipoginangan Aku. Kisedda te ngangan Tuhan.”

¹⁴ Kuanangan si Tuhan, kalulut nenda kuambit te nia ka simatangeu; sedda nanakungan nia sangamberi tiboiet nuntut baga.

¹⁵ Sangamberi monen anggurnia toiliakekungannia minca ka tubunia, samba guluggu pugejaat baga bailiuakekungannia matat baliu pasingenaan putoneman baga. Sedda te isilo Aku kele kateteret mabau peile tubunia, kateteret simaruei peile aibela ka Misir.

¹⁶ Lepa geti kuanangan Aku simanteunia, samba ta an Baal.

¹⁷ Ta'an kuoobaake ikua minca onin Baal, bailiu kalipogitdrangan oni nenda.

¹⁸ Kateteret nenda, Galaikungan palelengan ka sangamberi tarimeu bule sangamberidra tat ragegeugeu paamianKu. Ariakekungan sangamberi pasaggangan samba masiareuake sangamberi pakeiet ka pasaggangan ka laggaira paamianKu nenda, kaukungan purimanuaiatdra simaeru samba maaban.

¹⁹ Israel, Kubailiuake te ekeu geti sinanalepKu, sinanalep simakolou teret buruburu. Pununtukikungan ekeu baga samba riuriu le nuntut bagakKu. Galaikungan puroipoat paatuat samba riuriu putotopit.

²⁰ Siripokat palelenganKu, Kutatalimouake le ekeu. Seseakenungan geti bulatnia Aku le Tuhannu.

²¹ Polak iarep le geti gandum, anggur samba tula, samba sia nene arepirangan leu Jizreel.

²² Kukarapake le nia geti kaku ka polak, samba pununtukikungan baga si Lo-Ruhama, samba kuakungan geti katubut Lo-Ami: Paamian te ekeu! samba kuanangan leu: Taikamanuangku!”

²³ Baraakekungan geti erut puririmanuandra sapaamianKu samba ka laggairangan le rakukuddu. Kuanen katubutda, “Ta'an pununtukiet baga” aipoi kupatoila te geti punununtut bagaKu katubutda, samba kuanen katubutda “Ta'an paamianKu Kukukua te geti “Kam te paamianKu kam! Alegirangannia kise, “Ekeu le Taikamanuamai!”