Hos. 14 - BUKO SIPUNENAN

¹ Buita' tuukum le Samaria kalulut taimareddetnia ai saggangi Aku. Matei le geti rakyatnia ka bagat pasaggangan; sangamberi tatogania geti ragugulut, samba sangamberi tainanalep sibara suruket rasasausau balugura.”

Pagalaiat pasibaugat patuat samba palelengan

² Toiliake kam kai Tuhan Taikamanuamui, ale kam tai Israel! Kalulut jomui le anutubalatjai samba anubele kam.

³ Toiliake kam kai Tuhan samba segeake kam panindogat nene sibailiu panguruatmui ka tubuNia, “Tuhan, appeake sangamberi jomai, samba silo le panindogatmai nene, iageti umunakemaian ekeu kele sipinalelekmai.

⁴ Ta'momoi raarauake kai Tai Asyur, samba kuro pasaggak ta'momoi masiropmake kai. Ta'an kukua kai geti minca ka sangamberi tularat sigalaimai aipoi sia nenda Taikamanuamai. Oi Tuhan, manuntu le bagam ka sirimanua sita' anai sirimanua karonietdra baga.”

Ipalelek si Tuhan puririmanua sibau addeatda tai Israel

⁵ Kuanangan si Tuhan, “PaamianKu situsosoip kuala sia minca samba Kupununtuki baga sia ka muinet paatuat; Ta'an kupugogoluki sia geti minca.

⁶ Kele urat le Aku ka tai Israel sisuake polak simagarak. Makakrarangan te geti kele imakakra ogo, samba kele loinat pinilok makeru ipuungat.

⁷ Purimanuandrangan geti samba ituppai kele uremen kaipa le musinula kele loinat zaitun laingenia singin kele loinat pinilok!

⁸ Toilirangan geti katubukku samba mukuddu kabagat pasikelananku. Simaola le geti ituppai erut puririmanuandra, kele gandum ipututu ka polak simagabru samba kele monen aggur. Kele suat anggur Libanon imalio imaagai onindra.

⁹ Raribbaiake le geti tai Israel sangamberi tularat bulunganda. Pasikelikkungan sia samba arepikungan panindogatnia. Kele loina simalibbut buttet, Kukunemi sia. Aku te bubuakat sangamberi panukananda. Kisedda te ngangan Tuhan.”

Pasilepa

¹⁰ Bule sangamberi sirimanua simaagai raagai kolou sangamberi sinuratnakenen sene, samba rapasikelinia. Sangamberi enungan sibara kai Tuhan iate sineseat, samba sirimanua simatopit, murimanua siripot enungan nenda. Tapoi sirimanua sijo ta rapuletcei, bailiu tujulut samba bele sia.