Hos. 11 - BUKO SIPUNENAN

Nuntut bagat Tuhan masikalaake pukelakat patuatda tai Israel

¹ Kunangan si Tuhan, “Barania kasigoiso peile Israel akupununtukingannia baga, kusogai togakku nenda, bela ka laggai Misir.

² Tapoi iapei kusogai togakku nenda iapei imareunan katubukku. Iambit le buluakenen samba ilabo le dupa Addeat Baal samba taikamanua sabagei.

³ Aku le aigelai tai Israel muenung, samba masilakkaiakenia sialei nuntut baga. Aku le masipasikelinia tapoi ta'ioba iseseakenia.

⁴ Kasangamberi nuntut bagakku, kupalegre sia katubukku. Bangamberi pangoringan kupanangka, samba ka aggai bagakku kupakom sia.

⁵ Sangamberidra nenda tai Israel ta'raoba toili minca katubukku, lulut nenda bui ta'toili sia minca ka Misir, samba bangsa Asyur nan le masipaneinei sia.

⁶ Pamamatei geti muririuriuan le pat aili ka sangamberi laggaira, matat baliu laggai geti tupakakatai le samba pamianku tupamamatei. Ipuaili nenda kalulut ratutake siobat bagadra,

⁷ samba rabebesiake le addeat masikaddiuake aku. Iate tupaoreiji sia geti, tapoi ta'anai siujaake sia kenanen musosoga sia manindou paroman.”

⁸ Kuanangan si Tuhan, “Ale kam tai Israel, ta'momoi le kuobaake ekeu ele kukaddiuake ekeu. Momoi pa kusubuake ekeu kele si Adma, ele kugalaiake kele si Zeboim? Ta'iaili patuatku kugalaiake kele pagalaiat nenda, kalulut nuntut bagakku katubum makope beunan.

⁹ Taat kuukum geti ekeu kabagat goluku; taat kupararagat ekeu geti minca. Aipoi aku Taikamanua, ta sirimanua. Sipunenan le aku, masipaalei aku samba taat kuoba minca mugolu katubum.”

¹⁰ Kuanangan si Tuhan, “Paaminanku geti masitut aku teret kupurou kele singa samba ipugeret tubudra tai saggakdra. Paminaku geti maola le raoi sibara saigit ka kabelaiat sulu addeat masipanindogi aku.

¹¹ Baradra ka Misir geti raoi kele olat ituburut uma', samba sibara ka Asyur kele bagguak ngorut. Iageti ambitkungan sia toili ka lalepdra. Aku, Tuhan amanibo.”