Hos. 10 - BUKO SIPUNENAN

Ukuman kalulut pasisibuluiji sabulungan

¹ Tai Israel kele loinat anggur simaigi bua. Ia pei ituppai pukaioatnia, ia pei imigi igalai kudduat pasibuluat. Memei maeru puririmanuandra, memei makope eru le' ragalai tularat sabulungan buluijietra.

² Sangamberi sirimanua paatuatnia mupatajuat nenda, keneigetnan te isilo paluluat sangamberi jonia. Ipakakatai le geti Taikamanua kudduat pasibuluat, samba ipararagat le tularat sabulungandra.

³ Ta'mauju minca geti kuarangan, “Taat anai rimatatta, aipoi sita ta'anai lotota kai Tuhan. Apangan le katukaunannia sara rimata kasita?”

⁴ Pugereirangan samba masigalai palelengan ta'sibulatnia samba leu masiparon palelengan sita'anai katukaunannia. Pabailokrangan surukat bailiu puroipoat mutu'tu kele siureman sipalalango ka mone silepa itupakru.

⁵ Sipulalaggai ka laggai Samaria geti sia, samba leu sangamberi tai Imam, sipasilalayani jaui mas ka Betel nenda geti mureureu baga samba musou kalulut sangamberi erunia sabulungandra nenda atataan.

⁶ Sabulungandra nenda geti tuaambit le ka Asyur addeat panguruat katubut rimata sabeu. Tai Israel masitutake pinaatu sikau sia maila samba tupaloloi.

⁷ Makatainangan te geti Samaria samba rimatanaia aqmbit ratuitui kele sitippukat loina iraggaiakenia oinan.

⁸ Uma panindougat kasangamberi tinambu ka Betel kudduatdra tai Israel masibuluiji sabulungan, Tupakakatai le geti. Rui samba parou mutu'tu geti ka kudduat pasibuluatdra. Lepa geti pusogarangan ka leleu, “Luplupi le kai! samba ka sangamberi tinambu, “Saksakan kai!”

Isarel tuorakake ukuman

⁹ Kuanangan si Tuhan, “Baranangan sipuaaili ka Gibea, tai Israel enan ta'raariake mugalai jo masisaggangi aku. Aipoi nenda ka Gibea leu aiorak leu te sia pasaggangan.

¹⁰ Kupamamatei le geti sangamberi sirimanua sigalai jo nenda, samba masiukum sia sangamberi bangsa paruru addeat masisaggangi sia, samba tuukum sia geti kalulut jodra simigi nenda.

¹¹ Siboiki tai Israel kele jaui sibau situkleiji eru, samba ioba masingitit gandum. Ta' leu kukakau babairat ka tetekatnia simaeru nenda. Tapoi kineneiget aku takkiakean addeat masipaksania mugalai simaron. Kukoiniake tai Jehuda mamangkru, samba tai israel kukoiniake masirabak

¹² Kuakungan, Ale tai Israel! Galai mone sibau addeatnu, karapake uremen puroipoat, samba moneian panukanan sibaraakenen nuntut bagamui sibulatnia katubukku. Aipoi aiailingan teterenia nugaba aku, Tuhannu. Momoi aku geti samba alinangan ekeu sangamberi panukanan.

¹³ Tapoi bailoknia le anugalai, anubesiake le pukakatai, samba masimonei ta'puroipoat. Anukomman sangamberi buat pabokoatnu.” Kuanangan minca si Tuhan, “Ale bangsa Israel, kalulut nukaroni kam kuro pasaggakmui samba iginia taitentaramui,

¹⁴ oto taikaumamui iorak le pasaggangan, samba sangamberi irip laggaimui geti tupakakatai le'. Pagalaiatnia geti kele ka gogoi Rimata Salman sipulalaggai Bet-Arbel, kalulut anugalaian kam pukakatai sabeu. Kapatokat, rueinia peile aitutadda pasaggangan, mateinangan geti rimatamui.”

¹⁵ Kisedda te' Kugagalai katubumui, ale muntogat Israel, kalulut kopenia pukakataimui. Kateteret simancep bulat tusasappruake le' rimata Israel.