Hag. 2 - BUKO SIPUNENAN

Pulatsanan Uman Tuhan sibau

¹ Ka gogoi rua puluh sara, laggo pitu ka rura nenda leu et, panibonangan minca si Tuhan kai nabi Hagai.

² Koiniakenangan nabi Hagai si Tuhan, patibo ka Gubernur Zerubabel, Imam Sabeu Josua samba ka paamian masisegeake patonekat nene,

³ “Ai leu pa ka talagamui sipasirerepdep kipa kopet latcatnia UmangKu siburu” Kineneiget kipangan le putubuatnia, siripot pinaatum? Bulatnia ta'an anai katukaunannia.

⁴ Kenanen kisedda, bui imakarat bagamui, ale kam sangamberimui! Riuriuake kam mugalai, ai leu kuropmake kam simariuriu.

⁵ Kateteret anubela kam ka Misir, Akumunengakean palelenganKu masipaalei kam simariuriu. Kineneiget leu ai pei le Kupaalei kam. Oto, bui imakarat bagamui.

⁶ Ta'an mauju Kupangeungeu manua, polak samba koat.

⁷ Pangeungeukungan sangamberi bangsa samba pukayoatdra leu tuaambit le geti sene, bailiu Umangku sun le geti pukayoatdra.

⁸ Sangamberi mas samba perak ka polak nene aku le sibakkatnia.

⁹ UmangKu sibau makope latcat bele pei kele siburu, samba sene te Kuake aban samba puuktungan simasun ka bangsaKu.” Kise te ngangan Tuhan Sipulubeunan.

Nabi Hagai patibo ka tai imam

¹⁰ Ka gogoi rua puluh epat laggo siba ka bagat rura sikarua pamarentaat Rimata Darius, panibonangan minca si Tuhan Sipulugege kai nabi Hagai.

¹¹ KuananganNia, “Tiddou le kam siteuakenendra tai imam pagalaiat nene:

¹² Kebai ai sirimanua sipasiala sangajaja akkula buluakenen pusurakat kai Tuhan, lepa koiriakenangannia ka lekkut leppeinia, lageti sappoakenangannia ka roti ele sara seuket, anggur, tulat zaitun, ele aponia pa komen, malilina leu pa sangamberinia nenda?” Kele ai kau parerekat nenda si Hagai, alegirangannia tai imam, “Ta' malina.”

¹³ Lepa geti parerenangan minca si Hagai, “Kebai ai sirimanua sibailiu kasitsitnakenen kalulut aibekbek simamatei, lepa bekbeknangan sara katalagat komen nenda, ibabailiu leu pa komen nenda kasitsitakenen?” Alegirangannia tai Imam, “Oo, kirenangan!”

¹⁴ Lepa kuanangan minca si Hagai, “Tuhan masikua surukat nenda tugalaiake leu ka paamian Israel ka tobbou laggai nene samba ka sangamberi sibaraakenendra. Oto apa sipanguruatnakenandra ka kudduat pasibuluat nene iate kasitsitnakenen.”

Ipalelek si Tuhan panukananNia

¹⁵ Kuanangan si Tuhan, “Sibo, lelekake pei kam aponia sipuaaili kepei iaili gogoi nene, iate kepei tugalai minca umangKu nene! Kipa purimanuaiatmui kateteret nenda.”

¹⁶ Ameian kam masiitso gandum siruruakenen samba nupaatu kam babara ruangotu kilogram gandum, tapoi abara sangotu kilogram le. Ei kam masiseilu sangotu liter anggur ka pasipionan anggur, tapoi abara epat pulu liter le.

¹⁷ Akuakean rusa simaoloi samba urat bukku bule ipakatai sangamberi buat monemui, tapoi kam leu tanuoba kam toili katubukKu.

¹⁸ Ka gogoi nene, gogoi rua pulu epat laggo siba, bongen umangKu alepa'an aitugalakngake! Lelekngake aponia sipuaaili barania kineneiget.

¹⁹ Kenanen ta'anai gandum sipulelegei, loinat anggur, loinat sileu, loinat Delima, samba loinat Zaitun tapei amubua, tapoi barania kineneiget Kususukatnake le kam!”

Palelengan Tuhan kai Zerubabel

²⁰ Ka gogoi nenda leuet, iate gogoi sika rua pulu epat laggo siba, akenangan patonekatNia si Tuhan sikarua kai Hagai,

²¹ “Bule isege'akenia kai Gubernur Zerubabel. “Tuhan masikua: Taan mauju Kubaraake ngeungeu manua samba polak,

²² sangamberi purimataat Kuibuake samba gegetda Kutata'ake. Sangamberi Kereta pasaggak samba sipasimumuriake kupababailu le; sangamberi kuro mamatei le geti samba sia sipukukuro' pamateirangan leu et pasasambadra.

²³ Ka gogoi nenda ekeu Zerubabel, paguguletKu, Kurioake geti ekeu muparenta ka oningKu. Kalulut ekeu poi sipiliKu.” Kisedda te ngangan Tuhan Sipulubeunan.