Hab. 3 - BUKO SIPUNENAN

Panindogat Habakuk

¹ Nene te panindogat Nabi Habakuk.

² Oi Tuhan, akuarep sangamberi sigalainu, kele gora bagat paatuatku. Bule sigalainu sabeu nenda nuoleake minca samba nupatoila kateteremai nene. Kau le nupununtuki kai baga kenanen magolu bagam.

³ Ekeu Taikamanua Sipululatcat siooi sibara ka laggai T'eman, Amoi Ekeu baram ka paleleleu Paran. Manua aisaluki pubebeunanNu; polak sut le katuumananNu.

⁴ Moi Ekeu pasamba toro simalatcat, ka kabeinu bela toro simakirisau Sedda te anulipputnake' gegem.

⁵ Nugugluake' besi' muenung ka matam samba kamateiat masitut teiteiNu.

⁶ Ke' muari Ekeu pungeungeunangan polak, ke' numattai bangsa-bangsa puattatrangan kalulut ge'ge'ra. Paleleu leleu siturere siburu gatca; patinambu-tinambu sipururura seddet. Ka patinambu-tinambu nenda te. Nupueenung barania ka siburu peile.

⁷ Itco'kungan sipulaggai ka Kusyan aisaksakngan sia puloloto, samba tai Midian mugeret tubutda.

⁸ Oi Tuhan, kalulut koat le' pa' aitukarai logauNu? paoinan-oinan le' pa aibaraake nupugolu? ‘Kele nupukuro samba kereta pasaggak nukudduiji tanai rusa, ka teteret anukau kamanangan ka sapaamianNu.

⁹ Anupatarekngan rourounu, loguiNu matarekngan tupanaake iageti sila'nungan polak bailiunangannia bagat oinan.

¹⁰ Pangeungeunangan paleleu-leleu, masiitco Ekeu, kamanua bara urat kele sipiliakenen. Oinan ka tei polak ukku le ngangania, onunia sabeu sipatutut amurouan.

¹¹ Torot palogui-loguiNu ola le itutui, simuine bakkatNu kirisau lepa ipubila, iageti puarinangan sulu samba laggo ka kudduatnia.

¹² Nuenungi polak ka ngoingoi bagam; paperakinungan bangsa-bangsa ka bagat goluNu.

¹³ Bela Ekeu masibelaake paamianNu, samba masiarauake rimata sipilim. Bo'bo'nungan siuteake sirimanua sikatai Tata'akenungan sangamberi sipasitututnia.

¹⁴ Oraknangan siloguiNu siuteake saladdudra tai saggak ka teteret araoi saladdu kele ron talabari, bule rapasabu kai. Puga'ga'rangan ka angkat baga, kele sirimanua sipumemengmeng masipaoreji sirimanua simageba.

¹⁵ Pasamba kuro Nupaperaki koat simalio samba koat sipumumusi.

¹⁶ Masiarep nenda sedde' le bagakku samba geret le bibokku, sulei le tubukku aitata ron tubukku, kaipa-kaipa le kupuenung soksoknangan rerekku. Tenan aku meng masingenaake ukuman Taikamanua katubutda sipasasaggak.

¹⁷ Kenanen loina sileu ta'anai buania samba loinat anggur ta'anai anggurnia, kenanen pasimoneiat loinat zaitun ta'abara samba buat gandum ka mone ta' aisiripoki, kenanen matei sangamberinia biribiri samba gelit tarimeu ta'anai ka bagania.

¹⁸ Sarat muangka' baga le' aku, aipoi Ekeu Tuhan Taikamanua le sipasiarau aku.

¹⁹ Ekeu masiake' ron tubukku kele' reret simasusura, paronnungan rerekku. Palulunungan aku bule' kumaarau ka teteret kupuenung ka simaleleu.