Hab. 2 - BUKO SIPUNENAN

Alegiat Tuhan kai Habakuk

¹ Kuoba le' tusakai ka pujagoatku, samba masingenaake' apa kuanen Tuhan katubukku, samba kipa alegiatNia ka pagalaiat ngunyuku.

² Kise' te alegiat Tuhan katubukku, “Suratnake' simakolou ka lei' siripot sipatoilaKu ka tubum bule imalabbei rabasania.

³ Surat le' nenda, kalulut kineneiget ta'pei muaaili. Tapoi tetere nenda iaailingan le', samba apa sipatoilaKu ka tubum bulat muaaili. Kenanen kele maburu' peile, tapoi ngena ake' le! Tetere nenda muailingan le ta'an mauju.

⁴ Repdep! Sirimanua sijo ta'maarau; tapoi sirimanua siparaboatnake siobat Taikamanua muririmanua kalulut riuriu topitnia ka tubut Taikamanua.”

Pateleijat ka sirimanua sijo

⁵ Pukayoat nenda mareirei ipajo sirimanua. Sirimanua simaalau baga nenda mabuak patuat samba ta'masege bagadra. Kele kamateiat sitaisesege baga, bailiunangan sene-senen bangsa pakominangannia.

⁶ Tapoi raasa samba ragegeigei te nia sangamberi bangsa sikalaakenennia. Kuarangan, “Tutelei le ekeu kalulut maigi anururu'ake' bibilet ta' bakkatnu! Kipangan le' ujunia nupakayo tubum nupaksa sirimanua sipuutak bule' ralului utakdra ka tubum?”

⁷ Tapoi ta' anuseseake, ekeu sipasikakalaake sirimanua sabagei, muutak leuet samba rapaksa nulului utak samba bunga. Momoi te tai saggaknu samba sibaraake numaloto. Rauraurangan te geti bibiletnu!

⁸ Maigingan bangsa anuparaurangi, tapoi bangsa-bangsa sitaiooi nuraurau, rapararauraugi te ekeu, kalulut pamamatei sigalaiakenennu, samba kalulut gegem ka tobbou laggai-laggai sigoiso' samba sabeu samba ka sirimanua sipulalaggai.

⁹ Tutelei le' ekeu! Nupakayo le muntogatnu kapuuktungan siala'nu ka sitaimaroipo, bule' imaaman lalepnu saram samba numareunan ka sangamberi pugejaat baga samba kasibabara.

¹⁰ Tapoi pinatum nenda siake' puailaat ka muntogatnu le. Kapasirarauraunu bangsa simigi, anupageba le' tubum saram.

¹¹ Sarapei bukku ka rupi mugegerei masitelei ekeu, samba arigit lalep masiailouake gereinu nenda.

¹² Tutelei le' ekeu! Nurioake laggai pubakkanannia kapukakatai samba nugalainia ka bagat pamamatei.

¹³ Bangsa sikalaakenennu bulat mageja bagadra sita'lulu, samba sangamberi sirioakenendra sapru le ilabonia obengan. Sangamberinia nenda iate' teu bagat Tuhan Sipulugege.

¹⁴ Tapoi kele' saisai bagat koat simasut oinan koat, kisedda leu te' polak isutnake' puaagai pagalaiat Tuhan samba gegeNia.

¹⁵ Tutelei le' ekeu! nupaloloi samba nupakaila pabebeakenenmui lalep nupapuineng sia bailiunangan kele simapuineng.

¹⁶ Kineneiget aiailingan teterenia tupakaila ekeu, ta'an suruket. Pubebeunannu isasaili te bailiu paloloijat. Pulokat pasiukuman iaake te si Tuhan nulonia teret saileunangan ekeu: “Si Tuhan aiake nia pulokat nene nulonia kabagania masiukum ekeu. Ka nungannia geti samba pauddainangan ekeu.”

¹⁷ Patatdeijinungan paloina-loina' kaleleu Libanon, kineneiget ekeuan le' tutatadde. Patarimeu sibabara sedda anupamateiat, samba kineneiget patarimeu-tarimeu bailiu kalotoakenennu “maloto'an ekeu.” Aipuaili sangamberinia nenda kalulut pamamatei samba puoddoi sigalaiakenenu ka tobbou laggai sigoiso samba sabeu samba leu katubutda sipulalaggai.

¹⁸ Apakatukaunannia tularat sipae, sipae sigagalainia? Aponia katukaunannia tularat siurukanen sigelaiake patajuat nenda? kalulut sipasigagalainia matonem baga geti ka sigalainia. Siripokatnia tularat nenda ta iagai manibo sigalainia.

¹⁹ Matei le ekeu! Sirimanua sipasikukua katubut sangatippu loina; pumata kam, samba ka bukku taiagai manibo: “Tusuru!” momoi pa ipangantru kirenangan atutabutannia perak samba perak tapoi ketsat taanai kabagania.

²⁰ Ai Nia ka lalepnia sipunenan si Tuhan; oto kau le raputangoan ka mataNia sangamberi sirimanua ka polak.