Gal. 6 - BUKO SIPUNENAN

Parom pasasambata

¹ Ale sasaraina, ke ai tusese sara sirimanua sigalai sele, oto kam sinopsop Ketsat masipalulu nia ka enungan puroipoat ka bagat leppet baga; jago leu tubum kekeu, bui iorak ekeu pasisiboat.

² Parom kam masibairat bairanenmui, kisedda le poi nusutnake kam surukat Kristus.

³ Aipoi ke ai kasei pa siumunake tubunia, oto ta anai apa pa sibabara ka tubunia, aipatajungan tubunia.

⁴ Kau le senen sirimanua masisibo sigalainia; ia geti momoi iumunake tubunia sarania iitco sigalainia, ta sigalaira sabagei.

⁵ Senen sirimanua le poi masibabairat bairanennia.

⁶ Sirimanua sigelaiakenen tiboiet Taikamanua, kau irubeiake sibabara ka tubunia ka sipasigegelaiake nia.

⁷ Bui isele kam! Ta paguileakenen Taikamanua. Apa poi ikaramake sirimanua, ia leu te imomonei.

⁸ Aipoi sipangangaram ka akkulania, pulangokat le imomonei sibara ka akkulania, tapoi sipangangaram ka Ketsat, purimanuaiat sitaitatata le imomonei sibara ka Ketsat.

⁹ Bui tamagela masigalai simaeru, aipoi ke aiailingan teterenia pasimoneitangan, ke ta bai masaggo sita.

¹⁰ Oto ujut ai pei le oggak ka sita, kau tagalai simaeru ka sangamberi sirimanua, sara pei ka saaleita sikere tonem baga.

Patonekat pasilepa samba salam

¹¹ Itco pei kam, beunannia takat surat sinurat kabeiku ka kam.

¹² Sia sioba masipaumun tubu ka uddut, sia te sibesiake nupusunat kam, sarat bule ta itukukuru sia kalulut siliktengan Kristus.

¹³ Beringan poi sia sipususunat, ta leu ragagalaiake Surukat; obara le nupusunat kam, bule ramaumun ka pagalaiat akkulamui.

¹⁴ Tapoi kaku geti bulat ta koba kuumunake tubuku, sarat ka bagat siliktengan Tuhanta Jesus Kristus le. Kalulunia poi aitusiliktengaake polak nene kaku, samba aku tusiliktengaake iaddeake polak nene.

¹⁵ Aipoi musunat ele ta musunat, ta anai pagalaiatnia, katubabailiu sibaraakenen sibau le abeu.

¹⁶ Bule aban samba katet baga le ka sia siparaboatnake aturan nene, samba ka Israel Taikamanua.

¹⁷ Barania kineneiget, buian ibara kasei pa sigejaake bagaku, kalulut ai le kupaambit ka tubuku toggaiat pagugulet Jesus aku.

¹⁸ Bule kiliu bagat Tuhanta Jesus Kristus masipaalei ketsatmui sasaraina! Amen.