Gal. 5 - BUKO SIPUNENAN

Puujaatda tai Kristen

¹ Bule tapuuja sipulelelek, ujaakenangan sita Kristus. Oto kau imaron nupurio kam, buian nuoba kam minca ibailiu kam pagugulet.

² Arep kam, aku Paulus masikua ka kam: ke musunat pei le bai kam, taan anai kaumui nia Kristus.

³ Kumunengake nia minca ka senen sirimanua sioba musunat, buita igalaiake sangamberi aturan Surukat.

⁴ Ke nukaroni kam puroipoat kalulut Surukat, abelangan kam ka Kristus, taan anai kam ka bagat kiliu baga.

⁵ Aipoi ka bagat Ketsat le samba kalulut tonem baga tangenaake kam puroipoat karonietta.

⁶ Aipoi ka bagat Kristus Jesus, musunat ele ta musunat, ta anai pagalaiatnia, sarat tonem baga simakokoinong ka bagat nuntut baga le.

⁷ Siburu amaeruan patatakaimui. Kaseian le amasisaila kam, bui nureddet kam pubulanan?

⁸ Patubbuiat ta mureddet nene, ta te sibara ka Taikamanua sipasisosogai kam.

⁹ Goiso le sioman, siop sangatatappa tapung galajet roti.

¹⁰ Ka bagat Tuhan matonem bagaku pagalaiat kam, ta aisili pinaatumui ka pinaatuku. Tapoi kasei masipageugeu kam, ai leu ibairat ukumannia, kenanen kasei pa nia.

¹¹ Aku kaku geti sasaraina, ke kunganturuake pei le bai pagalaiat pususunat, rakukukuru pei le kodda aku? Ke kunganturuake pei le bai, oto loina siliktenga taan sibailiu katusoksongan.

¹² Kauan le rapalau tubuda sia sipageugeu kam!

¹³ Aipoi ka kam sasaraina, bule nupuuja kam le aitusogai kam. Tapoi bui nupakei kam puujaat nenda masiputului tubu mugalai siobat akkula, tapoi parom le kam pasasambamui ka bagat nuntut baga.

¹⁴ Aipoi sangamberi Surukat, atulopuruakean ka bagat sara tiboiet, ia te, “Pununtuki baga aleinu sirimanua kele nuntut bagam ka tubum!”

¹⁵ Tapoi ke pason samba pagung le kam, paan te ka kam, masubumuian.

Murimanua siripot akkula ele siripot Ketsat

¹⁶ Nene le kuanenku: Puparaboat kam siripot siobat Ketsat, baan tututnake kam siobat akkula!

¹⁷ Aipoi siobat akkula ta ioba Ketsat samba siobat Ketsat ta ioba akkula, ruania poi ai le pasasaggak, bule ta ioi nugalai kam siobat bagamui.

¹⁸ Tapoi ke Ketsat ipalulu kam, taan kupkumen Surukat kam.

¹⁹ Galajet akkula amatoilaan, ia te: puumunan, pulolinan, botbot,

²⁰ pasibubuluji buluat, pukekerei, pasasaggak, pajoggolat, tutut baga, golu, alau baga, pasaraat, pupapartei,

²¹ sisit baga, pupupuineng, pasieemu samba pabageibagei. Ka pagalaiat sangamberinia nene kukua ka matamui kele sikuaku siboiki, sia sigalaiake nene, ta raiikepmake Purimataat Taikamanua.

²² Buat Ketsat geti ia te: nuntut baga, angkat baga, aban, om baga, anggai baga, erut baga, topit,

²³ leppet baga, surut tubu. Ta anai surukat sisaggangi sangamberinia nene.

²⁴ Sia sibailiu bakkat Kristus Jesus, arasiliktengaakean akkulara samba sangamberi pubotbonannia samba obaketnia.

²⁵ Ke amurimanuangan sita ka bagat Ketsat, kau leu tapuparaboat ka bagat Ketsat.

²⁶ Bui tapubeunan tubuta siboboi, paaggara pasasambata samba pasisi pasasambata.