Gal. 2 - BUKO SIPUNENAN

Rasilo si Paulus tai apostel sabagei

¹ Pasat pulu epat ngarura, ei aku minca ka Jerusalem pasamba si Barnabas, kuambit leu si Titus.

² Eeiku nene siripot pamoilianan Taikamanua. Nganangakekungan ka matada paaarepku Katuareman Simaeru ka talagada bangsa bagei – tapoi ka patiboat sikokoiakenen ka sia saute le –, bui imasibbu pababalauku kineneiget ele ka silelepa.

³ Tapoi si Titus aleiku, kenanen tai Grika nia, ta atupaksa nia ipusunat.

⁴ Ai tedda sibesiakenia, ia te sasaraina sipatataju, situguguru ka simalipput, siusuake tubunia ka baga masitaiko puujaatta ka bagat Kristus Jesus, bule rakau sita minca ka pupagugulenan.

⁵ Tapoi beri goiso ta amusum kai ka tubuda, bule imariuriu pubulanan Katuareman Simaeru ka kam.

⁶ Pagalaiat sia oniakenen saute – kenanen kipa tiboi tubuda siburu, ta anai galainia kaku, aipoi Taikamanua ta iitco matat sirimanua – kenanen kipa pa, sia oniakenen saute, ta momoi ratuppai apa pa bagei kaku.

⁷ Tapoi bailoknia le, itcorangan sesegeakena Taikamanua ka tubuku masipaarep Katuareman Simaeru ka sia sitaipususunat, kele kai Petrus ka sia sipususunat.

⁸ Aipoi nia sipasikakau gege kai Petrus muapostel ka sia sipususunat, nia leu amasiake gege kaku muapostel ka sitaipususunat.

⁹ Samba kele araitco kiliu baga sinegeakenen kaku, si Jakobus, si Petrus samba si Johannes, oniakenen sautet paamian, salamrangan aku samba si Barnabas, toggaiat pasambaat, bule kai mei ka sitaipususunat, sia geti ka sipususunat.

¹⁰ Sarat kau le imariuriu kurepdep kai simageba; samba kirenangan nene te siobat bagaku kugalaiake.

Paulus masisusui matat Petrus ka Antiokia

¹¹ Tapoi kele aioi si Petrus ka Antiokia, susuikungan matania, kalulut ai selenia.

¹² Aipoi enan ta momoi sikoiniakenen Jakobus, amukoman nia sambada saalei sitaipususunat; tapoi kele araoi, siksiknangan tubunia, areuakenangan tubunia kalulut lotonia ka saalei sipususunat.

¹³ Samba tai Jahudi sabagei leu ratutnake nia masipataju tubu, pat beri si Barnabas leu ratiktik masitutnake patajuatda.

¹⁴ Tapoi kele akuitco galai tubuda ta siripot pubulanan Katuareman Simaeru, kuakungan kai Kepas ka matada sangamberida, “Ke ekeu sara tai Jahudi, murimanua kele sipuarat sabulungan samba ta siripot tai Jahudi, kipa iooi nupaksa saalei sitaipususunat murimanua siripot Jahudi?”

Tai Jahudi samba sipuarat bagei kalulut tonem baga ka Kristus le ituaarauake sia

¹⁵ Siripot pututukat mata, kirenangan tai Jahudi le kai, ta sirimanua sijo sibara ka bangsa bagei.

¹⁶ Tapoi kuagai ta maroroipo sirimanua kalulut pasigagalaiake Surukat, sarat kalulut tonem baga ka Kristus Jesus le. Ia te lulunia ka kai leu amatoneman bagamai ka Kristus Jesus, bule tuparoipo kai kalulut tonem baga ka Kristus, ta kalulut pasigagalaiake Surukat. Aipoi ta anai kasei pa momoi tuparoipo kalulut pasigagalaiake Surukat.

¹⁷ Tapoi ke bai kai sibesiake tuparoipo ka bagat Kristus toila sirimanua sijo le, oto siromake jo pa Kristus? Bulat ta kisedda.

¹⁸ Aipoi ke kurioake bai minca nenda siragatku, akubailiuakean tubuku sipasabau Surukat.

¹⁹ Amateian poi aku ka Surukat kalulut Surukat, bule kupurimanua ka Taikamanua. Atusiliktengaakean aku pasamba Kristus;

²⁰ kineneiget taan aku muririmanua, Kristus-an le sipuririmanua ka bagat tubuku. Samba puririmanuangku kineneiget ka bagat akkula, ka tonem baga ka Togat Taikamanuangan le sipununtuki aku baga samba sibuluake tubunia punu tubuku.

²¹ Ta kupasisibbu kiliu bagat Taikamanua. Aipoi ke ka Surukat bai ibara puroipoat, siboboian le kamamatei Kristus.