Gal. 1 - BUKO SIPUNENAN

Salam

¹ Sibara kai Paulus, apostel ta sibara ka sirimanua, ele kalulut sara sirimanua, tapoi kalulut Jesus Kristus samba Taikamanua Ukkui le, sisuruake nia ka simamatei,

² samba sibara ka sangamberi sasaraina sipaalei aku, masiailiake sapaamian ka Galatia:

³ Kiliu baga ka kam samba aban sibara ka Taikamanua, Ukkuita, samba sibara kai Tuhan Jesus Kristus,

⁴ sibuluake tubunia lulut jota, masibelaake sita ka polak sikatai nene, siripot teu bagat Taikamanua Ukkuita.

⁵ Ka tubunia le pulatsanan teret buruburu! Amen.

Sara le Katuareman Simaeru

⁶ Makisei ka bagaku, kalulut kise rueinia anukaddiuake kam nia sipasisosogai kam kalulut kiliu bagat Kristus, masitut katuareman simaeru bagei.

⁷ Siripokatnia ta anai Katuareman Simaeru bagei. Ai le sirimanua bagei sipaingo paatuatmui samba sioba masipabailok Katuareman Simaeru sibara ka Kristus.

⁸ Tapoi kenanen kai ele malaika sibara ka sorga masipaarep ka kam katuareman simaeru sitaimakere ka pinaarepmai ka kam, teleiet le nia.

⁹ Kele sikuamai siburu, kineneiget kukua minca: Ke ai kasei pa sipaarep ka kam katuareman simaeru, sitaimakere ka sinilomui ka kai, teleiet le nia.

¹⁰ Siobat bagat sirimanua pa kugagaba kineneiget, ele siobat bagat Taikamanua? Ele masiala bagat sirimanua pa kugagaba? Ke masiala bagat sirimanua bai kugaba, oto ta pagugulet Kristus aku.

Kipa aibailiu si Paulus apostel

¹¹ Tapoi bule nuagai kam nia sasaraina, Katuareman Simaeru sipaarepku, ta katuareman sibara ka sirimanua.

¹² Aipoi ta siniloku ka sirimanua, ele ta sirimanua amasigelaiake aku, sibara ka pamoilianan Jesus Kristus le.

¹³ Aipoi anuarepman kam paraboatku siburu, ai pei le aku ka arat Jahudi: bulat simakope pali le akukukuru paamian Taikamanua samba masipakatai nia.

¹⁴ Samba ka bagat arat Jahudi aku le simabuak ka saalei kereku ka talagat bangsaku, aipoi bulat maosa aku masisuru arat taikebbukatmai.

¹⁵ Tapoi kalulut kiliu bagat Taikamanua, pilinangan aku ai pei le aku ka suruket inangku, samba isogai aku bailiu paguguletnia.

¹⁶ Teuakenangan ipoiliat Togania ka tubuku bule kupaarep nia ka talagat bangsa bagei. Oto beri goiso ta akupatiboiji ka sirimanua;

¹⁷ samba ta leu amei aku ka Jerusalem masiailiake sia tai apostel sipuboboiki kaku, tapoi riuriu le ei aku ka Arab, lepa toili aku minca ka Damaskus.

¹⁸ Pasat telu ngarura, ei aku ka Jerusalem masibalou si Kepas, pukuddukungan ka tubunia pulu lima ngagogoi.

¹⁹ Tapoi apostel sabagei ta akuitco sia, sarat si Jakobus sarainan Tuhan le.

²⁰ Sangamberi sinuratnakenenku nene ka kam, bulat sibulatnia, iagai Taikamanua, ta kubobokoi.

²¹ Lepa ei aku ka tobbou Siria samba Kilikia.

²² Tapoi sapaamian Kristus ka Judea, tapei raagai aku.

²³ Sarat nene le araarep, “Sipasikukukuru sita siburu, kineneiget aian nia masingangantomanake tonem baga, pakataiketnia siburu.”

²⁴ Ia geti umunakerangan Taikamanua kalulut aku.