Ezra 9 - BUKO SIPUNENAN

Pangasegekat pagalaiat putatalimou simagalu

¹ Kele ailepa tugalaiake sangamberinia nenda, piga pa sikebbukat laggai ka bangsa Israel moi ka tubuku. Rapaagai ka tubuku pagalaiat tai Israel, samba tai imam samba tai Lewi ta arasaraake tubudra ka bangsa sikuddu ka be'be'ra sedda, iate bangsa Amon, Moab, Misir, Kanaan, Het, Feris, Jebus samba Amori. Sarapei tai imam samba tai Lewi leu et masigalaiake kisedda. Sangamberidra masigalaiake pupuraboanan kasitsitnakenen sigalaiakenen sabangsa nenda.

² Taimanteu tai Jehudi mutalimou pasamba sinanalep bangsa bagei, bailiunangan paamian sikokoi bakkat Tuhan ta'an malina. Aipei bagei masigagalaiake siboiki nenda iate sia sikebbukat laggai samba siabeu pupasikelanan ka Israel.

³ Masiarep pagalaiat nenda, bulat mamitnangan bagakku bailiu biritnakekungan bibiletku samba toktokkungan alai samba leu bulut baklaku, lepa kuddu aku kopet sou bagakku.

⁴ Riuriuakekungan mukuddu kisedda teret aili mupanguruat buluakenen ka soibokat. Lepa geti oi sia masigoilik aku. Amaloto'an sia masirepdep palotokat Taikamanuan Israel ka jodra sirimanua sitotoili sibara ka kudduat katuribbaiat nenda.

⁵ Ka teteret tutadda tupanguruatnake buluakenen kasoibokat, suru aku ka kudduatku mureureu baga samba bibiletku simabibirit, purekkukkungan samba totoiakekungan kabeiku ka tubut Tuhan Taikamanuangku.

⁶ Kuakungan, “Oi Taikamanuangku, maila aku masisuruake ute'ku ka matam. Apareddetnan jomai ka ute'mai ailoulouan manua.

⁷ Baranangan ka teteret ka taikebbukatmai aili kineneiget, majo kai ka tubum paamianNu. Iate lulunia tukalaake kai, tai rimata, samba leu tai imammai sia rimatadra bangsa bagei, tumateiake kai, turaurau samba tuabbit kai bailiu tangsiakenen. Atupaloloian kai simakope, kele sipuaaili ka gogoi nene.

⁸ Tapoi kineneiget, oi Tuhan Taikamanuamai, simaruei le Ekeu anupununtuki kai baga. Belaakenungan piga pa sia ka talagamai ka bagat paoreat bule murimanua sipulelek ka kudduat sikokoiakenen nene. Anuakean ka tubumai purimanuaiat sibau.

⁹ Ka teteret ai peile kai ka bagat paoreat, ta anukaddiuake kai. Galainungan bule rapununtuki kai baga tai rimata Persia samba tuobaake kai murimanua samba leu masigalai minca Umam legei karagatat nenda. Jagonungan kai sene, ka Jehuda samba ka Jerusalem.

¹⁰ Tapoi kineneiget, oi Tuhan Taikamanua, lepat sangamberi sipuaaili nenda, apa momoi kukua kai? Akupuarakngan kai minca sangamberi parentam,

¹¹ siakeNu ka tubumai sisegeakenendra tai nabi, sapaguguletNu. Arapaagaian ka tubumai aipoi polak sibulat kudduijietmai nenda ta malina kalulut sangamberi sipulalaggai barania ka tu'tu aili ka tu'tu' masigalai simalolit samba kasitsitnakenen.

¹² Kerarangan kai tai nabi mutalimou simagalu pasamba sangamberi sirimanua nenda, ele masiropmake sia bule imaeru pririmanuandra. Ke mareddet kai, bailiunangan kai simaron samba nanammaian buat siureman ka polak nenda samba kaumaian polak nenda ka muntogatmai ibaliunia bakkatdra teret buruburu.

¹³ Amajonan kai samba akupasabau kai surukatNu, samba anuukuman kai. Tapoi kuagai kai, oi Taikamanuamai, aipoi ukuman siakeNu nenda ta siripot sanet siloketmai, tapoi nuarauake peile kai.

¹⁴ Oto, kipangan le iooi minca kupuarak kai sangamberi parentam samba mutalimou simagalu pasamba sangamberi sirimanua sijo nenda? Ke kugalaiake kai, golunungan kai bailiu mateiakenungan kai sangamberimai samba ta anai nuobaake berisara murimanua.

¹⁵ Tuhan, Taikamanuan Israel, Ekeu le simaroipo. Kenanen poi kisedda Nuobaake le kupurimanua kai. Kuseseake kai puseleatmai ka tubum. Ta' anai puteukatnia kupurio kai ka matam.”