Ezra 8 - BUKO SIPUNENAN

Sia siribbaiakenen toili pasamba si Ezra

¹ Nene te oninda sia sautet muntogat siribbaiakenen ka Babel samba sitotoili pasamba aku, Ezra ka Jerusalem ka teteret Artahsasta muparenta sibailiu rimata.

² Barania ka muntogat Pinehas: Gersom; sibara ka muntogat Itamar: Daniel; sibara ka muntogat David: Hatus

³ muntogat Sekhanya; sibara ka Paros: Zakharia, pasambania sangaotu lima pulu sia taimanteu sitususurat kabagat paninikat;

⁴ sibara ka muntogat Pahat-Moab, pasambania rungotu sia taimanteu;

⁵ sibara ka Zatu: Sekhanya togat Jahaziel, pasambania telungotu sia taimanteu;

⁶ samba sibara ka muntogat Adin: Ebed togat Jonatan, pasambania lima pulu sia taimanteu;

⁷ sibara ka muntogat Elam: Jesaya togat Atalya, pasambania pitu pulu sia taimanteu;

⁸ sibara ka muntogat Sefaca: Zebaja togat Mikhael, pasambania balu pulu sia taimanteu;

⁹ samba sibara ka muntogat Joab: Obaja togat Jehiel, pasambania ruangotu pulu balu sia taimateu;

¹⁰ samba sibara ka muntogat Bani: Selomit togat Josifya, pasambania sangotu enem pulu sia taimanteu;

¹¹ samba sibara ka muntogat Bebai: Zakharia togat Bebai, pasambania rua pulu balu sia taimanteu;

¹² samba sibara ka muntogat Azgat: Johanan togat Hakatan, pasambania sangotu pulu sia taimanteu;

¹³ samba sibara ka muntogat Adonikam: siooi sikateitei, samba nene te' oninda: Elifelet, Jehiel samba Semaya, pasamba sia enen pulu taimanteu;

¹⁴ samba sibara ka muntogat Bigwai: Utai samba Zabud, pasamba pitu pulu sia taimanteu.

¹⁵ Sangamberi mungkuat nenda ruruakekungan sia ka bebet bagat oinan sipuguguruk ka laggai Ahawa, lepa pusapoumaian sedda telu ngagogoi buru'nia. Kele ailepa kulelekngakenia, ai piga pa tai imam ka talagdra, tapoi berisara sia sibara ka suku Lewi.

¹⁶ Lepa geti sogaikungan siba sia ka talagdra saute'ra, iate: Eliezer, Ariel, Semaya, Elnatan, Jarib, Elnatan, Natan, Zakharia, Mesulam samba leu rua guru, iate si Joyarib samba si Elnatan.

¹⁷ Lepa geti koiniakekungan sia masiailiake si Ido, ute'ra sirimanua simigi ka Kasifya, masitiddou bule si Ido samba saalei pagalaiakenennia sia sipugagalai ka Uman Tuhan, masiake katubumai sirimanua addeat mupasikelat ka Uman Tuhan.

¹⁸ Kalulut erut bagat Taikamanua, akerangan katubumai si Serebya, tai Lewi simaagai sibara ka muntogat Mahli. Pasambania amoi leu et tatoga samba sasarainania, igitdra 18 sia.

¹⁹ Si Hasabya samba si Jasaya sibara ka muntogat Merari, pasamba rua pulu sia saepputdra araake leu et katubumai.

²⁰ Ai leu sabagei nenda ruangotu ruapulu sia sipugagalai ka Uman Tuhan sitususurat oninia. Taikebbukatdra baranangan siboiki airioakean sia si David samba siabeu ka purimataat addeat masiropmake tai Lewi.

Sangamberi sirimanua sibabara ka kudduat katuribbaiat mupuaso samba manindou

²¹ Lepa geti ka bebet bagat oinan Ahawa, segeakekungan aipoi sangamberi bui' ta mupuaso samba masipaepe tubu ka matat Taikamanua. Panindoumaian bule ipaalei kai Taikamanua ka bagat puenunganan nenda, samba leu masijago kai, tatogamai samba sangamberi taikebbukatmai.

²² Maila aku masitiddou saladru sipukukuro' ka tubut rimata sipasijajago kai ka tai saggak ka puenunganan. Aipoi akukuangan ka tubunia, aipoi Taikamanuamai masipanukani senen sirimanua sipaninindou katubuNia samba masipulagaki baga samba leu masiukum senen sirimanua sitaimatopit ka tubuNia.

²³ Iageti pupuasomaian samba leu manindou ka tubut Taikamanua masitiddou paroman samba Nia leu masiarepi panindogatmai.

Panguruat addeat Uman Tuhan

²⁴ Sibara ka talagatdra tai imam abeuakenen pilikungan 12 sia: Serebya, Hasabya samba 10 sirimanua minca.

²⁵ Lepa geti kilokungan addeatda perak, mas samba sangamberi pugalai siakenia rimata paroman, sia sipangantoman ka rimata samba leu siabeu ka purimataat samba sia sangameri tai Israel, addeat tupakei ka bagat Uman Tuhan. Sangamberinia nenda kusege'ake katubutda tai imam nenda.

²⁶ Iageti paatukungannia kukau ka kabeira: perak enemngotu lima pulu talenta, panarengan perak sakinia sangotu talenta, mas sangotu talenta,

²⁷ rua pulu pulokat mas sakinia sangaribu dirham samba rangambua panarengan sibata ka tembaga simalina simakirisau samba malainge kele mas.

²⁸ Kuakungan katubutda tai imam, “Sangamberimui tukokoiake kai Tuhan Taikamanua panindogietdra taikebbukatta, kisedda leu et sangamberi pugalai perak samba mas sipanguruatnakenen ka tubut Tuhan iate sikokoi addeat Tuhan.

²⁹ Jago kam bibilet nenda sipulelelek teret sege' kam ka Uman Tuhan. Ke' asege'an sedda, kilomuian sangamberimui bibilet nenda, samba kaumuiannia katubutda sautera tai imam samba siute'ake tai Lewi, samba leu sautera tai Israel ka Jerusalem.”

³⁰ Iageti silorangan tai imam samba tai Lewi, perak samba mas samba sangamberi pugalai nenda bule tuambit ka Uman Tuhan ka Jerusalem.

Sege' ka Jerusalem

³¹ Ka gogoi sika pulu rua laggo siboiki kaddiuakemaian bagat oinan Ahawa samba tuitui kai kuei kai ka Jerusalem. Ka bagat puenungananmai nenda Taikamanua masijago kai ka tai saggak samba sipasiraraurau.

³² Ka teteret akusege kai ka Jerusalem, puarimaian telu ngagogoi burunia.

³³ Lepa geti ka gogoi sika epatnia, ei kai ka Uman Tuhan, lepa kilomaian perak, mas samba sangamberi pugalai nenda. Kele ailepa nenda kaumaiannia ka tai imam Meremot togat Uria ai iitco si Eleazar togat Pinehas samba rua tai Lewi, iate Jozabad togat Jesua samba Noaja togat Binui.

³⁴ Adderangan sangamberi bibilet nenda samba tukilo, lepa suratnake simakolou.

³⁵ Ka gogoi nenda leu et sangamberi sirimanua sitotoili sibara ka kudduat katuribbaiat nenda, masipanguruatnake buluakenen rarangen ka tubut Taikamanuan Israel. Pulurua ngamuneng jaui simanteu rapanguruatnake sangamberi tai Israel, siba puluenem ngamuneng biribiri simanteu samba pitupulupitu ngamuneng togat biribiri. Ta' sarat nenda ai leu et pulurua ngamuneng kambing buluakenen pasiappet jodra. Sangamberi tarimeu nenda tulabo sibailiu buluakenen kai Tuhan.

³⁶ Iageti surat sikau rimata katubutda, kaurangannia katubutda tai gubernur samba sipugagalai ka pupasikelanan pamarenta provinsi Efrat kabelekat sulu. Iageti sia sipasikeli pupasikelanan pamarenta nenda masikau paroman ka tubut sirimanua simigi bule mariuriu rapanindou ka Uman Tuhan.